កាលពីព្រឹកថ្ងៃទី១១ ខែ ធ្នូ ឆ្នាំ២០១៨នេះ ក្រុមប្រឹក្សាខេត្តសៀមរាប បានបើកកិច្ចប្រជុំសាមញ្ញលើកទី៥៥ របស់ខ្លួននៅសាលប្រជុំសាលាខេត្តសៀមរាប ដោយមានរបៀបវារៈសំខាន់ៗមួយចំនួន ក្រោមអធិបតីភាពឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និង លោក លី សំរិទ្ធ អភិបាលរងខេត្ត និងជាតំណាងឯកឧត្ដមអភិបាលខេត្តសៀមរាប ដោយមានការចូលរួមពីសំណាក់ឯកឧត្ដម លោកជំទាវសមាជិកក្រុមប្រឹក្សាខេត្ត និង លោក លោកស្រីជាប្រធាន អនុប្រធានមន្ទីរ អង្គភាពនានាក្នុងខេត្ត អភិបាលនិងប្រធានក្រុមប្រឹក្សាក្រុងស្រុក ព្រមទាំងចៅសង្កាត់ទាំង១២ក្នុងក្រុងសៀមរាប ។
ក្រៅពីរបៀបវារៈដែលបានគ្រោងទុកឯកឧត្ដមសមាជិកក្រុមប្រឹក្សាខេត្ត បានមានមតិលើកឡើងសុំឲ្យអាជ្ញាធរខេត្ត និង អង្គភាពពាក់ព័ន្ធ ឆ្លើយបំភ្លឺនូវបញ្ហាមួយចំនួនក្នុងក្រុងសៀមរាប រួមមានបញ្ហាសំរាម , បញ្ហាផ្លូវថ្នល់ដែលខូចខាតមិនទាន់ឃើញធ្វើការជួសជុលឡើងវិញ និង បញ្ហានៃការរំលោភយកដីចំណីផ្លូវសាធារណៈធ្វើជាកម្មសិទ្ធិផ្ទាល់ខ្លួន ។
ពាក់ព័ន្ធនឹងបញ្ហានេះ លោក លី សំរិទ្ធ អភិបាលរងខេត្ត បានបកស្រាយបំភ្លឺជូនអង្គប្រជុំ ចំពោះបញ្ហាដែលបានលើកឡើង ដូចជាបញ្ហាការរំលោភដីចំណីផ្លូវ ដែលករណីនេះ អាជ្ញាធរខេត្ត បានចាត់វិធានការឱ្យ អាជ្ញាធរក្រុង អនុវត្តចំពោះសំណង់អាណាធិបតេយ្យ ដែលបានយកដីចំណីផ្លូវ និង ដី របស់រដ្ឋធ្វើជាកម្មសិទ្ធិផ្ទាល់ខ្លួន ដែលធ្វើឲ្យមានផលប៉ះ ពាល់ដល់ផលប្រយោជន៍សាធារណៈ និង ការជួសជុលផ្លូវថ្នល់ដែលខូចខាតនឹងចាប់ផ្ដើមនៅដើមឆ្នាំ២០១៩នេះ ។
ក្នុងឱកាសនោះដែរ លោក លី សំរិទ្ឋ បានសំណូមពរ ឲ្យកម្លាំងមានសមត្ថកិច្ច និងមន្ត្រីមន្ទីរជំនាញ ត្រូវសហការគ្នា ត្រួតពិនិត្យឡើងវិញ រាល់ការធ្វើចរាចរណ៍របស់រថយន្តធំៗ និងត្រួតពិនិត្យចំពោះអ្នក បើកបររថយន្តទាំងនោះ ខ្លាចក្រែងមានសារធាតុញៀនក្នុងខ្លួន ព្រោះឥរិយាបទនៃបើកបររបស់ពួកគាត់មួយចំនួន ហាក់ដូចជាមិនប្រក្រតី ការដឹកជញ្ជូនដីធ្លាក់តាមដងផ្លូវ និង ធ្វើឲ្យខូចផ្លូវ បាត់នូវសោភណ្ឌភាពក្រុង ។
មានមតិបូកសរុបបិទអង្គប្រជុំ ឯកឧត្តម អ៊ឹង ហឿន បានក្រើនរំលឹក និង ជំរុញឲ្យថ្នាក់ដឹកនាំខេត្ត មន្ទីរ អង្គភាព ក្រុង ស្រុក សំដៅឆ្ពោះទៅរកមូលដ្ឋាន បម្រើប្រជាពលរដ្ឋឲ្យបានកាន់តែល្អប្រសើរថែមទៀត ធ្វើការកែលម្អភាពអសកម្ម នានា និង ដោះស្រាយបញ្ហាប្រឈមដែលនៅសេសសល់ ជាពិសេសចំពោះអ្នកដែលសាងសង់រំលោភយកដីចំណីផ្លូវរបស់រដ្ឋ ធ្វើជាកម្មសិទ្ធិរបស់ខ្លួន សូមឲ្យអាជ្ញាធរខេត្ត អាជ្ញាធរក្រុងនិងសមត្ថកិច្ចនគរបាល អង្គភាពមន្ទីរពាក់ព័ន្ឋនានា ត្រូវសហការគ្នាឈរលើវិធានការច្បាប់ឱ្យបានម៉ឺងម៉ាត់ ប្រកបដោយតម្លាភាពនិងយុត្តិធម៌ ពញរមទាំងបន្តយកចិត្តទុកដាក់ខ្ពស់ត្រួតពិនិត្យចំពោះអ្នកបើកបររថយន្តធុនធ្ងន់ ដូចជា រថយន្តក្រុង រថយន្តដឹកដី និង កុងទឺន័រ ធ្វើការត្រួតពិនិត្យរកសារធាតុញៀន ដើម្បីកាត់បន្ថយការកកស្ទះចរាចរណ៍ និង គ្រោះថ្នាក់ចរាចរណ៍ជាយថាហេតុ ដោយសារតែអ្នកបើកបររថយន្តធំៗទាំងនោះខ្វះការប្រុងប្រយ័ត្ន ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
