នៅព្រឹកថ្ងៃទី២៨ ខែមេសា ឆ្នាំ២០២០ ប្រតិភូសាខាកាកបាទក្រហមកម្ពុជាខេត្តសៀមរាប ដឹកនាំដោយ លោកជំទាវ ទាង អេង-ទៀ សីហា អនុប្រធានសាខាកាកបាទក្រហមកម្ពុជា បានចុះសួរសុខទុក្ខ និងនាំយកអំណោយចែកជូនដល់ គ្រួសាររងគ្រោះរលំផ្ទះ ដោយសារខ្យល់កន្ត្រាក់ និង រងគ្រោះដោយរន្ទះបាញ់ស្លាប់ ចំនួន១៦គ្រួសារ នៅឃុំវ៉ារិន ស្រុកវ៉ារិន ខេត្តសៀមរាប។
អំណោយដែលសាខាកាកបាទក្រហមកម្ពុជាខេត្តសៀមរាប ប្រគល់ជូននាពេលនោះ ក្នុងមួយគ្រួសារទទួលបាន ឃីត១កញ្ចប់ កន្ទេល១ អាវយឺត២ មី១កេស ត្រីខ១យួរ អង្ករ៣០គីឡូក្រាម ចំពោះគ្រួសាររលំផ្ទះ ទទួលបានស័ង្កសី ១៦សន្លឹក និងថវិកា២សែនរៀល ចំពោះគ្រួសាររបើកដំបូល ទទួលបានស័ង្កសី ១០សន្លឹក ស័ង្កសី ១០សន្លឹក និង គ្រួសាររងគ្រោះដោយរន្ទះបាញ់ស្លាប់ បន្ថែមថវិកា ១លានរៀលផងដែរ ។
ក្នុងនាមឯកឧត្តម ទៀ សីហា ប្រធានគណៈកម្មាធិការសាខា លោកជំទាវ បាននាំយកនូវប្រសាសន៍ផ្ដាំផ្ញើសួរសុខទុក្ខ និងចូលរួមសោកស្ដាយ ពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានបង់ សមាជិកគ្រួសារ ព្រមទាំងទ្រព្យសម្បត្តិ ដោយសារគ្រោះធម្មជាតិនេះ។
ឆ្លៀតក្នុងឱកាសនោះ លោកជំទាវ ទាង អេង-ទៀ សីហា ក៏បានលើកបញ្ហាជំងឺកូវីដ១៩ ដែលកំពុងសម្លាប់មនុស្សជារៀងរាល់ថ្ងៃ នៅលើពិភពលោក។ ទោះបីនៅប្រទេសកម្ពុជាពុំមានករណីធ្ងន់ធ្ងរដូចនៅបណ្ដាប្រទេសលើសកលលោក លោកជំទាវ បានអំពាវនាវដល់ ប្រជាពលរដ្ឋនៅតាមសហគមន៍នីមួយៗ ត្រូវមានការប្រុងប្រយ័ត្នក្នុងការធ្វើអនាម័យដៃ និងផ្អាកការជួបជុំ ឬប្រាស្រ័យទាក់ទង នឹងប្រជាពលរដ្ឋ ដែលទើបមកពីខេត្តដទៃ ឬបរទេស។ ព្រោះថា នាពេលកន្លង មកកម្ពុជា មានករណីអ្នកកើតជំងឺកូវីដ១៩ មកពីបរទេសតែប៉ុណ្ណោះ។ ដូច្នេះ ការអនុវត្តតាមការណែនាំ និងបទបញ្ជារបស់រាជរដ្ឋាភិបាល គឺជួយឲ្យប្រជាពលរដ្ឋកម្ពុជាទាំងអស់ រួចផុតពីការឆ្លងជំងឺកូវីដ១៩។
អត្ថបទ និង រូបថត ៖ ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
