នៅថ្ងៃទី០៥ ខែធ្នូ នេះ អដ្ឋិធាតុ របស់ឯកឧត្តមសាស្រ្តាចារ្យវេជ្ជបណ្ឌិត ប៊ីត រិចឈ្នឺរ (Beat Richner) អតីតស្ថាបនិក និងជាអ្នកគ្រប់គ្រងមន្ទីរពេទ្យគន្ធបុប្ផា បានមកដល់ខេត្តសៀមរាប និងមានក្បួនដង្ហែរយ៉ាងឱឡារិក។
តាមការគ្រោងទុក អដ្ឋិធាតុ របស់ឯកឧត្តមសាស្រ្តាចារ្យវេជ្ជបណ្ឌិត ប៊ីត រិចឈ្នឺរ ត្រូវបានដង្ហែរដោយក្បួនកិត្តិយស រួមទាំងមានប្រជាពលរដ្ឋឈរអមសងខាងផ្លូវ រងចាំទទួលដោយក្ដីអាឡោះអាល័យ និងចងចាំដល់គុណបំណាច់មនុស្សធម៌របស់លោក ដែលបានលះបង់ដើម្បីកុមារ និងប្រជាពលរដ្ឋកម្ពុជា។
ជាមួយគ្នានោះ ក្រោមព្រះរាជាធិបតីដ៏ខ្ពង់ខ្ពស់បំផុត ព្រះករុណាជាអម្ចាស់ជីវិតតម្កល់ត្បូង ព្រះបាទសម្តេច ព្រះបរមនាថ នរោត្តម សីហមុនី និងសម្ដេចព្រះមហាក្សត្រី នរោត្តម មុនិនាថ សីហនុ ព្រះវរមាតាជាតិខ្មែរ ព្រះអង្គនឹងចូលរួមពិធីបង្សុកូល និងឧទ្ទិសកុសលផលបុណ្យ ដល់ដួងវិញាណក្ខន្ធឯកឧត្តមសាស្រ្តាចារ្យវេជ្ជបណ្ឌិតផងដែរ។
ឯកឧត្តមសាស្រ្តាចារ្យវេជ្ជបណ្ឌិត ប៊ីត រិចឈ្នឺរ កើតនៅថ្ងៃទី១៣ ខែមីនា ឆ្នាំ១៩៤៧ ជាជនជាតិ ស្វីស។ លោកបានទទួល បរិញ្ញាបត្រវេជ្ជសាស្រ្ត ក្នុងឆ្នាំ១៩៧៣ ឯកទេស ព្យាបាលជំងឺកុមារ។ លោក ត្រូវបានកាកបាទក្រហម ស្វីស បញ្ជូនមកប្រទេសកម្ពុជា នៅមន្ទីរពេទ្យ គន្ធបុប្ផា ទីក្រុងភ្នំពេញចន្លោះឆ្នាំ១៩៧៤ និងឆ្នាំ១៩៧៥។
នៅខែធ្នូ ឆ្នាំ១៩៩១ លោក រិចឈ្នឺរ បានត្រឡប់មកកម្ពុជាវិញ និងបានឃើញការបំផ្លិចបំផ្លាញ ដោយសារសង្គ្រាមស៊ីវិល។ នាពេលនោះ រដ្ឋាភិបាលកម្ពុជា បានស្នើសុំឲ្យលោកបើក និងសាងសង់មន្ទីរពេទ្យគន្ធបុប្ផា ឡើងវិញ។ បន្ទាប់ពីពេលនោះមក មូលនិធិ គន្ធបុប្ផា បានបង្កើតឡើងនៅខែមីនា ឆ្នាំ១៩៩២ ហើយមន្ទីរពេទ្យកុមារគន្ធបុប្ផា ត្រូវបានបើកទ្វារ ឡើងវិញនៅខែវិច្ឆិកា ១៩៩២។ ដោយចំនួនកុមារ មានជំងឺចេះតែកើនឡើងពីមួយឆ្នាំទៅមួយឆ្នាំ លោកវេជ្ជបណ្ឌិត ប៊ីត រិចឈ្នឺរ បានស្នើទៅព្រះមហាក្សត្រ ក៏ដូចជារាជរដ្ឋាភិបាល ដើម្បីសុំទីតាំងសាងសង់មន្ទីរពេទ្យ និងអាគារបន្ថែម ដែលមកដល់បច្ចុប្បន្នមន្ទីរពេទ្យគន្ធបុប្ផាមាន ៥ទីតាំង៖
