នៅរសៀលថ្ងៃទី២៩ ខែមិថុនា ឆ្នាំ២០២០ លោក នាក់ ណេរ៉ុន អភិបាលរងខេត្ត ក្នុងនាមក្រុមប្រឹក្សា និងគណៈអភិបាលខេត្តសៀមរាប បានសាទរចំពោះ លោក កាំង លាង ជាប្រធានសាខាគយ និងរដ្ឋាករ ដែលទើបចូលកាន់មុខតំណែងថ្មី ក្រោមអធិបតីភាព លោក នួន ច័ន្ទរិទ្ធ អគ្គនាយករងនៃអគ្គនាយកដ្ឋានគយ និងរដ្ឋាករកម្ពុជា តំណាងឯកឧត្តមបណ្ឌិត គុណ ញឹម ប្រតិភូ រាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា និងឯកឧត្តម ខូយ ឈីន សមាជិកក្រុមប្រឹក្សាខេត្ត។
ក្នុងឱកាសនោះ លោកអភិបាលរងខេត្ត បានផ្ដល់នូវអនុសាសន៍មួយចំនួន ដល់លោក ប្រធានសាខា ដើម្បីធ្វើការពង្រឹងអភិបាលកិច្ច នៃការផ្តល់សេវា និងគោលការណ៍ណែនាំថ្មីៗ ក្នុងបរិបទនៃកំណែទម្រង់ស៊ីជម្រៅ របស់រាជរដ្ឋាភិបាល។ ក្នុងនោះរួមមាន៖
-ត្រូវបន្តពង្រឹងសាមគ្គីភាពផ្ទៃក្នុង និងកិច្ចសហការជាមួយអាជ្ញាធរដែនដីជាពិសេសស្ថាប័នតុលាការ ដោយឈរ លើមូលដ្ឋានច្បាប់។
-ត្រូវបង្កើនប្រសិទ្ធភាពគ្រប់គ្រង ចេះសម្របសម្រួលតាមដានការងារ និងលើកទឹកចិត្តមន្រ្តីក្រោមឱវាទ ដើម្បីពួកគេបញ្ចេញឱ្យអស់ពីសមត្ថភាព និងមនសិកាការងាររបស់ខ្លួន។ -ត្រូវមានគំនិតផ្តួចផ្តើម និងមនសិកាការងារខ្ពស់ ប្រកបដោយតម្លាភាព គណនេយ្យភាព និងអភិបាលកិច្ចល្អ។-ត្រូវបន្តជម្រុញការបើកប្រអប់តវ៉ាគយ ឱ្យបានទៀងទាត់ និងជាប់ ជាប្រចាំ។
-ត្រូវបង្កើនការប្រមូលចំណូលពន្ធអាករ ជូនរដ្ឋឱ្យបានគ្រប់ និងលើសផែនការប្រកបដោយវិជ្ជាជីវៈខ្ពស់។-ត្រូវអនុវត្តឱ្យបានម៉ឺងម៉ាត់ តាមផែនការសកម្មភាពឆ្នាំ២០២០ របស់អគ្គនាយកដ្ឋានគយ និងរដ្ឋាករកម្ពុជា។-ត្រូវបន្តអនុវត្តនូវបទបញ្ជាទាំង ១០ចំណុច របស់អគ្គនាយកដ្ឋានគយ និងរដ្ឋាករកម្ពុជា។
-ត្រូវបង្កើនសកម្មភាពស្រាវជ្រាវ និងបង្រា្កបអំពើរត់ពន្ធពិសេសលើទំនិញគ្រឿងអេឡិកត្រូនិក និងទំនិញ ដែលត្រូវបិតត្រាពន្ធគយ។-ត្រូវបន្តពង្រឹងផ្នែករដ្ឋបាលគយ គោលនយោបាយគយ ការងារបច្ចេកទេស និងកិច្ចសម្រួលពាណិជ្ជកម្ម តាមរយៈការប្រើប្រាស់ប្រព័ន្ធព័ត៌មានវិទ្យាក្នុងប្រតិបត្តិការគយ។-ត្រូវបន្តពង្រឹងការផ្សព្វផ្សាយនូវខ្លឹមសារលិខិតបទដ្ឋាននានាជូនដល់មន្ត្រីគយនិងភាគីពាក់ព័ន្ធ។
– ត្រូវអនុវត្តន៍ឱ្យម៉ឺងម៉ាត់អភិក្រមទាំង៥ ១.ឆ្លុះកញ្ចក់ ២.ងូតទឹក ៣.ដុសក្អែល ៤.ព្យាបាល និង៥.វះកាត់ របស់សម្តេច នាយករដ្ឋមន្រ្តីនៃព្រះរាជាណាចក្រកម្ពុជា។
លោកអភិបាលរងខេត្ត បន្ថែមថា៖ ការប្រកាសចូលកាន់មុខតំណែង ប្រធានសាខាគយ និងរដ្ឋាករខេត្តសៀមរាប នាពេលនេះ គឺជាការប្រគល់ភារកិច្ច និងជាការផ្តល់នូវការទទួលខុសត្រូវមួយថែមទៀត ដែលតម្រូវឱ្យសាមីខ្លួនត្រូវតែបញ្ចេញឱ្យអស់សមត្ថភាព លទ្ធភាព និងទេពកោសល្យ ដើម្បីជំនះបានរាល់ការលំបាកនានា ដែលកើតមានឡើងកន្លងមក ដែលចាំបាច់ត្រូវសហការជាមួយថ្នាក់ដឹកនាំ និងមន្រ្តីក្រោមឱវាទ ដើម្បីធ្វើឱ្យអង្គភាពមានការប្រែប្រួលមុខមាត់ថ្មីសំដៅធានាបាននូវភារកិច្ចស្នូលទាំងឡាយ ដែលអង្គភាពត្រូវបំពេញ និងទទួលខុសត្រូវចំពោះមុខអគ្គនាយកដ្ឋានគយ និងរដ្ឋាករ កម្ពុជា ក្រសួងសេដ្ឋកិច្ច និងហិរញ្ញវត្ថុ និងភារកិច្ចទាំងឡាយផ្សេងៗ ទៀតទៅតាមការចាំបាច់ ដែលរដ្ឋបាលខេត្តប្រគល់ជូន។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
