ការចិញ្ចឹមាន់តាមលក្ខណៈធម្មជាតិ ឬគេនិយមហៅថា មាន់ស្រែ តែមានតម្រូវការខ្ពស់នៅលើទីផ្សារ ទោះបីវិបត្តិជំងឺកូវីដ១៩ នៅតែបន្តអូសបន្លាយយ៉ាងណាក្ដី។ ជាក់ស្ដែង បុរសម្នាក់ រស់នៅភូមិត្បែងលិច ឃុំត្បែង ស្រុកបន្ទាយស្រី ខេត្ដសៀមរាប បង្ហាញថា គាត់អាចរកចំណូលបានប្រហែល៧០០ដុល្លារក្នុងមួយខែ ពីការលក់សាច់មាន់នេះ។
លោក ចៅ មាន អ្នកចិញ្ចឹមមាន់តាមលក្ខណៈធម្មជាតិ បន្ថែមថា បច្ចុប្បន្នលោកមាន មាន់ពូជប្រមាណជាង៥០០ក្បាលសម្រាប់ផលិតកូនលក់ ដោយក្នុងមួយខែគិតជាមធ្យម លោកអាចលក់កូនមាន់បានចាប់ពី១៥០០ទៅ១៧០០ក្បាល។
ប៉ុន្តែកាលពីមុនឆ្នាំ២០១៩លោក ក៏បានបញ្ជាក់ផងដែរថា ការចាប់ផ្ដើមចិញ្ជឹមមាន់ របស់លោកទទួលការបរាជ័យ។ ការបរាជ័យនេះ លោកពុំបានចុះចាញ់ទេ ហើយបានខិតខំ សិក្សាស្រាវជ្រាវ ជាលទ្ធផលរយៈពេល២ឆ្នាំកន្លងមកនេះ ការចិញ្ចឹមមាន់របស់លោកទទួលបានជោគជ័យ ជាមួយនោះ លោកបានចងក្រង ក្រុមអ្នកចិញ្ចឹមមាន់ស្រែ ដែលមានសមាជិកប្រមាណ៣០នាក់។ ក្នុងនាមជាមេក្រុម លោក ចៅ មាន បានធានាការផ្គត់ផ្គង់កូនមាន់ និងទិញសាច់មាន់ពីកូនក្រុមជាអ្នកចិញ្ចឹម ផ្គត់ផ្គង់ដល់ម្ចាស់រមណីយដ្ឋាននានាផងដែរ។
តាមរយៈយន្តការចងក្រងជាក្រុមនេះ បានធ្វើឲ្យតម្លៃសាច់មាន់ក្នុងសហគមន៍របស់លោក មានតម្លៃល្អ និងធានាដល់ការចិញ្ចឹម និងការផ្គត់ផ្គង់។
លោកថា ការចិញ្ចឹមមាន់ស្រែជាក្រុមនេះគឺមានការទុកចិត្ដពីអតិថិជនខ្លាំង ព្រោះវាជាផលិតផលដែលកើតចេញពីការបណ្ដុះបណ្ដាលពីអ្នកជំនាញកសិកម្ម។
ទន្ទឹមនោះ លោកក៏បានអំពាវនាវដល់ អាជ្ញាធរពាក់ព័ន្ធ សូមជួយរកទីផ្សារបន្ថែមជូនកសិករ ព្រមទាំងអ្នកជំនាញឲ្យបានគ្រប់គ្រាន់ ដើម្បីជួយលើកកម្ពស់ដល់ជីវភាពប្រជាកសិករ ឲ្យកាន់តែមានភាពល្អប្រសើរឡើង។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
