នៅព្រឹកថ្ងៃទី១២ ខែកក្កដា ឆ្នាំ២០២០ ប្រតិភូគណៈវិស្វករកម្ពុជា ដឹកនាំដោយឯកឧត្តម ប្រាក់ មិន អនុប្រធានក្រុមប្រឹក្សា គណៈវិស្វករកម្ពុជា និងអមដំណើរដោយ លោក សុខ រតនា ប្រធានការិយាល័យ នៃគណៈវិស្វករកម្ពុជា លោក ផង់ វណ្ណៈ អនុប្រធានផ្នែក នៃគណៈវិស្វករកម្ពុជា ព្រមទាំង លោក ឆាយ លីណា លោក ថោង ពីណា លោក ស៊ី សៅវិភាគ លោក ហូ សម័យ លោក ទែន ប៊ុនធឿន លោក មឿក ដេត និងលោក តាំង គឹមអង តំណាងសមាជិក នៃគណៈវិស្វករកម្ពុជា ប្រចាំខេត្តសៀមរាប បានអញ្ជើញគោរពវិញ្ញាណក្ខន្ធសពលោក ឌិត សេរីរតនា ប្រធានការិយាល័យបច្ចេកទេស នៃមន្ទីរសាធារណការ និងដឹកជញ្ជូនខេត្តសៀមរាប ដែលបានទទួលមរណភាពកាលពីថ្ងៃទី១០ខែកក្កដា ឆ្នាំ២០២០ វេលាម៉ោង១០៖៣០នាទី ក្នុងជន្មាយុ៤៧ឆ្នាំ ដោយរោគាពាធ។
សពលោក ឌិត សេរីរតនា ត្រូវបានតម្កល់ទុកធ្វើបុណ្យទក្ខិណានុប្បទាន តាមប្រពៃណីព្រះពុទ្ធសាសនា នៅគេហដ្ឋាន ស្ថិតនៅភូមិខ្នារ សង្កាត់ជ្រាវ ក្រុង ខេត្តសៀមរាប។
ក្នុងឱកាសដ៏ក្រៀមក្រំនេះ ក្នុងនាមគណៈវិស្វករកម្ពុជា ឯកឧត្តម ប្រាក់ មិន បានសម្តែងនូវមរណទុក្ខ និងក្តីសោកស្តាយ ដែលបានបាត់បង់បុគ្គលមានសមត្ថភាព និងមានចំណេះដឹង ហើយក៏ជាបុគ្គលគម្រូ និងសកម្ម ក្នុងការចូលរួមជួយលើកម្ពស់សមត្ថភាពវិស្វករកម្ពុជា តាមរយៈការផ្សព្វផ្សាយ និងគៀងគរក្រុមវិស្វករក្នុងខេត្តសៀមរាប ចុះបញ្ជីនៅគណៈវិស្វករកម្ពុជា។ ក្រៅពីភារកិច្ច និងតួនាទីជាមន្ត្រីរាជការ លោកត្រូវបានទទួលស្គាល់ជា វិស្វករអាស៊ាន វិស្វករកិត្តិយសអាស៊ាន និងជាវិស្វករអាជីពឆ្នើមអាស៊ាន នៃ អង្គការសហព័ន្ធវិស្វកម្មអាស៊ាន ព្រមជាមួយស្នាដៃជាច្រើនទៀតនៅក្នុងសង្គម។
ទន្ទឹមនោះ ឯកឧត្តមប្រធានប្រតិភូ ក៏បាននាំយក ថវិកាចំនួន ១លាន៤សែនរៀល ទទួលបានពីគណៈវិស្វករកម្ពុជា និងសមាជិក ដើម្បីចូលរួមរំលែកទុក្ខជាមួយគ្រួសារសព និងសូមបួងសួងឲ្យវិញ្ញណក្ខន្ធរបស់លោក ឌិត សេរីរតនា បានទៅកាន់សុគតិភពកុំបីឃ្លៀងឃ្លាតឡើយ។
អត្ថបទ និង រូបថត ៖ លោក សេង ផល្លី
