នៅម៉ោងប្រមាណ៦ព្រឹក ព្រឹកថ្ងៃទី២១ ខែ ឧសភា ឆ្នាំ២០២០ មានករណីគ្រោះថ្នាក់ចរាចរណ៍មួយកើតឡើង រវាង ម៉ូតូ និងម៉ូតូ នៅកំណាត់ផ្លូវជាតិលេខ៦ ចំណុចផ្លូវចូលវត្តប្រាសាទឥន្ទ្រា ហៅវត្តគោកប៉ាទ្រី ស្ថិតក្នុងភូមិគ្រួស សង្កាត់ស្វាយដង្គុំ ក្រុងខេត្តសៀមរាប បណ្តាលអ្នកបើកបរ និងរួមដំណើរ រងរបួសចំនួន៤នាក់ ក្នុងនោះ ប្ដីប្រពន្ធជាកម្មករសំណង់ ០២នាក់រងរបួសធ្ងន់។
តាមសម្ដីរបស់ អ្នកដែលបានឃើញហេតុកាណ៍នោះ បានឲ្យដឹងថា ម៉ូតូទាំងពីរជិះស្របទិសគ្នា ពីទិសខាងលិចទៅកើត ចូលក្រុងសៀមរាប។ លុះដល់ចំណុចកើតហេតុ ម៉ូតូប្ដីប្រពន្ធទាំង២ បានបើកភ្លើងសញ្ញាបត់ឆ្វេង ខណៈម៉ូតូទាំងពីរកំពុងមានល្បឿនលឿន ទើបបណ្ដាលឲ្យម៉ូតូមួយគ្រឿងទៀតនៅខាងក្រោយ គ្រប់គ្រងល្បឿនមិនបាន។
ករណីនេះ សមត្ថកិច្ចចរាចរណ៍ នៅមិនទាន់អាចសន្និដ្ឋានបានថា ភាគីណាមួយ ជាអ្នកបង្កគ្រោះថ្នាក់នៅឡើយទេ ដោយសារ ម្ចាស់ម៉ូតូជាប្ដីប្រពន្ធរងរបួសធ្ងន់ ក្នុងនោះ បុរសជាប្តី បានបាក់ជើងឆ្វេង ត្រង់កំភូនជើង រីឯស្រ្តីជាប្រពន្ធបានសន្លប់។ ដោយឡែក ម្ចាស់ម៉ូតូមួយគ្រឿងទៀត មានគ្នាពីរនាក់ បានរងរបួសស្រាល ជាមួយនោះ សមត្ថកិច្ចក៏បានធ្វើការសាកសួរ និងឃាត់ម៉ូតូទុក ដើម្បីរងចាំការដោះស្រាយនៅពេលក្រោយ។
ព័ត៌មានជាតិ ថ្មីៗ
តាមសម្ដីប្រជាពលរដ្ឋ បានលើកឡើងថា ជារៀងរាល់ព្រឹក មានប្រជាពលរដ្ឋនៅតាមបណ្ដាស្រុកក្បែរក្រុងសៀមរាប ជាច្រើន បានបើកបរម៉ូតូមានល្បឿនលឿន ចូលមកធ្វើការនៅក្នុងក្រុងសៀមរាប ដែលភាគច្រើនពួកគេ ប្រហែលជាកម្មករសំណង់។ ជាមួយនោះ ពួកគេបានបើកបរវារជែង ដោយមិនគោរពសិទ្ធអាទិភាព នៅលើដងផ្លូវឡើយ ករណីទាំងនេះ តែងតែបានបង្កឲ្យមានគ្រោះថ្នាក់ជារឿយៗ។
ប្ដីប្រពន្ធ២នាក់របួសធ្ងន់ ក្នុងគ្រោះថ្នាក់ចរាចរណ៍ ខណៈធ្វើដំណើរទៅការការ
ប្ដីប្រពន្ធ២នាក់របួសធ្ងន់ ក្នុងគ្រោះថ្នាក់ចរាចរណ៍ ខណៈធ្វើដំណើរទៅធ្វើការសំណង់ក្នុងក្រុងសៀមរាប#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Thursday, May 21, 2020
អត្ថបទ និង រូបថត ៖ ម៉ី សុខារិទ្ធ និងគឿន វេត
កែសម្រួលអត្ថបទ ៖ សេង ផល្លី
