កាលពីព្រឹកថ្ងៃទី២៣ ខែមិថុនា ឆ្នាំ២០២០ ឯកឧត្តម ទៀ សីហា អភិបាលខេត្តសៀមរាប បានបើកកិច្ចប្រជុំ ពិភាក្សាជាមួយក្រុមការងារបច្ចេកទេស ដើម្បីកំណត់ឈ្មោះ និងលេខផ្លូវក្នុងក្រុងសៀមរាប ចំនួន១៨១៦ខ្សែ ឲ្យភាពជាក់លាក់ ខណៈបច្ចុប្បន្ន ផ្លូវជាង ៥០ខ្សែត្រូវបានដាក់ឈ្មោះរួចរាល់។
ក្នុងកិច្ចប្រជុំនោះ បានឯកភាពលើការកំណត់លេខផ្លូវ ជា៤តំបន់ ក្នុងនោះប្លុក “ក” មានចំនួន ៥៧៥ខ្សែ មានប្រវែងសរុប ១១៤ពាន់៦០០ម៉ែត្រ ប្លុក “ខ” មាន ចំនួន ៣០៥ខ្សែ មានប្រវែងសរុប ១៤៨ពាន់៩៩០ម៉ែត្រ ប្លុក “គ” មានចំនួន៤៤០ខ្សែ មានប្រវែងសរុប ១៣៤ពាន់៣៨០ម៉ែត្រ និង ប្លុក “ឃ” មានចំនួន៤៩៦ខ្សែ មានប្រវែងសរុប ១១៥ពាន់៦៣០ម៉ែត្រ ។ ដោយឡែក ផ្លូវមួយចំនួន នឹងត្រូវធ្វើការកែសម្រួលកែសម្រួលឈ្មោះ ដោយត្រូវដាក់ជាឈ្មោះវីរជន ឥស្សរជន , សប្បុរសជន និង ឈ្មោះពីប្រវត្តិសាស្ត្រ ឬជាឈ្មោះតាមភូមិសាស្ត្រធម្មជាតិ វប្បធម៌ និងឈ្មោះពីបុរាណ ទៅតាមទម្លាប់មួយចំនួន និងចុងក្រោយ ដាក់ស្នើសុំគោលការណ៍ពីថ្នាក់ដឹកនាំ។
ឯកឧត្តម អភិបាលខេត្ត ក៏បានសង្កត់ធ្ងន់ផងដែរថា សមត្ថកិច្ចគ្រប់គ្រងផ្លូវថ្នល់ ក៏ត្រូវរៀបចំផែនការមេអភិវឌ្ឍន៍ផ្លូវថ្នល់ គម្រោងប្លង់ និង កំណត់គម្រោង សាងសង់ ស្តារឡើងវិញ សម្រាប់កែលម្អ ពង្រីក និង ថែទាំផ្លូវថ្នល់ ព្រមទាំងសកម្មភាពអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ក្នុងក្រុង ដើម្បីស្នើសុំគោលការណ៍ឯកភាពពីរាជរដ្ឋាភិបាលផងដែរ។
ព័ត៌មានជាតិ ថ្មីៗ
អត្ថបទ និង រូបថត ៖ រដ្ឋបាលខេត្តសៀមរាប
កែសម្រួលអត្ថបទ ៖ លោក សេង ផល្លី
