និស្សិតបញ្ចប់មហាវិទ្យាល័យ ផ្នែកជលផល មួយរូប រស់នៅភូមិអង្គ្រង ឃុំកន្រ្ទាំង ស្រុកប្រាសាទបាគង ក្រុងសៀមរាប រកចំណូលបានជាង២ម៉ឺនដុល្លារអាមេរិច ក្នុងមួយឆ្នាំ តាមរយៈការចញ្ចឹមកង្កែប យកសាច់ និងលក់កូន។
កាលពីថ្ងៃទី២៣ ខែមិថុនា ឆ្នាំ២០២០ លោក គង់ គឹមឆាវ វ័យ២៦ឆ្នាំ ម្ចាស់កសិដ្ឋានចិញ្ចឹមកង្កែប លើកឡើងថា មុនចាប់យករបរចិញ្ចឹមកង្កែបនេះ លោកធ្លាប់បម្រើការជាបុគ្គលិកលក់ចំណីសត្វនៅស្ថាប័នមួយរយៈពេលមួយឆ្នាំ។ បន្ទាប់ពីទទួលបានបទពិសោធន៍ ពីស្ថាប័នលក់ចំណីសត្វនោះ លោកបានសិក្សាឃើញថា ការចិញ្ចឹមសត្វកង្កែបឆាប់ទទួលបានផល គឺប្រើពេលវេលាតែ៤៥ថ្ងៃប៉ុណ្ណោះ។ គិតមកដល់ពេលនេះ មានរយៈពេល៣ឆ្នាំមកហើយ ដែលលោកបានចាប់យករបរចិញ្ចឹមកង្កែបយកសាច់ និងកូន។
ទោះបីពិភពលោក បន្តអូសបន្លាយដោយវិបត្តិជំងឺកូវីដ១៩ របរចិញ្ចឹមកង្កែបរបស់ លោក ហាក់មិនមានផលប៉ះពាល់អ្វីឡើយ។ លោកបង្ហាញថា កង្កែបសាច់ក្នុងមួយគីឡូក្រាម មានតម្លៃ៧ពាន់រៀល ចំណែកកូនវិញ មួយក្បាល លោកលក់ក្នុងតម្លៃ២០០រៀល ទៅ៣០០រៀលតាមទំហំតូចឬធំ។ ភាពខុសគ្នា មុនវិបត្តិជំងឺកូវីដ១៩ លោកលក់សាច់កង្កែបបានច្រើនជាងកូន ប៉ុន្តែក្នុងអំឡុងវិបត្តិជំងឺកូវីដ១៩ លោកលក់កូនកង្កែប បានច្រើនជាងសាច់វិញម្ដង។ បច្ចុប្បន្ន លោកាមានអាងចិញ្ចឹមកង្កែបសរុបចំនួន៣០ ហើយជាមធ្យមអំឡុងវិបត្តិជំងឺកូវីដ១៩នេះ ក្នុងមួយខែ លោករកចំណូលបានជាង២ពាន់ដុល្លារអាមេរិច ។
ព័ត៌មានជាតិ ថ្មីៗ
ម្ចាស់កសិដ្ឋានរូបនេះ បញ្ជាក់ថា ចំពោះវិធីសាស្ត្រចិញ្ចឹមកង្កែបមានច្រើនប្រភេទទៅតាមធនធាន កន្លងមកលោកបានណែនាំពីវិធីសាស្ត្រចិញ្ចឹមកង្កែបដល់អតិថិជន ដែលបានទិញកូនកង្កែបទៅ ដោយមិនគិតថ្លៃឡើយ។ តាមបទពិសោធន៍ របស់លោក ការចិញ្ចឹមនៅក្នុងអាងស៊ីម៉ង់ត៍ មានប្រសិទ្ធិភាពជាង ងាយស្រួលចិញ្ចឹម ព្រមទាំងអាចប្រើការបានយូរអង្វែងទៅមុខទៀតផង។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
