គិតត្រឹម៦ខែដើមឆ្នាំ២០២០ ករណីគ្រោះថ្នាក់ចរាចរណ៍ក្នុងខេត្តសៀមរាប មានចំនួនសរុប៣០ករណី មានការថយចុះចំនួន១៨ករណី បើធៀបនឹងរយៈពេលដូចគ្នាក្នុងឆ្នាំ២០១៩ នេះបើតាមការឲ្យដឹងពី លោក ពិន ប្រាកដ អភិបាលរងខេត្តសៀមរាប នៅថ្ងៃទី១៦ ខែកក្កដា ឆ្នាំ២០២០ ក្នុងឱកាសលោកអភិបាលរងខេត្ត ដឹកនាំក្រុមការងារ អនុគណៈកម្មការសុវត្ថិភាពចរាចរណ៍ផ្លូវគោកខេត្ត ចុះធ្វើការត្រួតពិនិត្យយានយន្ត នៅតាមបណ្តោយផ្លូវជាតិលេខ៦ ក្នុងភូមិសាស្ត្រ ស្រុកប្រាសាទបាគង ខេត្តសៀមរាប។
លោកអភិបាលរង បានបញ្ជាក់បន្ថែមថា តាមរបាយការណ៍របស់អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បើធៀបនឹងរយៈពេលដូចគ្នានៃឆមាសទី១ ឆ្នាំ២០១៩ និងឆ្នាំ២០២០នេះ ស្ថានភាពគ្រោះថ្នាក់ចរាចរណ៍មានភាពល្អប្រសើរ ដោយបានកាត់បន្ថយចំនួនអ្នកស្លាប់ ពី៤០នាក់ នៅឆ្នាំ២០១៩ មកនៅត្រឹម ៣៧នាក់នៅឆ្នាំ២០២០ ព្រមទាំងបានកាត់បន្ថយអ្នករងរបួសធ្ងន់ និងស្រាល ពី៦៦នាក់ នៅឆ្នាំ២០១៩ មកនៅត្រឹម ៥២នាក់។
ជាមួយនោះ លោកអភិបាលរងខេត្ត បានអំណរគុណ និងកោតសរសើរ ចំពោះប្រជាពលរដ្ឋរស់នៅក្នុងខេត្តសៀមរាបច្រើន ក៏ដូចជាអ្នកអ្នកបើកបរទាំងអស់ ដែលបានបន្តគោរពច្បាប់ចរាចរណ៍ និងយល់ដឹងពីគុណប្រយោជន៍នៃការរឹតបន្ដឹងការអនុវត្តច្បាប់ ស្ដីពីចរាចរណ៍ផ្លូវគោក។
គួរជម្រាបថា ចំពោះទិន្នន័យគ្រោះថ្នាក់ចរាចរណ៍ទូទាំងប្រទេស ៦ខែដើមឆ្នាំ២០២០នេះ មានចំនួនសរុប១,៦១៩លើក ក្នុងនោះស្លាប់ ៨១៦នាក់ និងរបួស២,៤៤៩នាក់ ដែលភាគច្រើនគ្រោះថ្នាក់ កើតមាននៅរាជធានីភ្នំពេញ ខេត្តកណ្តាល និងកំពង់ធំ។ បើប្រៀបធៀបរយៈពេល ៦ខែដើមឆ្នាំ២០១៩ និង២០២០ នៅទូទាំងប្រទេស គ្រោះថ្នាក់ចរាចរណ៍ មានការថយចុះ ៥៥២លើក ស្មើនឹង២៥ភាគរយ ស្លាប់ថយ១៧២នាក់ ស្មើនឹង១៧ភាគរយ និងរបួស៧៧៨នាក់ ស្មើនឹង២៤ភាគរយ ដែលគ្រោះថ្នាក់ភាគច្រើន កើតលើអ្នកជិះម៉ូតូមិនពាក់មួកសុវត្ថិភាព ជាពិសេសនៅពេលយប់។
អត្ថបទ ៖ លោក សេង ផល្លី
រូបភាព៖ លោក ម៉ី សុខារិទ្ធ
