នៅព្រឹកថ្ងៃទី៣០ ខែមិថុនា ឆ្នាំ ២០២០នេះ ឯកឧត្តម ទ្រី ម៉េង រដ្ឋលេខាធិការ ក្រសួងអភិវឌ្ឍន៍ជនបទ បានអញ្ជើញជាគណៈអធិបតីក្នុងពិធីប្រកាសទទួលស្គាល់ឃុំតាសោម ស្រុកអង្គរជុំខេត្តសៀមរាប គឺជាឃុំបញ្ឈប់ការបន្ទោបង់ពាសវាលពាសកាល ដោយមានការអញ្ជើញចូលរួមពីសំណាក់មន្ត្រីរាជការ របស់នាយកដ្ឋានផ្គត់ផ្គង់ទឹកជនបទ និងនាយកដ្ឋានថែទាំសុខភាពជនបទ លោក លោកស្រី តំណាងមន្ទីរអភិវឌ្ឍន៍ជនបទខេត្ត ព្រមទាំងប្រជាពលរដ្ឋជាច្រើននាក់បានចូលរួមផងដែរ ។
ឯកឧត្តម ទ្រី ម៉េង មានប្រសាសន៏ថា ចំពោះការប្រកាសទទួលស្គាល់ឃុំតាសោម ស្រុកអង្គរជុំខេត្តសៀមរាបនេះ គឺជាឃុំបញ្ឈប់ការបន្ទោបង់ពាសវាលពាសកាល ក្នុងគោលបំណងរួមគ្នារវាងអាជ្ញាធរថ្នាក់ជាតិ និងថ្នាក់ក្រោមជាតិ អាជ្ញាធរពាក់ព័ន្ធគ្រប់ ដៃគូអភិវឌ្ឍន៍ និងធនាគារអភិវឌ្ឍន៍អាស៊ី ជាពិសេស អាជ្ញាធរមូលដ្ឋាន និងប្រជាជនក្នុងឃុំ ដែលបានខិតខំប្រឹងប្រែងរហូតមក យើងត្រួវខិតខំប្រឹងប្រែងរួមគ្នាបន្តទៀតលើវិស័យទឹកស្អាត និងអនាម័យជនបទនៅកម្ពុជា ជាពិសេសចំពោះដៃគូអភិវឌ្ឍន៍ ដែលរួមមានធនាគារអភិវឌ្ឍន៍អាស៊ី (ADB) ដែលបានជួយឧបត្ថម្ភគាំទ្រដល់ក្រសួងអភិវឌ្ឍន៍ ជនបទលើវិស័យផ្គត់ផ្គង់ទឹកស្អាត និងអនាម័យជនបទ តាំងពីឆ្នាំ២០០៦ គឺសំដៅសម្រេចឲ្យបាននូវគោលដៅអភិវឌ្ឍន៍ប្រកបដោយចីរភាព (SGD)។
ឯកឧត្តម ទ្រី ម៉េង មានប្រសាសន៏បន្តថា តាមរយៈយុទ្ធសាស្ត្រជាតិ ស្តីពីការផ្គត់ផ្គង់ទឹក និងអនាម័យ ឆ្នាំ ២០១១ ក្រសួងអភិវឌ្ឍន៍ជនបទមានការទទួលខុសត្រូវជារួមចំពោះយុទ្ធសាស្ត្រ និងការអនុវត្តរបស់ខ្លួនក្រោមការដឹកនាំរបស់ក្រុមការងារបច្ចេកទេសសម្រាប់ការផ្គត់ផ្គង់ទឹកស្អាត និងអនាម័យជនបទ (TWG-RWSSH) ក្នុងការបង្កើនអត្រាប្រើវាឡង់ទឹកស្អាត និងអនាម័យជនបទឲ្យស្របតាមសូចនាករដែលបានកំណត់ នៅក្នុងយុទ្ធសាស្ត្រជាតិ ស្តីពីការផ្គត់ផ្គង់ទឹកស្អាត និងអនាម័យជនបទ គិតត្រឹមឆ្នាំ២០១៥ ប្រជាជន ៥០%បានទទួលការផ្គត់ផ្គង់ទឹកស្អាត និងអនាម័យជនបទ នឹងនៅឆ្នាំ២០២៥ ប្រជាជន ១០០% បានទទួល“ វិស័យទឹកស្អាត ” និងនៅតាមជនបទប្រកបដោយនិរន្តរភាព និងការអនុវត្តវិស័យអនាម័យជនបទ យើងគិតត្រឹមឆ្នាំ២០១៥ ប្រជាជននៅតាមជនបទទទួលបាន ៣០ % និងឆ្នាំ២០២៥ ប្រជាជនទទួលបាន ១០០% ចំពោះសេវាកម្មអនាម័យប្រកបដោយនិរន្តរភាព និងការរស់នៅក្នុងបរិស្ថានអនាម័យល្អ ។
ឯកឧត្តម បញ្ជាក់បន្ថែមថា ក្រសួងអភិវឌ្ឍន៍ជនបទត្រូវបានប្រគល់សិទ្ធិដឹកនាំធ្វើឱ្យប្រសើរឡើងនូវលក្ខខណ្ឌ និងអនាម័យខ្លួនប្រាណ ក្នុងចំណោមប្រជាជននៅតាមជនបទស្របតាមយុទ្ធសាស្ត្រ និងគោលនយោបាយ ជាការឆ្លើយតបជាមួយផែនការសកម្មភាពជាតិរបស់ក្រសួង ៣៥% ដើម្បីអភិវឌ្ឍន៍ជនបទ ក្នុងគ្រួសាររស់នៅតាមជនបទនឹងអនុវត្តអនាម័យនៅនឹងកន្លែងដោយសុវត្ថិភាពនៅតាមស្រុកឲ្យកាន់តែច្រើនឡើងៗ។ ក្នុងរយ:កាលកន្លងមកយើងបានទទួលស្គាល់ថាជាស្រុកបញ្ឈប់ការបន្ទោបង់ពាសវាលពាសកាល ដូចជាពេលនេះ រួមមានឃុំ តាសោម ស្រុកអង្គរជុំខេត្តសៀមរាប ឃុំបាយដំរាំ ក្នុងស្រុកបានណន់ ខេត្តបាត់ដំបង ដែលជាឃុំត្រូវបានប្រកាស។ កាលពីមុនយើងមានស្រុកស្វាយទាប និងស្រុករំដួល ខេត្តស្វាយរៀង និងស្រុកបន្ទាយមាស ស្រុកជុំគីរី ខេត្តកំពត និងស្រុកបសេដ្ឋ ខេត្តកំពង់ស្ពឺ បានប្រកាសនាខែមករា ឆ្នាំ២០២០រួចមកហើយ ជាស្រុកទី ៥ ដែលបញ្ឈប់ការបន្ទោបង់ពាសវាលពាសកាលនោះ ៕
អត្ថបទ និង រូបភាព ៖ ស៊ាន សុផាត
