អាជ្ញាធរខេត្តសៀមរាប បាននិងកំពុងស្រាវជ្រាវតាមចាប់មេខ្យល់ ដែលអូសទាញប្រជាពលរដ្ឋខ្មែរ ទៅធ្វើការនៅបរទេស ខណៈពិភពលោកនៅតែមានករណីឆ្លងជំងឺកូវីដ១៩គួរឲ្យព្រួយបារម្ភ នេះបើតាមការលើកឡើងរបស់លោកលោក នាក់ ណេរ៉ុន អភិបាលរងខេត្តសៀមរាប ក្នុងឱកាសចុះជួបសំណេះសំណាលជាមួយប្រជាពលរដ្ឋ មកពីបរទេស និងបានស្ម័គ្រចិត្តរស់នៅដាច់ដោយឡែករយៈពេល១៤ថ្ងៃ ៣៦នាក់ ស្ថិតក្នុង ស្រុកពួក និងស្រុកស្រីស្នំ ខេត្តសៀមរាប នៅថ្ងៃទី២៥ខែឧសភាឆ្នាំ២០២០ ។
លោកអភិបាលរងខេត្ត បញ្ជាក់ថា ទោះបីស្ថានភាពប្រទេសកម្ពុជាមានការថមថយនូវជំងឺកូវីដ១៩ក៏ដោយ ក៏រាជរដ្ឋាភិបាលកម្ពុជា នៅតែពង្រឹងវិធានការ ទប់ស្កាត់កុំឱ្យរលកទី២ កើតឡើងនៅក្នុងប្រទេសម្ដងទៀត។ ជាមួយនោះ ស្ថានភាពរបស់ប្រទេសជិតខាង ក៏មិនទាន់ធានាថាមានភាពធូរស្រាលនៅឡើយទេ ខណៈព្រំដែននៅបន្តបិទ មួយវិញទៀត ការទៅធ្វើការខុសច្បាប់ តាមការអូសទាញរបស់មេខ្យល់ វាប្រឈមទៅនឹងការចាប់បញ្ជូនមកវិញផងដែរ។
លោកអភិបាលរងខេត្ត បានថ្លែងកោតសរសើរ ដល់ប្រជាពលរដ្ឋ ទើបមកពីបរទេស បានស្ម័គ្រចិត្តរស់នៅដាច់ដោយឡែករយៈពេល១៤ថ្ងៃ ហើយការដាក់ឲ្យនៅដោយឡែករយៈពេល១៤ថ្ងៃនេះ មិនមែនជាការរើសអើងនោះឡើយ តែដើម្បីទប់ស្កាត់ការចម្លងជំងឺដ៏កាចសាហាវនេះ ឆ្លងទៅដល់បងប្អូន ម្ដាយឪពុក និងក្នុងសហគមន៍ទាំងមូល។
ព័ត៌មានជាតិ ថ្មីៗ
ផ្អែកតាមរបាយការណ៍របស់អនុគណៈកម្មការប្រយុទ្ធនឹងជំងឺកូវីដ-១៩ បង្ហាញថា៖ចាប់ពីថ្ងៃទី១០ ខែមីនា ដល់ទី២៤ ខែឧសភា ឆ្នាំ២០២០ ស្រុកពួកមានប្រជាពលរដ្ឋចំណូលស្រុកសរុប២,៤០៤នាក់ ក្នុងនោះស្រី១,០៤៤នាក់ និងស្រុកស្រីស្នំ សរុបចំនួន១,៦២៥នាក់ ក្នុងនោះស្រី ៦៨៤នាក់។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
