នៅព្រឹកថ្ងៃទី០១ ខែមិថុនា ឆ្នាំ២០២០នេះ លោក មាស ជូរ៉ានី ប្រធាន មន្ទីររ៉ែនិងថាមពលខេត្តសៀមរាប បាននាំយកថវិការបស់ថ្នាក់ដឹកនាំនិងមន្ត្រីរាជការក្នុងអង្គភាពរបស់ខ្លួន ក្នុងនោះប្រាក់រៀលចំនួន ៨,៥៣០,០០០រៀល និង ប្រាក់ដុល្លារអាមេរិកចំនួន ៥៨៥ដុល្លារ ជូនដល់សាខាកាកបាទក្រហមកម្ពុជាខេត្តសៀមរាប នៅទីស្នាក់ការរបស់សាខា ក្នុងឱកាសខួបលើកទី១៥៧ ទិវាពិភពលោកកាកបាទក្រហម អឌ្ឍចន្ទក្រហម ឆ្នាំ២០២០ ។
លោក មាស ជូរ៉ានី ប្រធានមន្ទីររ៉ែ និងថាមពល ខេត្តសៀមរាប មានប្រសាសន៍ថា ថវិកាដែលមន្ទីរប្រគល់ជូនសាខាកាកបាទក្រហមកម្ពុជាខេត្តសៀមរាប នាពេលនេះ គឺជាទឹកចិត្តសប្បុរស របស់សប្បុរជនជាមន្ត្រីរាជការចំណុះមន្ទីររ៉ែ និងថាមពលខេត្តសៀមរាប ក្នុងការរួមចំណែកជាមួយសកម្មភាពមនុស្សធម៌របស់កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ហើយនេះក៏ជាវប្បធម៌នៃការចែករំលែកជួយគ្នាក្នុងគ្រលំបាក ទោះតិចក្ដីច្រើនក្ដី តែជាសទ្ធាដ៏ជ្រះថ្លារបស់យើងទាំងអស់គ្នា ។
មានប្រសាសន៍ក្នុងឱកាសនោះ លោក ស៊ុ សំអន នាយកសាខាកាកបាទក្រហមកម្ពុជាខេត្តសៀមរាប និង ជាតំណាងដ៏ខ្ពង់ខ្ពស់ឯកឧត្ដម ទៀ សីហា ប្រធានគណៈកម្មាធិការសាខា បានថ្លែងអំណរគុណយ៉ាងជ្រាលជ្រៅចំពោះទឹកចិត្ត របស់មន្ត្រីរាជការនៃមន្ទីររ៉ែ និងថាមពលខេត្តសៀមរាប ដែលបានយកចិត្តទុកដាក់ចូលរួមចំណែកក្នុងសកម្មភាពមនុស្សធម៌ គឺសបញ្ជាក់ពីទឹកចិត្តដ៏ប្បុរសធម៌ចំពោះបងប្អូនប្រជាពលរដ្ឋ រងគ្រោះ និងងាយរងគ្រោះបំផុត ហើយក្នុងកាយវិកាដ៏មនុស្សធម៌នេះ គឺជាការចូលរួមរបស់សប្បុរសជនជាមួយសកម្មភាពមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ។
ព័ត៌មានជាតិ ថ្មីៗ
លោក ស៊ុ សំអន មានប្រសាសន៍បន្ថែមថា សាខាកាកបាទក្រហមកម្ពុជាខេត្តសៀមរាប នឹងប្រើប្រាស់នូវថវិកានេះ ឱ្យចំគោលដៅមនុស្សធម៌ ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការរបស់ចលនាអន្តរជាតិកាកបាទក្រហម អឌ្ឍចន្ទក្រហម ៕
អត្ថបទ និងរូបថត ៖ សាខាកាកបាទក្រហមកម្ពុជាខេត្តសៀមរាប
កែសម្រួលអត្ថបទ ៖ លោក លីវ សាន្ត
