ចាប់តាំងពីថ្ងៃទី១៦ ខែមីនាឆ្នាំ២០២០ រហូតមកដល់ ថ្ងៃទី១២ ខែឧសភា ឆ្នាំ២០២០ ក្រុមការងារជួសជុលប្រាសាទកណ្តាលស្រះស្រង់ នៅតែបន្តការជួសជុលនិងកំណាយស្រាវជ្រាវយ៉ាងយកចិត្តទុក្ខដាក់ ក្នុងនោះក្រុមបុរាណវិទូបានរកឃើញវត្ថុបុរាណជាច្រើនប្រភេទ សម្រាប់ធ្វើការស្រាវជ្រាវ ក្នុងចំណោមវត្ថុបុរាណទាំងនោះ គ្រាប់ខ្វាតពណ៌ស ពុំមែនជាវត្ថុគ្រាប់ពេជ្រ ឬវត្ថុមានតម្លៃដូចការលើកឡើងរបស់ប្រជាពលរដ្ឋឡើយ នេះបើតាមការអះអាងពីក្រុមអ្នកជំនាញអាជ្ញាធរជាតិអប្សរា។
លោកបណ្ឌិត អ៊ា ដារិទ្ធិ អនុប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ និងជាប្រធានការដ្ឋានជួសជុលប្រាសាទកណ្តាលស្រះស្រង់ បង្ហាញថា ការដ្ឋានជួសជុលនេះ នឹងត្រូវបញ្ចប់ក្នុងរយៈពេល៨ខែ ឬនៅចុងឆ្នាំ២០២០នេះ។ ចំពោះការប្រទះឃើញវត្ថុបុរាណជាច្រើនប្រភេទ បានកប់នៅគ្រឹះប្រាសាទកណ្ដាលស្រះស្រង់នេះ អាជ្ញាធរជាតិអប្សរានឹងយកទៅរក្សាទុក នៅកន្លែងដែលមានសុវត្ថិភាពបំផុត ដោយរង់ចាំអ្នកជំនាញ សិក្សាស្រាវជ្រាវបន្ថែម អំពីអត្ដន័យនៃវត្ថុបុរាណទាំងនោះ។
គួរជម្រាបថា ប្រាសាទកណ្តាលស្រះស្រង់ បានកសាងក្នុងរាជ្យព្រះបាទជ័យវរ្មទី៧ នាស.វ. ទី១០ ចន្លោះឆ្នាំ១០៨១ទៅ១១២០ ឧទ្ទិសចំពោះព្រះពុទ្ធសាសនា ដែលមានទីតាំងនៅមុខប្រាសាទបន្ទាយក្តី និងសម្រាប់ជាទីកន្លែងរក្សាទឹកដ៏ពិសិដ្ឋ ហើយក៏មានសិលាចារឹក បានបញ្ជាក់ពីការដាក់បណ្តាសាដល់ជនណា ដែលបានធ្វើឱ្យទឹកនៅទីនេះ ភាពកខ្វក់ផងដែរ៕
អត្ថបទ និង រូបភាព៖ បូ សាវី
កែសម្រួលអត្ថបទ ៖ សេង ផល្លី
