កាលពីថ្ងៃទី១៨ខែឧសភាឆ្នាំ២០២០មន្ដ្រីជាន់ខ្ពស់អាជ្ញាធរជាតិអប្សរា បានឱ្យដឹងថា ដើម្បីធ្វើឱ្យនៅបរិវេណមុខប្រាសាទអង្គរវត្តមានសោភ័ណ្ឌភាពស្អាត និងមានសណ្តាប់ធ្នាប់របៀបរៀបរយល្អ អាជ្ញាធរជាតិអប្សរាបានកំពុងតែមមាញឹកក្នុងការកែលំម្អនៅតំបន់នេះ ទាំងហេដ្ឋរចនាសម្ព័ន្ធ ភាពបៃតង ចំណតរថយន្ត និងមជ្ឍមណ្ឌលបដិសណ្ឋាកិច្ច ដែលការងារទាំងនេះ តាមផែនការគ្រោងឱ្យរួចរាល់នៅចុងឆ្នាំ២០២០។
លោក ឡុង កុសល អ្នកនាំពាក្យអាជ្ញាធរជាតិអប្សរា មានប្រសាសន៍បន្ថែមថា ការទៅទស្សនាអង្គរភ្ញៀវទេសចរណ៍ត្រូវយករថយន្ដទៅចតនៅចំណតរថយន្តនៅបរិវេណមុខអង្គរ ដោយមិនគិតប្រាក់ ដែលអាជ្ញាធរជាតិអប្សរាបានរៀបចំរួចរាល់ហើយ ដោយបានកំណត់ឱ្យរថយន្តចូលចតតាមប្រភេទផងដែរ។លោកបានបន្ដថា ចំណតនោះបានបែងចែកតាមរថយន្តតូចតាមកន្លែងរថយន្តតូច ធំតាមធំ និងរ៉ឺម៉កនិងម៉ូតូតាមកន្លែងម៉ូតូ។ លោកថា ការដែលកំណត់បែបនេះ គឺចង់ឱ្យនៅក្នុងចំណត់ដែលទើបរៀបចំរួចនេះ មានសណ្តាប់ធ្នាប់របៀបរៀបរយល្អ ជាពិសេសនៅពេលមេរោគកូវិដ-១៩នៅលើពិភពលោកស្ងប់ស្ងាត់ អ្នកទេសចរចាប់មកលេងអង្គរមុនគេ និងឃើញអ្វីៗនៅមុខបរិវេណប្រាសាទអង្គរប្លែកនិងចាប់អារម្មណ៍ជាងមុន។
លោក ឡុង កុសល បានអំពាវនាវឱ្យប្រជាពលរដ្ឋដែលទៅទស្សនាអង្គរយករថយន្តទៅចតនៅចំណតដែលអាជ្ញាធរបានរៀបចំរួចដោយឥគិតថ្លៃទៅតាមលំដាប់លំដោយ តាមស្លាកសញ្ញាដែលអាជ្ញាធរជាតិអប្សរាបានរៀបចំរួច ឱ្យមានរៀប សូមកុំទៅចតតាមចញ្ចឹមផ្លូវផ្តេសផ្តាសដែលធ្វើឱ្យមានភាពរញ៉េរញ៉ៃ ប៉ះពាល់សណ្តាប់ធ្នាប់៕
អត្ថបទ និង រូបថត ៖ ឈិ សាវី
