ការរៀបចំជាផ្សារបន្លែសុវត្ថិភាពសម្រាប់ម្ហូបអាហារនៅក្នុងក្រុងសៀមរាប ដែលបានដាក់តាំងលក់នៅសួនកំសាន្ត ខាងជើងព្រះរាជដំណាក់ក្នុងក្រុងសៀមរាប នាព្រឹកថ្ងៃទី១៨ ខែកក្កដា ឆ្នាំ២០២០នេះ ដែលគាំទ្រដោយអាជ្ញាធរខេត្ត , មន្ទីរពាណិជ្ជកម្មខេត្ត , មន្ទីរកសិកម្ម រុក្ខាប្រមាញ់និងនេសាទខេត្ត និង ក្រសួងកសិកម្ម រុក្ខាប្រមាញ់និងនេសាទ កំពុងទទួលការចាប់អារម្មណ៍ពីសំណាក់ប្រជាពលរដ្ឋក្នុងក្រុងសៀមរាប ដោយសារបងប្អូនប្រជាពលរដ្ឋយ៉ាងច្រើនកុះករបាននាំគ្នាមកទិញបន្លែធម្មជាតិនៅតំបន់នេះ ។
លោក ភឿន គឹម លី ប្រធានមន្ទីរពាណិជ្ជកម្មខេត្តសៀមរាប បានឲ្យដឹងថា គោលបំណងនៃការរៀបចំជាផ្សារបន្លែសុវត្ថិភាពសម្រាប់ម្ហូបអាហារនាពេលនេះ គឺដើម្បីជួយជំរុញទីផ្សារបន្លែសុវត្ថិភាពរបស់សហគមន៍បងប្អូននៅតាមស្រុកមួយចំនួនក្នុងខេត្តសៀមរាប រួមមាន ៖ ស្រុកស្វាយលើ , ស្រុកបន្ទាយស្រី , ស្រុកសូទ្រនិគម , ស្រុកប្រាសាទបាគង ,ក្រុងសៀមរាប និង ស្រុកពួក ដែលមានបន្លែធម្មជាតិជាច្រើនមុខ ឲ្យកាន់តែមានភាពល្អប្រសើរថែមទៀត
លោក ភឿន គឹម លី បានបញ្ជាក់ទៀតថា នៅពេលនេះ យើងបានរៀបចំជាស្តង់លក់មានចំនួន ១១ស្តង់ ប៉ុន្តែខែក្រោយនេះ យើងនឹងន្ថែមចំនួន ៥ ស្តង់ទៀតសម្រាប់ការដាក់លក់បន្លែទាំងនោះហើយ រហូតដល់ឆ្នាំក្រោយអាជ្ញាធរពាក់ព័ន្ធ គ្រោងនឹងបង្កើតស្តង់សម្រាប់បងប្អូនសហគមន៍លក់នៅពេលល្ងាចៗ ដូចជាលក់ផ្លែឈើគ្រប់ប្រភេទជាដើម បន្ទាប់ពីជម្ងឹកូវីដ.១៩ បានស្ងប់ស្ងាត់ ប៉ុន្តែឥឡូវយើងលក់បន្លែសុវត្ថិភាពបានតែពេលព្រឹកប៉ុណ្ណោះ គឹចាប់ពីម៉ោង ៧:០០នាទី រហូតដល់ម៉ោង ១១:០០នាទី ថ្ងៃត្រង់ សម្រាប់តែថ្ងៃសៅរ៍ និងថ្ងៃអាទិត្យ ។
លោក ភឿន គឹម លី បានបញ្ជាក់បន្ថែមទៀតថា ចំពោះបន្លែធម្មជាតិនេះ គឺនៅពេលដែលប្រជាពលរដ្ឋបានដាំដុះប្រើតែជីធ្វើពីធម្មជាតិ ដែលគេហៅថា ជីកំប៉ុស្តិ៍ធ្វើពីរុក្ខជាតិតូចៗ លាយអាចម៍គោ និងអាចម៍មាន់។ល។ ហើយមិនបានប្រើប្រាស់ជីសារធាតុគីមីឡើយ ហើយមិនថ្លៃជាងតម្លៃលក់នៅតាមទីផ្សារនានានោះទេ គឺតម្លៃសមរម្យបំផុតសម្រាប់បងប្អូនប្រជាពលរដ្ឋយើង ។
គួររំលឹកថា រយៈកាលកន្លងមក ឯកឧត្តម ទៀ សីហា អភិបាល នៃគណៈអភិបាលខេត្ត និងលោកជំទាវ តែងតែអញ្ជើញចុះជួបជាមួយបងប្អូនអាជីវករលក់ដូរនៅផ្សារបន្លែសុវត្ថិភាព នឹងជួយគាំទ្រផលិទ្ធផលក្នុងស្រុកស្ទើរតែជារៀងរាល់ចុងសប្តាហ៍ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