• មន្ទីរពេទ្យគន្ធបុប្ផាទី១ នៅរាជធានីភ្នំពេញ បានបើកដំណើរការឡើងវិញនៅឆ្នាំ ១៩៩២
• មន្ទីរពេទ្យគន្ធបុប្ផាទី២ នៅរាជធានីភ្នំពេញ បានបើកដំណើរការ នៅឆ្នាំ ១៩៩៦
• មន្ទីរពេទ្យគន្ធបុប្ផាទី៣ នៅខេត្តសៀមរាប បានបើកដំណើរការ នៅឆ្នាំ ១៩៩៩
• មន្ទីរពេទ្យគន្ធបុប្ផាទី៤ នៅរាជធានីភ្នំពេញ បានបើកដំណើរការ នៅឆ្នាំ ២០០៥
• មន្ទីរពេទ្យគន្ធបុប្ផាទី៥ នៅរាជធានីភ្នំពេញ បានបើកដំណើរការ នៅឆ្នាំ ២០០៧
ដោយឡែក មន្ទីរពេទ្យគន្ធបុប្ផាទី៣ នៅខេត្តសៀមរាប ឬមន្ទីរពេទ្យគន្ធបុប្ផាជ័យវរ្ម័នទី២ បានដំណើរការទទួលសម្រាលស្ត្រីមានផ្ទៃពោះ នៅឆ្នាំ២០០១ ទៀតផង។ ក្នុងរយៈពេល២៥ឆ្នាំកន្លងមកនេះ មន្ទីរពេទ្យគន្ធបុប្ផាទាំង៥ទីតាំង ទទួលព្យាបាលជំងឺកុមារ និងសម្រាលស្រ្តីមានផ្ទៃពោះជិត១៧លាននាក់ និងប្រើប្រាស់ថវិកានៃមូលនិធិ គន្ធបុប្ផា ប្រមាណ ៦៣២លានដុល្លារអាមេរិក។
ទោះបីជា ឯកឧត្តមសាស្រ្តាចារ្យវេជ្ជបណ្ឌិត ប៊ីត រិចឈ្នឺរ បានលាចាកលោកហើយក៏ដោយ ប៉ុន្តែទឹកចិត្តមនុស្សធម៌ដ៏ធំធេងរបស់លោកបានស្ថិតនៅក្នុងក្រអៅបេះដូងប្រជាពលរដ្ឋកម្ពុជាគ្រប់រូប។ ទន្ទឹមនឹងនោះ រាជរដ្ឋាភិបាល ដែលដឹកនាំដោយ សម្ដេចអគ្គមហាសេនាបតីតេជោ ហ៊ុន សែន នៅតែបន្តដឹកនាំផ្តល់ការគាំទ្រជាប់មិនដាច់ដល់មន្ទីរពេទ្យគន្ធបុប្ផា សំដៅធានាឲ្យខាងតែបាននូវចីរភាព នៃកិច្ចដំណើរការរបស់មន្ទីរពេទ្យនេះ ក្នុងការផ្តល់សេវាព្យាបាល និងថែទាំសុខភាព តាមរយៈការបន្តផ្តល់ថវិកាយ៉ាងតិច ១០លានដុល្លារក្នុងមួយឆ្នាំសម្រាប់ប្រតិបត្តិការរបស់មន្ទីរពេទ្យ និងយ៉ាងតិច៥លានដុល្លារក្នុងមួយឆ្នាំសម្រាប់ មូលនិធិគន្ធបុប្ផា។
រូបភាព: លោក អ៊ិន សីហរិទ្ធ, លោក ជា ស្រស់, លោក ស៊ាន សុផាត
អត្ថបទ: លោក សេង ផល្លី
