នៅព្រឹកថ្ងៃទី២៤ ខែមេសា ឆ្នាំ២០២០នេះ ឯកឧត្តម ផៃ ស៊ីផាន រដ្ឋមន្រ្តី ប្រតិភូអមនាយករដ្ឋមន្ត្រី និងជាប្រធានក្រុម អ្នកនាំពាក្យរបស់រាជរដ្ឋាភិបាលកម្ពុជា បានស្នើសុំការគាំទ្រពី ឯកឧត្តម ខៀវ កាញារីទ្ធ ក្រសួងព័ត៌មាន ក្នុងការរៀបចំសន្និសីទសារព័ត៌មាន ស្ដីអំពីភាពរីកចម្រើន និងការបង្ហាញពីសមិទ្ធិផល ក៏ដូចជាទិសដៅការងារ របស់រដ្ឋបាលថ្នាក់ក្រោម។
ក្នុងជំនួបនៅទីស្ដីការក្រសួងព័ត៌មាននាព្រឹកនោះ ឯកឧត្តម ផៃ ស៊ីផាន បានគោរពថ្លែងអំណរគុណដល់ ឯកឧត្តម ខៀវ កាញារីទ្ធ ដែលជារៀមច្បង តែងតែផ្តល់នូវមតិយោបល់ល្អៗជាច្រើន ទាក់ទងនឹងកិច្ចការងារ អ្នកនាំពាក្យ ក៏ដូចជាការងារព័ត៌មាន ដើម្បីឲ្យអង្គភាពអ្នកនាំពាក្យ ទទួលបានជោគជ័យ ជាបន្តបន្ទាប់។ ឯកឧត្តម មានប្រសាសន៍ថា នាពេលកន្លងមក អង្គភាពអ្នកនាំ ពាក្យរបស់រាជរដ្ឋាភិបាលកម្ពុជា បានរៀបចំជាសន្និសីទសារព័ត៌មាន ស្តីពីវឌ្ឍនភាពនិង ទិសដៅការងារបន្តរបស់បណ្តាក្រសួង ស្ថាប័ន អង្គភាពពាក់ព័ន្ធនានា ដើម្បីជូនព័ត៌មាន ដល់អ្នកសារព័ត៌មាន សម្រាប់ផ្សព្វផ្សាយជូនទៅសាធារណជន បានជម្រាប ពីព្រឹត្តការណ៏ ថ្មីៗ កើតមានឡើងនៅក្នុងប្រទេស ។ ក្រៅពីនេះក្រុមការងារ ក៏មានរៀបចំការបណ្តុះបណ្តាល ដល់អ្នកសារព័ត៌មាន និងមន្រ្តី អ្នកនាំពាក្យ ទាំងនៅថ្នាក់ជាតិ ថ្នាក់ក្រោមជាតិ ថែមទៀតផងដែរ។
ជាមួយនោះ ឯកឧត្តម ផៃ ស៊ីផាន បានបញ្ជាក់ថា ការស្នើសុំការគាំទ្រពី ឯកឧត្តមរដ្ឋមន្រ្តី ខៀវ កាញារីទ្ធ ក្នុងការរៀបចំសន្និសីទ សារព័ត៌មាន នៅថ្នាក់ក្រោមជាតិនាពេលនេះ ស្របពេល សន្និសីទសារព័ត៌មានស្តីពីវឌ្ឍនភាព និងទិសដៅ ការងារបន្តរបស់ក្រសួង ស្ថាប័ន សម្រាប់ស្ថាប័នជាតិ បានបញ្ចប់។ ដូច្នេះអង្គភាព អ្នកនាំពាក្យ គ្រោងនឹងរៀបចំសម្រាប់ថ្នាក់ក្រោមជាតិម្តង ដែលនឹងបង្ហាញអំពី ភាពរីកចម្រើន និងការបង្ហាញពីសមិទ្ធិផល ក៏ដូចជាទិសដៅការងាររបស់ រដ្ឋបាលថ្នាក់ក្រោមជាតិនីមួយៗ។
ជាការឆ្លើយតប ឯកឧត្តម រដ្ឋមន្រ្តី ខៀវ កាញារីទ្ធ បានសម្ដែងនូវការគាំទ្រ ចំពោះការរៀបចំ សន្និសីទសារព័ត៌មាន សម្រាប់ខេត្តនីមួយៗ ក្នុងការបង្ហាញពីការងារ ដែលសម្រេចបាន រួមទាំងទិសដៅដែលត្រូវបន្តធ្វើ។ តាមរយៈនេះ ឯកឧត្តម ខៀវ កាញារីទ្ធ បានបញ្ជាក់ថា ដើម្បីឲ្យដំណើរការរៀបចំសន្និសីទសារព័ត៌មាន នៅតាមបណ្តាខេត្ត ទទួលបានជោគជ័យ គឺជា ជំហានដំបូង អង្គភាពអ្នកនាំពាក្យរាជរដ្ឋាភិបាល ត្រូវគោរពស្នើសុំការគាំទ្រ ពីសំណាក់សម្តេច ក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ព្រោះថាសម្រាប់ថ្នាក់ក្រោមជាតិ គឺមានប្រកាសរួមមួយរវាង ក្រសួងព័ត៌មាន និងក្រសួងមហាផ្ទៃ ស្តីការបង្កើតក្រុម ការងារ អ្នកនាំពាក្យ ដើម្បីងាយស្រួលក្នុងការបំពេញកិច្ចការងារ បានទៅដោយរលូន និង ទទួលជោគជ័យ ក្នុងកិច្ចការងារបន្តទៅមុខទៀត។
អត្ថបទ និង រូបថត ៖ ក្រសួងព័ត៌មាន
