នៅថ្ងៃទី០៨ ខែឧសភា ឆ្នាំ២០២០នេះ ក្រុមការងារវេទិកាសម្ព័ន្ធសង្គមស៊ីវិល និងអង្គការសង្គ្រោះមេឃពណ៌ខៀវ នៃសាធារណរដ្ឋប្រជាមានិតចិន បានធ្វើការបាញ់ថ្នាំសម្លាប់មេរោគ នៅតាមទីប្រជុំជន និងទីតាំងសំខាន់ៗមួយចំនួន ក្នុងក្រុងសៀមរាប ជាពិសេសផ្ដោតទៅលើការបង្ការ ទប់ស្កាត់ជំងឺកូវីដ១៩។
បន្ទាប់ពីជំនួបរវាងរដ្ឋបាលខេត្តសៀមរាប ជាមួយក្រុមការងារភាគីចិន កាលពីថ្ងៃទី០៧ ខែឧសភា ឆ្នាំ២០២០ម្សិលមិញ រដ្ឋបាលខេត្តបានណែនាំ ដល់អាជ្ញាធរក្រុង មន្ទីរសុខាភិបាលខេត្ត កងកម្លាំង នៃស្នងការដ្ឋាននគរបាលខេត្ត ធ្វើការសម្របសម្រួល ជាមួយម្ចាស់ទីតាំងឯកជន ក៏ដូចជាណែនាំដល់ប្រជាពលរដ្ឋទូទៅ កុំមានការភ្ញាក់ផ្អើល ក្នុងយុទ្ធនាការនេះ។ ការបាញ់ថ្នាំសម្លាប់មេរោគនេះដែរ គឺដើម្បីសម្លាប់មេរោគនៅតាមទីតាំងសំខាន់ៗ ជាពិសេសទីតាំងដែលធ្លាប់ដាក់ប្រជាពលរដ្ឋទើបមកពីបរទេស និងសង្ស័យថា អាចមានផ្ទុកមេរោគកូវីដ១៩ ដូចជានៅមន្ទីរពេទ្យបង្អែកខេត្ត និងសាលាគរុកោសល្យ និងវិក្រឹត្យការខេត្តជាដើម។
តាមការបង្ហាញពី ក្រុមការងារបាញ់ថ្នាំសម្លាប់មេរោគ របស់ភាគីចិននេះដែរ មុនមកដល់ខេត្តសៀមរាប ពួកគេបានធ្វើការបាញ់ថ្នាំសម្លាប់មេរោគ នៅខេត្តតាកែវ រាជធានីភ្នំពេញ ខេត្តព្រះសីហនុ ខេត្តកណ្ដាល ខេត្តកំពង់ឆ្នាំង បន្ទាប់ពីបញ្ចប់ការងារនៅខេត្តសៀមរាប ពួកគេនឹងបន្តទៅ ខេត្តព្រះវិហារ ខេត្តកំពង់ធំ ខេត្តកំពង់ចាម និងខេត្តត្បូងឃ្មុំ។
ព័ត៌មានជាតិ ថ្មីៗ
លោក ពិន ប្រាកដ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប បានថ្លែងអំណរគុណចំពោះដល់វេទិកាសម្ព័ន្ធសង្គមស៊ីវិល និងអង្គការសង្គ្រោះមេឃពណ៌ខៀវ នៃសធារណរដ្ឋប្រជាមានិតចិន ដែលបានចំណាយពេលវេលាដ៏មានតម្លៃ ចូលរួមជួយយុទ្ធនាការការពារ បង្ការ ទប់ស្កាត់ការរីករាលដាននៃជំងឺកូវីដ១៩នៅកម្ពុជា ក៏ដួចជានៅក្នុងខេត្តសៀមរាប ដើម្បីចូលរួមលើកកម្ពស់សុខុមាលភាពរបស់ប្រជាពលរដ្ឋកម្ពុជា។
គួររំលឹកថា ឯកឧត្តមវេជ្ជបណ្ឌិត ម៉ម ប៊ុនហេង រួមនិងមន្ត្រីជាន់ខ្ពស់ នៃក្រសួងសុខាភិបាល តែងតែបានបង្ហាញនូវការព្រួយបារម្ភ ចំពោះប្រជាពលរដ្ឋ ដែលបានខ្វះការប្រុងប្រយ័ត្ន ក្នុងការបង្ការទប់ស្កាត់នៃជំងឺកូវីដ១៩ ខណៈកម្ពុជាពុំមានរកឃើញអ្នកឆ្លងមេរោគកូវីដ១៩បន្ត ប៉ុន្តែនៅលើពិភពលោកមេរោគនេះ នៅតែបន្តគម្រាមគំហែងជីវិតមនុស្សនៅឡើយ។ ដូច្នេះ សូមបន្តគោរពតាមការណែនាំរបស់ក្រសួងសុខាភិបាល ដោយកាត់បន្ថយការជួបជុំពិធីសាសនា ឬពិធីដែលមានមនុស្សកុះករ លាងសម្អាតដៃនឹងអាកុល សាប៊ូ ប្រើម៉ាស ឬក្រមានៅពេលចូលក្នុងតំបន់មានមនុស្សអ៊ូរអរ ។ល។៕
អត្ធបទ និង រូបភាព៖ សេង ផល្លី
