កាលពីថ្ងៃទី៣១ ខែឧសភា ឆ្នាំ២០២០ម្សិលមិញនេះ លោក ង៉ាន់ ភិរុណ អភិបាលរងខេត្ត និងជាប្រធានក្រុមការងារថ្នាក់កណ្តាលចុះជួយស្រុកបន្ទាយស្រី និង លោក សោម សុគន្ធ អនុប្រធានក្រុមការងារថ្នាក់កណ្តាលចុះជួយស្រុក ជាប្រធានក្រុមការងារចុះជួយឃុំរំចេក អមដំណើរដោយលោក លោកស្រីសមាជិក សមាជិកា ក្រុមការងារថ្នាក់កណ្តាលចុះជួយស្រុក និង ឃុំ បាននាំយកអំណោយរបស់ក្រុមការងារថ្នាក់កណ្ដាលចុះជួយស្រុកបន្ទាយស្រី ជាគ្រឿងឧបភោគបរិភោគ ជូនដល់បងប្អូនប្រជាពលរដ្ឋក្រីក្រចំនួន៤៦១គ្រួសារ ស្ថិតនៅឃុំឃុនរាម និងឃុំរំចេក នៃស្រុកបន្ទាយស្រី ដែលក្នុងមួយគ្រួសារទទួលបានអង្ករ ១០គីឡូក្រាម , ទឹកត្រី ០១យួរ និងទឹកស៊ីអ៊ីវចំនួន ០១យួរ ។
មានប្រសាសន៍សំណេះសំណាលនាឱកាសនោះ លោក ង៉ាន់ ភិរុណ អភិបាលរងខេត្ត បានបញ្ជាក់ថា ប្រទេសកម្ពុជា ក្រោមការដឹកនាំដ៏ឈ្លាសវៃនិងប៉ិនប្រសព្វរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងក្រោមគោលនយោបាយឈ្នះ ឈ្នះ របស់សម្តេចតេជោ បាននាំមកនូវការផ្សះផ្សាជាតិ បង្រួបបង្រួបជាតិក្រោមដំបូលសន្តិភាពតែមួយ និងអភិវឌ្ឍន៍ប្រទេសជាតិឈានទៅរកការរីកចម្រើនលូតលាស់ឥតឈប់ឈរលើគ្រប់វិស័យរហូតមកដល់សព្វថ្ងៃនេះ ហើយអ្វីៗដែលបាននឹងកំពុងរីកចំរើនជឿនលឿនទៅមុខឥតឈប់ឈរនេះ គឺអាស្រ័យដោយប្រទេសជាតិមានសុខសន្តិភាពពិតប្រាកដ ហេតុនេះ សូមបងប្អូនប្រជាពលរដ្ឋទាំងអស់ គួរមើលឱ្យឃើញពីតួនាទីនិងសារៈសំខាន់នៃសន្តិភាព និង ត្រូវចេះការពារសន្តិភាព ពីព្រោះ សន្តិភាពរកបានដោយលំបាក ដូច្នេះយើងត្រូវរួមគ្នារក្សាសន្តិភាពនេះឱ្យស្ថិតស្ថេរគង់វង្ស ។
លោក ង៉ាន់ ភិរុណ បានបញ្ជាក់បន្ថែមថា លើសពីនេះទៀត សម្តេចតេជោ តែងតែគិតគូរពីសុខទុក្ខបងប្អូនប្រជាពលរដ្ឋគ្រប់ទីកន្លែង និងគ្រប់ពេលវេលា ដោយមិនទុកឱ្យបងប្អូនប្រជាពលរដ្ឋណាម្នាក់ខ្វះខាតស្បៀងអាហារឡើយ ហេតុនេះ ក្នុងអំឡុងពេលយើងកំពុងជួបប្រទះនឹងការឆ្លងនៃជំងឺកូវីដ១៩ ប្រសិនបើគ្រួសារបងប្អូនណាជួបបញ្ហាលំបាកដោយខ្វះខាតស្បៀងក្នុងជីវភាពប្រចាំ សូមរាយការណ៍ទៅអាជ្ញាធរមូលដ្ឋាន ដើម្បីសម្រួលនិងដោះស្រាយជូនបងប្អូនឱ្យបានទាន់ពេលវេលា ដូច្នេះ ដើម្បីរួមចំណែកជាមួយរាជរដ្ឋាភិបាល ក្នុងការបង្ការ ការការពារ និងការទប់ស្កាត់ការឆ្លងរាលដាលជំងឺកូវី១៩ ចូលក្នុងសហគមន៍ សូមបងប្អូនទាំងអស់អនុវត្តតាមការណែនាំរបស់ក្រសួងសុខាភិបាល ជាពិសេសយើងម្នាក់ៗត្រូវការពារខ្លួនដោយខ្លួនឯង គឺត្រូវលាងដៃឲ្យបានញឹកញាប់ជាមួយសាប៊ូ ឬទឹកអាល់កុល ឬជែលលាងដៃ , រក្សាគម្លាតសុវត្ថិភាពសង្គម ចម្ងាយយ៉ាងតិចឱ្យបាន១ ម៉ែត្រ , ខ្ទប់មាត់និងច្រមុះនៅពេលក្អក ឬកណ្តាស់ ដោយកន្សែង ក្រម៉ា ប្រើកែងដៃ ឬក្រដាស ហើយត្រូវចោលក្រដាសភ្លាមក្នុងធុងសំរាម ហើយប្រសិនបើមានរោគសញ្ញាណាមួយដូចជា គ្រុនក្តៅ , ក្អក ឬ ពិបាកដកដង្ហើម សូមប្រញ៉ាប់ទៅមណ្ឌលសុខភាពដែលនៅជិត ដើម្បីត្រួតពិនិត្យសុខភាព ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
