ក្រុមការងារ នៃគម្រោងជួសជុលកែលម្អថ្មីឡើងវិញ ចំណតយានយន្តផ្សារលើធំថ្មី ក្នុងក្រុងសៀមរាប នឹងចាប់ផ្ដើមការដ្ឋានជួសជុលកែលម្អចំណតយានយន្តខាងមុខផ្សារ ដើម្បីដំណោះស្រាយការកកស្ទះចរាចរណ៍ សណ្តាប់ធ្នាប់ និងសោភណ្ឌភាពក្នុងក្រុង នេះបើតាមប្រសាសន៍លោក ពិន ប្រាកដ អភិបាលរងខេត្តសៀមរាប នាព្រឹកថ្ងៃទី១៤ ខែឧសភា ឆ្នាំ២០២០នេះ ។
លោកអភិបាលរងខេត្ត បញ្ជាក់ថា នៅព្រឹកនេះ សមាសភាពនៃក្រុមការងារជំនាញពាក់ព័ន្ធ បានចុះមកពិនិត្យដល់ទីតាំង ដើម្បីដោះស្រាយបញ្ហានានា ជាពិសេសបញ្ជៀការកកស្ទះចរាចរណ៍ និងមិនឲ្យមានផលប៉ះពាល់ដល់ ការលក់ដូរប្រចាំថ្ងៃរបស់អាជីវករ អំឡុងពេលបើកការដ្ឋានឡើយ។
គម្រោងជួសជុលកែលម្អថ្មីឡើងវិញ ចំណតយានយន្តផ្សារលើធំថ្មី នឹងប្រើប្រាស់ថវិការបស់រដ្ឋបាលខេត្ត និងអនុវត្តដោយអាជ្ញាធរក្រុង ក្នុងនោះមន្ទីរសាធារណការ និងដឹកជញ្ជូន ជាសេនាធិការ លើការងារបញ្ចេញគម្រូប្លង់មេ។
ព័ត៌មានជាតិ ថ្មីៗ
លោក នួន ពុទ្ធារ៉ា អភិបាលក្រុងសៀមរាប បង្ហាញថា គម្រោងនេះ ជាការឆ្លើយតប ទៅនឹងការវិវត្តរីកចម្រើននៃខេត្តទេសចរណ៍ វប្បធម៌ ប្រវត្តិសាស្រ្ត-អង្គរ ដែលកំពុងមានកំណើននៃការប្រើប្រាស់យានយន្ត។ ដូច្នេះហើយទើប បញ្ហាសណ្តាប់ធា្នប់សាធារណៈ របៀបរៀបរយសង្គម ចរាចរណ៍ បរិស្ថាន និងសោភណ្ឌភាព ត្រូវស្ថិតនៅក្នុងកម្មវត្ថុ នៃការអភិវឌ្ឍ ស្របតាមនិន្នាការនៃការរីកចម្រើននេះ ។
យ៉ាងណាក៏ដោយ តាមការពិនិត្យស្ថានភាពជាក់ស្តែង នៃទីតាំង ដែលគ្រោងនឹងបើកការដ្ឋានជួសជុលកែលម្អចំណតយានយន្តនេះ អាចនឹងតម្រូវឲ្យមានការកែសម្រួលខ្លះៗនៅលើគំរូប្លង់មេ ដែលមិនត្រឹមតែធ្វើឲ្យចំណតយានយន្តអាចដំណើរការប្រកបដោយបទដ្ឋានបច្ចេកទេសនោះទេ តែផ្លូវភ្លោះមុខផ្សាលើធំថ្មី អាចនឹងមានភាពធំទូលាយជាងមុន។
អត្ថបទ និង រូបថត ៖ ងិន គឹមឡេង
កែសម្រួលអត្ថបទ ៖ សេង ផល្លី
