នៅព្រឹកថ្ងៃទី១៨ ខែមិថុនា ឆ្នាំ២០២០ ឯកឧត្តម ទៀ សីហា អភិបាលខេត្តសៀមរាប បានទទួលជួបក្រុមហ៊ុនចំនួន២ នៃសាធារណរដ្ឋប្រជាមានិតចិន ដើម្បីសិក្សាបន្ថែមពីឱកាសវិនិយោគ និងជម្រាបពីជំនាញបច្ចេកទេសរបស់ក្រុមហ៊ុន លើវិស័យហេដ្ឋារចនាសម្ព័ន្ធ ខណៈខេត្តកសិកម្ម ទេសចរណ៍ វប្បធម៌ ធម្មជាតិ ប្រវត្តិសាស្រ្តមួយនេះ កំពុងអនុវត្តន៍គម្រោងអភិវឌ្ឍន៍ និងស្ដារប្រព័ន្ធហេដ្ឋារចនាសម្ព័ន្ធជាច្រើនទីតាំង ។
លោក សំរិទ្ធ ឌីម៉ង់ តំណាង តំណាងក្រុមហ៊ុន ស៊ូ មេក និង ស៊ីង ស៊ីង ប្រចាំប្រទេសកម្ពុជា បង្ហាញថា ក្រុមហ៊ុនរបស់លោក ធ្លាប់បានដេញថ្លៃបានគម្រោងរបស់ទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា ចាយកា និងកំពុងដំណើរការគម្រោងរយៈពេល២ឆ្នាំមកហើយ ក្នុងនោះខេត្តសៀមរាប ក្រុមហ៊ុនកំពុងអនុវត្តន៍គម្រោង ប្រព័ន្ធទឹកស្អាត ដោយប្រើប្រាស់ប្រភពទឹកពីបឹងទន្លេសាប និងអាចផលិតទឹកស្អាតបានប្រមាណ៦ម៉ឹន៦ពាន់ម៉ែត្រគូប។
លោក សំរិទ្ធ ឌីម៉ង់ បានបញ្ជាក់ដែរថា ក្រៅពីគម្រោងក្នុងខេត្តសៀមរាប ក្រុមហ៊ុនកំពុងសិក្សារៀបចំប្រព័ន្ធទុយោទឹកក្រោមដី នៅភ្នំពេញផងដែរ។ ក្រៅពីគម្រោងរៀបចំប្រព័ន្ធទឹក ក្រុមហ៊ុន ក៏មានជំនាញលើការងារសំណង់ តម្លើងចរន្តអគ្គិសនីខ្នាតធំ ទំនប់ទឹក ជាដើម។
តាមរយៈបទពិសោធរបស់ក្រុមហ៊ុន ទាំង២ ឯកឧត្តម អភិបាលខេត្ត បានចាប់អារម្មណ៍លើគម្រោងជាច្រើនរបស់ក្រុមហ៊ុនទាំងពីរ។ ទន្ទឹមនោះ ឯកឧត្តម តែងតែបានគិតគូរ ចំពោះបញ្ហាទឹកស្អាត ដែលជាតម្រូវការចាំបាច់របស់ប្រជាពលរដ្ឋក្នុងខេត្ត ជាពិសេសប្រជាពលរដ្ឋនៅតាមបណ្ដាស្រុកទាំង១១ ដែលភាគច្រើនពុំមានប្រភពទឹកដែលអាចប្រើបានទាំងរដូវប្រាំងនិងវស្សា រីឯទឹកអណ្ដូងមានការខ្វះខាតនៅរដូវប្រាំងជាដើម។
ឯកឧត្តម អភិបាលខេត្ត រំពឹងថា ចាយកា នឹងមានគម្រោងប្រព័ន្ធទឹកស្អាតនៅតាមបណ្ដាស្រុកបន្តទៀត ដើម្បីជួយលើកកម្ពស់សុខុមាលភាពប្រជាពលរដ្ឋនៅតាមជនបទ។ ក្នុងនោះ ឯកឧត្តម ក៏បានស្នើដល់ក្រុមហ៊ុនទាំងពីរ សិក្សាពីលទ្ធភាពក្នុងការរួមចំណែកជួយអភិវឌ្ឍ ក៏ដូចជាផ្ដល់បច្ចេកវិទ្យាទំនើបៗ បន្ថែមទៀត ដល់ខេត្តសៀមរាប។
អត្ថបទ និង រូបថត ៖ លោក សេង ផល្លី និង លោក ធន់ ពូថេ
