នៅក្នុងដំណើរទស្សនកិច្ចនៅសាកលវិទ្យាល័យបញ្ញាសាស្រ្តសាខាខេត្តសៀមរាប ឯកអគ្គរដ្ឋទូតសហរដ្ឋអាមេរិក វាយតម្លៃថា សៀមរាបគឺជាទីផ្សាររីកចម្រើនសម្រាប់ការអប់រំជាន់ខ្ពស់នៅសហរដ្ឋអាមេរិក ស្ថានទូតមានគោលដៅបង្កើនចំនួននិស្សិតកម្ពុជានៅទីនោះ!
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា (ឯកឧត្តម W. Patrick Murphy ) បានអញ្ជើញទៅសាកលវិទ្យាល័យបញ្ញាសាស្ត្រសាខាខេត្តសៀមរាប នាព្រឹកថ្ងៃអង្គារទី៣០មិថុនានេះ ក្នុងគោលបំណងដើម្បីពិនិត្យមើលមជ្ឈមណ្ឌលផ្តល់ការប្រឹក្សាអំពីការអប់រំ ( EducationUSA ) ដែលជាជំនួយរបស់ស្ថានទូតអាមេរិក ក្រោមការគាំទ្រថវិកាពីការិយាល័យអប់រំ និងកិច្ចការវប្បធម៌។ មជ្ឈមណ្ឌលមួយនេះ គឺជាមជ្ឈមណ្ឌលដំបូងគេបង្អស់ ដែលត្រូវបានបង្កើតឡើងនៅខេត្តសៀមរាប ហើយគ្រោងនឹងបើកឲ្យដំណើរការនាពេលខាងមុខនេះ សម្រាប់ប្រឹក្សាអំពីការអប់រំនៅសហរដ្ឋអាមេរិក។
ក្នុងដំណើរទស្សកិច្ចនេះដែរ ឯកឧត្តម W. Patrick Murphy បានជួបសំណេះសំណាល ជាមួយនិស្សិតប្រមាណជា២០នាក់ប៉ុណ្ណោះ ដោយស្ថិតក្រោមការគោរពវិធានសុវត្ថិភាព ការពារករណីឆ្លងវារុសកូវីត១៩។ ឯកឧត្តមបញ្ជាក់ថា៖ សៀមរាបគឺជាទីផ្សារដែលកំពុងរីកចម្រើនសម្រាប់ការអប់រំជាន់ខ្ពស់របស់សហរដ្ឋអាមេរិក។
ជំនួបសំណេះសំណាលនេះ គឺជាឱកាសមួយដើម្បីនិយាយពីគោលនយោបាយអប់រំ ដែលពាក់ព័ន្ធជាមួយនិស្សិត និងបានបង្ហាញអំពីគោលដៅរបស់ស្ថានទូត ក្នុងការបង្កើនចំនួននិស្សិតកម្ពុជា បានទទួលឱកាសទៅបន្តការសិក្សានៅសហរដ្ឋអាមេរិក។ វាក៏ជាឱកាសមួយដើម្បីនិយាយអំពីស្ថានភាពនៃទំនាក់ទំនងការទូតទ្វេភាគីរវាងសហរដ្ឋអាមេរិកនិងកម្ពុជានាពេលបច្ចុប្បន្ន ក្នុងឆ្នាំគម្រប់ខួប ៧០ ឆ្នាំផងដែរ (១៩៥០-២០២០)។
អ្វីដែលឯកឧត្តមទូតចង់និយាយដោយផ្តោតទៅលើយុវជននោះគឺ តាមរយៈក្រសួងការបរទេសសហរដ្ឋអាមេរិក ស្ថានទូតបានរៀបចំកម្មវិធីផ្លាស់ប្តូរទស្សនកិច្ចសិក្សា កម្មវិធីគំនិតផ្តួចផ្តើមយុវជនតំបន់អាស៊ីអគ្នេយ៍( YSEALI) កម្មវិធីទស្សនកិច្ចភាពជាអ្នកដឹកនាំ (IVLP) និងការផ្តល់អារូបករណ៍ Fulbright និង Humphrey ជាដើម៕
