នៅព្រឹកថ្ងៃទី១៦ ខែកក្កដា ឆ្នាំ២០២០ រដ្ឋបាលស្រុកពួក សហការជាមួយអង្គការទេសន្តរប្រវេសន៍អន្តរជាតិ (IOM) បានបន្តចុះផ្សព្វផ្សាយនៅតាមសហគមន៍ អំពីគ្រោះថ្នាក់បណ្ដាលមកពី ការចេញទៅធ្វើការនៅបរទេសដោយខុសច្បាប់ អំឡុងវិបត្តិជំងឺកូវីដ១៩ ស្ថិតក្នុងភូមិឈូក ឃុំត្រីញ័រ ស្រុកពួក ខេត្តសៀមរាប ដែលមានអ្នកប្រជាពលរដ្ឋក្នុងមូលដ្ឋានចូលរួម សរុប៣២នាក់ ក្នុងនោះស្រី២៣នាក់។
លោកស្រី អភិបាលរងស្រុក បង្ហាញថា ខណៈជំងឺកូវីដ១៩ នៅតែបន្តឆ្លងរីករាលដាល និងពុំមានវ៉ាក់សាំង ឬថ្នាំព្យាបាលច្បាសលាស់ ពិតជាមានគ្រោះថ្នាក់ណាស់ចំពោះការចេញទៅធ្វើការនៅបរទេស ជាពិសេសការឆ្លងដែនដោយខុសច្បាប់តាមរយៈមេខ្យល់។
ក្នុងស្ថានភាពបែបនេះ លោកស្រី អភិបាលរងស្រុក បញ្ជាក់ថា ក្រុមការងារនៃរដ្ឋបាលស្រុក តែងតែបានជំរុញ ប្រជាពលរដ្ឋនៅតាមមូលដ្ឋាន ងាកមកប្រកបរបរកសិកម្ម តាមរយៈការដាំដុះដំណាំរួមផ្សំផ្សេងៗ ការចិញ្ចឹមសត្វ ជាលក្ខណៈគ្រួសារ ដើម្បីលើកកម្ពស់ជីវភាពប្រចាំថ្ងៃ ជំនួសឲ្យការប្រថុយប្រថាន ធ្វើការចំណាកស្រុកខុសច្បាប់ ទៅក្រៅប្រទេស។ មួយវិញទៀត ការមិនធ្វើចំណាកស្រុកទៅបរទេស គឺជាការចូលរួមជាមួយរាជរដ្ឋាភិបាលកម្ពុជា ក្នុងការទប់ស្កាត់ការកើតមានជំងឺកូវីដ១៩ នៅក្នុងសហគមន៍។
លោកស្រី អភិបាលរងស្រុក ក៏បានអំពាវនាវ ដល់ប្រជាពលរដ្ឋទាំងអស់ ចូលរួមសម្អាតបរិស្ថានជុំវិញគេហដ្ឋាន ហូបស្អាត ធ្វើអនាម័យខ្លួនប្រាណឲ្យបានញឹកញាប់ ដោយ លាងសំអាតដៃជាមួយសាប៊ូ អាកុល ឬជេលសម្លាប់មេរោគ និងអនុវត្តន៍តាមគោលការណ៍សុវត្ថិភាព របស់ក្រសួងសុខាភិបាល ជៀសវាងការជុំគ្នាច្រើន។
អត្ថបទ និង រូបថត ៖ មន្ទីរព័ត៌មានខេត្តសៀមរាប
