គិតត្រឹមថ្ងៃទី២៦ ខែមេសា ឆ្នាំ២០២០ ក្នុងខេត្តសៀមរាប បានធ្វើតេស្តជនសង្ស័យរកជំងឺកូវីដ ១៩ បានចំនួន ២៩១នាក់ ក្នុងនោះស្រី ៩៦នាក់ និងរកឃើញអ្នកផ្ទុកមេរោគកូវីដ១៩ សរុប ៧នាក់ ខណៈបច្ចុប្បន្នពួកគេទាំងនោះបានជាសះស្បើយ និងអនុញ្ញាតឲ្យត្រឡប់ទៅលំនៅដ្ឋានវិញហើយ នេះបើតាមរបាយការណ៍របស់លោកវេជ្ជបណ្ឌិតក្រុស សារ៉ាត់ ប្រធានមន្ទីរសុខាភិបាលខេត្ត និងជាប្រធានក្រុមការងារចត្តាឡីស័កខេត្តសៀមរាប ក្នុងកិច្ចប្រជុំស្តីពី វឌ្ឍនភាពស្ថានភាពទូទៅនៃវិធានការការពារ ការបង្ការទប់ស្កាត់ជំងឺកូវីដ១៩ នៅក្នុងខេត្តសៀមរាប នៅព្រឹកថ្ងៃទី២៩ ខែមេសា ឆ្នាំ២០២០។
មានប្រសាសន៍ក្នុងកិច្ចប្រជុំនោះ លោក ពិនប្រាកដ អភិបាលរងខេត្ត និងជាអនុប្រធានគណ:កម្មការប្រយុទ្ធនឹងជំងឺកូវីដ១៩ ខេត្តសៀមរាប បង្ហាញថា ត្រឹមថ្ងៃទី២៨ ខែមេសា ប្រជាពលរដ្ឋខ្មែរ ចំណូលស្រុក ត្រឡប់ពីបរទេស ជាពិសេសប្រទេសថៃ មានចំនួនប្រមាណជាង១ម៉ឺននាក់ ក្នុងនោះអាជ្ញាធរខេត្ត បានសម្របសម្រួលប្រចាំការ ទទួលដឹកជញ្ជូនពួកគេ នៅតាមច្រកព្រំដែនកម្ពុជា-ថៃ ដូចជាច្រកអន្តរជាតិដូង ប៉ោយប៉ែត និងច្រកអូរស្មាច់ និងបញ្ជូនមកកាន់មណ្ឌលត្រួតពិនិត្យសុខភាពខេត្ត ដើម្បីបង្ការ ទប់ស្កាត់ នៃការនាំចូលមេរោគកូវីដ១៩ ពីបរទេស មកកាន់សហគមន៍។
លោកអភិបាលរងខេត្ត បញ្ជាក់ថា គិតចាប់ពីថ្ងៃទី០៩ ដល់ថ្ងៃទី២៦ ខែមេសា ឆ្នាំ២០២០ នៅទូទាំងខេត្តសៀមរាប មានប្រជាពលរដ្ឋមកពីបរទេស ដាក់ខ្លួនឲ្យនៅដាច់ដោយឡែករយៈពេល១៤ថ្ងៃ សរុបចំនួន ៥២២ នាក់ នៅតាមទីតាំង ដែលរដ្ឋបាលខេត្តបានរៀបចំ ១៣០កន្លែង។ ទន្ទឹមនោះ រដ្ឋបាលខេត្ត សាខាកាកបាទក្រហមកម្ពុជាខេត្ត សហភាពសហព័ន្ធយុវជនកម្ពុជាខេត្ត រួមនិងសប្បុរសជននានា បានចុះសួរសុខទុក្ខ ឧបត្ថម្ភ និងចែកអំណោយជាគ្រឿងឧបភោគ និងសម្ភារៈបរិក្ខារវេជ្ជសាស្ត្រមួយចំនួន ជូនដល់រដ្ឋបាលខេត្ត ក៏ដូចជាគណ:កម្មការប្រយុទ្ធនឹងជំងឺកូវីដ១៩ ខេត្ត ដើម្បីចែកជូនដល់ក្រុមការងារជួរមុខប្រយុទ្ធប្រឆាំងនឹងជំងឺកូវីដ១៩ និងប្រជាពលរដ្ឋ ដែលកំពុងបានដាក់ចត្តាឡីស័ករយៈពេល ១៤ថ្ងៃ នៅតាមទីតាំងទាំ១៣០កន្លែង ទូទំាងខេត្តសៀមរាប។
ព័ត៌មានជាតិ ថ្មីៗ
លោក អភិបាលរងខេត្ត ក៏បានជំរុញដល់ក្រុមការងារគណ:កម្មការប្រយុទ្ធនឹងជំងឺកូវីដ១៩ខេត្ត និងមន្ទីរអង្គភាពស្ថាប័នពាក់ព័ន្ឋទាំងអស់ ត្រូវពង្រឹងកិច្ចសហការជាមួយមន្ទីរសុខាភិបាលខេត្ត ក្រុមការងារចត្តាឡីស័ក បន្តការតាមដាន ត្រួតពិនិត្យស្ថានភាពសុខភាព និងធ្វើតេស្តប្រជាពលរដ្ឋខ្មែរ ដែលទើបត្រឡប់មកពីក្រៅប្រទេស និង ទំនាក់ទំនងជាមួយរដ្ឋបាលខេត្តជាប់ព្រំដែនប្រទេសថៃ ដើម្បីបន្តដឹកជញ្ជូនប្រជាពលរដ្ឋខ្មែរ មកកាន់កន្លែងត្រួតពិនិត្យសុខភាព និងដាក់ខ្លួនឲ្យនៅដាច់ដោយឡែក រយៈពេល ១៤ថ្ងៃ តាមកាណែនាំរបស់ក្រសួងសុខាភិបាល។ លើសពីនោះ អាជ្ញាធរ ភូមិ ឃុំ សង្កាត់ ត្រូវបន្តធ្វើការផ្សព្វផ្សាយ អប់រំ ណែនាំ ដល់ប្រជាពលរដ្ឋនៅតាមមូលដ្ឋានរបស់ខ្លួន អំពីហានិភ័យនៃជំងឺកូវីដ១៩ ទោះបីបច្ចុប្បន្ននៅកម្ពុជា ក៏ដូចជាក្នុងខេត្តសៀមរាប មានភាពធូរស្រាលនៃការជំងឺនេះក៏ដោយ។
អត្ថបទ និង រូបថត ៖ យូ វង្ស
កែសម្រួលអត្ថបទ ៖ សេង ផល្លី
