ព្រឹកថ្ងៃទី ២៨ ខែ ឧសភា ឆ្នាំ២០២០នេះ ក្រុមការងារសាខាកាកបាទក្រហមកម្ពុជាខេត្តសៀមរាប ដឹកនាំដោយ លោកជំទាវ មាស សន អនុប្រធានកិត្តិយសគណៈកម្មាធិការសាខា បានចុះសួរសុខទុក្ខ និងនាំយកអំណោយសប្បរសធម៌ ចែកជូនប្រជាពលរដ្ឋរងគ្រោះដោយខ្យល់កន្ត្រាក់ ចំនួន១៥គ្រួសារ មកពីឃុំ កណ្តែត ស្រុកប្រាសាទបាគង ខេត្តសៀមរាប។
ក្នុងនាម ឯកឧត្តម ទៀ សីហា ប្រធានគណៈកម្មាធិការសាខា លោកជំទាវ បានចូលរួមសម្ដែងនូវការសោកស្ដាយ ចំពោះការខូចខាតផ្ទះសំបែង ទ្រព្យសម្បត្តិ ក្នុងគ្រោះធម្មជាតិនេះ។ ទន្ទឹមនោះ លោកជំទាវ ក៏បានបង្ហាញពីការ យកចិត្តទុកដាក់ខ្ពស់ ចំពោះទុក្ខលំបាករបស់ប្រជាពលរដ្ឋ ពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរ ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។
ឆ្លៀតក្នុងឱកាសនោះ លោកជំទាវក៏បានណែនាំដល់ ប្រជាពលរដ្ឋទាំងអស់ត្រូវ មានការប្រុងប្រយ័ត្នខ្ពស់ ក្នុងការបង្ការ ទប់ស្កាត់ ជម្ងឺកូវិដ១៩ នៅកម្ពុជា ជាពិសេសគោរពតាមការណែនាំរបស់របស់រាជរដ្ឋាភិបាល ក្រសួងសុខាភិបាល ព្រមទាំងកាត់បន្ថយនូវការជួបជុំ ប្រមូលផ្តុំគ្នា។
លោកជំទាវ ក៏បានក្រើនរំលឹក ដល់ប្រជាកសិករទាំងអស់ ត្រូវត្រៀម លក្ខណៈសម្ភារៈកសិកម្ម ដើមី្បបង្កបង្កើនផលឲ្យបានទាន់រដូវធ្វើស្រែ ចំការ ។ ម៉្យាងទៀតក៏ត្រូវមានការប្រុងប្រយ័ត្ន នៅពេលភ្លៀង ខ្យល់ ផ្គររន្ទះ កុំប្រើប្រាស់នូវគ្រឿងអេឡិចត្រូនិច ដូចជាទូរស័ព្ទ ជាដើម ដែលអាចបង្កឲ្យមានគ្រោះថ្នាក់ដល់ជីវិត។
អំណោយមនុស្សធម៌ ដែលបានចែកជូននាពេលនោះ ក្នុងមួយគ្រួសារទទួលបាន អង្ករ ៣០គ.ក , មី១កេស ,ត្រីខ១យូរ , កន្ទេល ១ , ឃីត១កញ្ចប់ ,អាវយឺត២ ចំពោះគ្រួសារផ្ទះរលំ បន្ថែមនូវ ស័ង្កសី ១៦សន្លឹក ថវិកា ២០ម៉ឺនរៀល និង គ្រួសារផ្ទះរបើក ដំបូល បន្ថែមនូវស័ង្កសី ១០សន្លឹក និងថវិកា ១០ម៉ឺនរៀល៕
អត្ថបទ និងរូបភាព៖ ម៉ី សុខារិទ្ធ
កែសម្រួលអត្ថបទ៖ សេង ផល្លី
