ជារៀងរាល់ឆ្នាំ នៅថ្ងៃពេញបូណ៌មី ១៥កើត ខែពិសាខ នៅគ្រប់ទីអារាម និងទីសក្ការៈព្រះពុទ្ធសាសនា ក្នុងប្រទេសកម្ពុជា តែងតែប្រារព្ធពិធីបុណ្យវិសាខបូជា ដែលជាពិធីបុណ្យ ដ៏មានសារសំខាន់មួយ ដោយព្រះសម្មាសម្ពុទ្ឋ ទ្រង់បានប្រសូត្រ យាងត្រាស់ដឹងសព្វញ្ញូពុទ្ឋ និងយាងចូលបរិនិព្វាន ក្នុងថ្ងៃនិងខែតែមួយ។ ពិធីនេះដែរ នៅឆ្នាំ២០២០នេះ ត្រូវនឹងថ្ងៃទី០៦ ខែឧសភា។
ពិធីបុណ្យវិសាខបូជានៅកម្ពុជា ជាធម្មតា នៅតាមទីវត្តអារាម គេឃើញមានការរៀបចំពិធីសាសនាចំនួន៣ពេល គឺពេលព្រឹក រសៀល និងពេលយប់។ ក្នុងពិធីនេះដែរ ក្រៅពីសូត្រនមស្សការព្រះរតនត្រ័យ ក៏អាចមានពិធីបំបួស តាំងសមាធិ បង្ហោះគោមជាដើម ទៅតាមតំបន់។
ដើម្បីសម្តែងនូវកត្តញ្ញូកត្តវេទីតាថ្វាយចំពោះអច្ឆរិយៈបុគ្គល ដែលបានសាងបារមី ដោយលះបង់ព្រះកាយពល និងសេចក្តីសុខផ្ទាល់ខ្លួន ស្វែងរកមោគ្គធម៌បម្រើដល់ប្រយោជន៍មនុស្សជាតិតរៀងមក នៅចុងឆ្នាំ១៩៩៩ អង្គការសហប្រជាជាតិ (UN) ក៏បានប្រកាសទទួលស្គាល់បុណ្យ «វិសាខបូជា» ជាពិធីបុណ្យសាសនាអន្តរជាតិ និងរៀបចំនៅទូទាំងពិភពលោក។
ដោយឡែក ទោះបីជាពិធីបុណ្យសាសនានីមួយៗ មានសារសំខាន់យ៉ាងណាក៏ដោយ វិបត្តិនៃមេរោគកូវីដ១៩ បានបង្ខំឲ្យរាជរដ្ឋាភិបាលកម្ពុជា ធ្វើការណែនាំដល់ពុទ្ធបុរិស័ទ ក៏ដូចជាសាសនិកនៃសាសនាដទៃ ត្រូវគោរពតាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល ដើម្បីបង្ការ ទប់ស្កាត់ការរីករាលដាលនៃជំងឺកូវីដ១៩ នៅកម្ពុជា និងពិភពលោក។
ព្រះវិមលសំវរភទ្ទកោ នឿម វុទ្ឋី ព្រះគ្រូចៅអធិការវត្តបារាយណ៍មហានទី រតនារាម ហៅវត្តស្វាយរមៀត ស្ថិតសង្កាត់ទឹកវិល ក្រុងសៀមរាប បានមានថេរដីការថា៖ នៅឆ្នាំនេះ នៅវត្តស្វាយរមៀត នៅឆ្នាំនេះ មានរៀបចំដាក់ពាក្យស្លោកទាក់ទង ទៅនឹងព្រះពុទ្ធសាសនា រៀបចំផ្កាភ្ញី និងសូត្រនមស្សការព្រះរតនត្រ័យ និងប្រកាសពិសាខបូជា ដើម្បីបូជាព្រះពុទ្ធសាសនា។ ប៉ុន្តែ ពុំមានរៀបចំក្បូនដង្ហែរ និងការជួបជុំពុទ្ធបរិស័ទអ៊ូរអរដូចបណ្ដាឆ្នាំមុនៗឡើយ។
គួរបញ្ជាក់ថា បន្ទាប់ពីរៀបចំ ទៅតាមលំដាប់លំដោយ នៃពិធីបុណ្យវិសាខបូជាហើយ កម្មវិធីចុងក្រោយគឺជាការប្រកាស ការឆ្លងចូលឆ្នាំពុទ្ធសករាជថ្មី ដែលនៅឆ្នាំ២០២០នេះ គឺត្រូវនឹងឆ្នាំជូត ទោស័ក ព.ស២៥៦៣ ឈានចូលព.ស២៥៦៤។
អត្ថបទ និង រូបថត ៖ យូ វង្ស និងបូ សាវី
កែសម្រួលអត្ថបទ ៖ សេង ផល្លី
