កាលពីរសៀលថ្ងៃទី១៥ ខែកក្កដា ឆ្នាំ២០២០នេះ នៅសាលាស្រុកស្រីស្នំ មានបើកកិច្ចប្រជុំពិភាក្សាមួយដើម្បីរកដំណោះស្រាយអំពីបញ្ហាខ្វះខាតទឹកសម្រាប់ស្រោចស្រពដំណាំស្រូវនៅក្នុងតំបន់ស្រុកក្រឡាញ់ ក្រោមអធិបតីភាព ឯកឧត្តម ពេជ្រ វាសនា អនុរដ្ឋលេខាធិការក្រសួងធនធានទឹក និងឧតុនិយម ដោយមានការចូលរួពីសំណាក់លោក លោកស្រី ជាមន្ត្រីបច្ចេកទេសរបស់ក្រសួង , ប្រធានមន្ទីរធនធានទឹកនិងឧតុនិយមខេត្តសៀមរាប , អភិបាលស្រុកនិងអភិបាលរងស្រុកស្រីស្នំ និងស្រុកក្រឡាញ់ , ប្រធានការិយាល័យ និង មេឃុំពាក់ព័ន្ធនៃស្រុកទាំងពីរ ព្រមទាំងតំណាងអ្នកម៉ៅការសាងសង់ស្ពានរបស់ក្រសួងការពារជាតិ ។
កិច្ចប្រជុំនេះ ធ្វើឡើងក្នុងគោលបំណង រកដំណោះស្រាយពាក់ព័ន្ធនឹងការលើកទំនប់កាត់ស្ទឹងស្រែង ដើម្បីសាងសង់ស្ពាន ស្ថិតនៅក្នុងឃុំត្រាំសសរ នៃស្រុកស្រីស្នំ ដែលធ្វើឱ្យប៉ះពាល់ដល់លំហូរទឹកទៅផ្នែកខាងក្រោម សម្រាប់ការស្រោចស្រពផ្ទៃដីស្រូវវស្សាប្រមាណ ៥៥០ ហិកតា ស្ថិតក្នុងឃុំតាអាន និងឃុំចន្លាសដៃ នៃស្រុកក្រឡាញ់ ខណៈតំណាងអ្នកម៉ៅការសាងសង់ស្ពាននៃក្រសួងការពារជាតិ បានយល់ព្រមទទួលយកសំណូមពរក្នុងការកាយបើកមុខទឹក ដើម្បីបង្ហូរទឹកនៅផ្នែកខាងក្រោមរយៈពេល២ថ្ងៃខាងមុខទៀត សម្រាប់ផ្គត់ផ្គង់ទឹកដល់ស្រែដែលកំពុងទទួលរងផលប៉ះពាល់ពីកង្វះខាតទឹក ។
បន្ទាប់ពីបានពិភាក្សាក្នុងកិច្ចប្រជុំរួច គណៈប្រតិភូបានចុះពិនិត្យទីតាំងការដ្ឋានសំណង់ស្ពានបេតុងឆ្លងកាត់ស្ទឹងស្រែង ដើម្បីពិនិត្យស្ថានភាពលទ្ធភាពបើកមុខទឹកស្ទឹង និងបើកទ្វារបង្ហូរទឹកពីអាងអាតោសម្រាប់ប្រជាពលរដ្ឋប្រើប្រាស់និងសង្គ្រោះស្រូវ ដែលកំពុងរងផលប៉ះពាល់ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
