ក្នុងឱកាសបើកកិច្ចប្រជុំត្រួតពិនិត្យលើវឌ្ឍនភាពនានា ក្នុងការអនុវត្តផែនការសកម្មភាពខេត្ត ស្តីពីការផ្គត់ផ្គង់ទឹក ការសម្អាត និង អនាម័យជនបទ ឆ្នាំ២០២០- ២០២៣ នៅមន្ទីរអភិវឌ្ឍន៍ជនបទខេត្ត នាព្រឹកថ្ងៃទី១៥ ខែ កក្កដា ឆ្នាំ២០២០នេះ លោក ង៉ាន់ ភិរុណ អភិបាលរងខេត្តសៀមរាប បានមានប្រសាសន៍ថា ការផ្គត់ផ្គង់ទឹកស្អាត និង ការលើកកម្ពស់អនាម័យនៅជនបទ គឺជាផ្នែកមួយយ៉ាងសំខាន់ ដែលមិនអាចខ្វះបាន ក្នុងការធ្វើឲ្យប្រសើរឡើងនូវកម្រិតជីវភាពនៃការរស់នៅរបស់ប្រជាពលរដ្ឋ ស្របទៅតាមគោលនយោបាយកាត់បន្ថយភាពក្រីក្ររបស់រាជរដ្ឋាភិបាលកម្ពុជា ហើយដោយបានយល់ច្បាស់ពីផលប៉ះពាល់ជាអវិជ្ជមាន នៃកង្វះខាតការផ្គត់ផ្គង់ទឹកស្អាត និង ការលើកកម្ពស់អនាម័យល្អនៅជនបទនោះ រាជរដ្ឋាភិបាល ក៏ដូចជាបណ្តាដៃគូអភិវឌ្ឍន៍ អង្គការជាតិ និងអន្តរជាតិនានា បានយកចិត្តទុកដាក់ខ្ពស់ក្នុងការរិះរកនូវយុទ្ធសាស្ត្រគន្លឹះផ្សេងៗ ដើម្បីវិភាគអំពីលទ្ធភាពនៃប្រភពធនធាន ធ្វើយ៉ាងណាសម្រេចនូវគោលដៅឆ្នាំ២០២៣ ឲ្យបាន ៩០ភាគរយ នូវ អត្រាផ្គត់ផ្គង់ទឹកស្អាត និង អត្រាគ្របដណ្តប់អនាម័យឲ្យបាន ៩០ភាគរយ ពិសេស ការសម្រេចឲ្យខានតែបាននូវទស្សនៈវិស័យរបស់រាជរដ្ឋាភិបាល “នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវមានការផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថាន ដែលមានអនាម័យប្រកបដោយនិរន្តរភាព” ។
លោក ង៉ាន់ ភិរុណ មានប្រសាសន៍ទៀតថា ដើម្បីសម្រចបាននូវទស្សនៈវិស័យឆ្នាំ២០២៥នោះ កិច្ចប្រជុំថ្ងៃនេះ គឺជាការពង្រឹងតួនាទី ភារកិច្ចរបស់ក្រុមការងារបច្ចេកទេសផ្គត់ផ្គង់ទឹកស្អាត និង អនាម័យជនបទ ក្នុងចែករំលែកនូវបទពិសោធន៍នានាពាក់ព័ន្ធនឹងបញ្ហាប្រឈម និង ដំណោះស្រាយក្នុងការអនុវត្តការងារ និង ធ្វើការពង្រឹងចំណងទាក់ទងគ្នាឲ្យកាន់តែប្រសើរឡើង រវាងស្ថាប័នរដ្ឋ អង្គការ សហគមន៍ដែលពាក់ព័ន្ធ សុំឲ្យសមាជិកទាំងអស់ ផ្តល់ជាមតិយោបល់ និងធ្វើការពិភាក្សាឲ្យបានផុលផុសក្នុងការដោះស្រាយ នូវបញ្ហាប្រឈមក្នុងការអនុវត្តការងារកន្លងមក ធ្វើយ៉ាងណាដើម្បីជំរុញឲ្យការផ្គត់ផ្គង់ទឹកស្អាត និងលើកកម្ពស់អនាម័យនៅខេត្តសៀមរាប ទទួលបានជោគជ័យតាមផែនការដែលបានគ្រោងទុក ពិសេសត្រូវយកចិត្តទុកដាក់ក្នុងការអនុវត្ត និងផ្សព្វផ្សាយបន្តដល់អ្នកពាក់ពន្ធ័នានា ធ្វើយ៉ាងណាជួយបញ្ជ្រាបផែនការផ្គត់ផ្គង់ទឹកស្អាត និងអនាម័យទៅក្នុងផែនការអភិវឌ្ឍន៍ក្រុង ស្រុក ឃុំ សង្កាត់ និងត្រូវលើកជាគម្រោងអាទិភាពក្នុងមូលដ្ឋានរបស់ខ្លួន ខណៈខេត្តសៀមរាបត្រូវការកំណើនផ្នែកទឹកស្អាតអនាម័យក្នុងរង្វង់យ៉ាងតិច ៥ទៅ៦ភាគរយ ក្នុងមួយឆ្នាំ ។
សូមបញ្ជាក់ថា ផ្អែកតាមរបាយការណ៍របស់មន្ទីរអភិវឌ្ឍន៍ជនបទខេត្តសៀមរាប បានឲ្យដឹងថា លទ្ធផលអនុវត្តបានក្នុង ឆមាសទី១ឆ្នាំ២០២០នេះ គឺបានផ្តល់សេវាផ្គត់ផ្គង់ទឹកស្អាតកម្រិតមូលដ្ឋានមាន ៧៣,៩០ភាគរយ , សេវាអនាម័យ ៧៤,៦០ភាគរយ , សាងសង់អណ្តូងអាហ្វ្រិដេវ ថវិកាមន្ទីរបានចំនួន១៤អណ្តូង , អណ្តូងអាហ្រ្វីដេវជំនួយរបស់សាធារណរដ្ឋប្រជាមានិតចិន ចំនួន១០០អណ្តូង , ជីកស្រះសហគមន៍បាន ៧ស្រះ ក្នុងនោះស្រះរៀបថ្មភ្នំ បានចំនួន៤ស្រះ , សាងសង់បង្គន់អនាម័យបាន ២០០បង្គន់ និង ភូមិបញ្ឈប់ការបន្ទោរបង់ពាសវាលពាសកាល ចំនួន ១៦៩ភូមិ ក្នុងឃុំចំនួន៥ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
