ដំណាំស្រូវរបស់ប្រជាពលរដ្ឋជាង៥០០ហិកតា នៅក្នុងឃុំតាអាន និងឃុំចន្លាស់ដៃ នៃស្រុកក្រឡាញ់ ដែលកំពុងទទួលរងគ្រោះដោយសារខ្វះខាតទឹកនោះ ត្រូវបានជួយសង្គ្រោះទាន់ពេលវេលាពីក្រសួងធនធានទឹក និងឧតុនិយម ដោយបានប្រើប្រាស់ម៉ាស៊ីនបូមទឹកចំនួន០៤គ្រឿង សម្រាប់អន្តរាគមន៍បូមទឹក និង អ៊ិចស្កាវាទ័រចំនួន០៣គ្រឿង សម្រាប់កាយប្រឡាយទឹក ។
ក្នុងឱកាសចុះពិនិត្យស្ថានភាពបូមទឹកជួយសង្គ្រោះដំណាំស្រូវរបស់ប្រជាពលរដ្ឋនៅក្នុងឃុំទាំងពីរនៃស្រុកក្រឡាញ់ កាលពីថ្ងៃទី១៧ ខែកក្កដា ឆ្នាំ២០២០នេះ ឯកឧត្តម ពេជ្រ វាសនា ជាប្រធានមុខព្រួញចុះជួយខេត្តសៀមរាប និងជាអនុរដ្ឋលេខាធិការ ក្រសួងធនធានទឹក និងឧតុនិយម បានមានប្រសាសន៍ថា ទឹកដែលបានបូមដាក់ស្រែនេះ ត្រូវបាននាំយកមកពីខេត្ដឧត្ដមានជ័យ ដែលមានចំង៉ាយប្រមាណ៤០គីឡូតាមស្ទឹងស្រែង តាំងពីថ្ងៃទី១៤ ខែកក្កដាមកម្លេះ ហើយស្រូវដែលខ្វះទឹកស្រោចស្រពនេះ ត្រូវបញ្ចូលទឹករយៈពេលមួយសប្ដាហ៍ ទើបអាចជួយសង្គ្រោះស្រូវដែលបានប្រឈមនឹងខូចខាតនោះ ឲ្យមានភាពល្អប្រសើរជាងមុន ខណៈពេលនេះកម្លាំងក្រសួង និងមន្ទីរធនធនាទឹក និងឧតុនិយមខេត្ដសៀមរាប បានសហការគ្នាជាមួយអាជ្ញាធរមូលដ្ឋាន និងសហគមន៍ ដើម្បីជួយបូបទឹកដាក់ស្រែហើយនោះឃើញថាស្រូវវស្សាទាំងនោះនឹងអាចផ្ដល់ទិន្នផលស្រូវជាធម្មតា ។
លោក ស្រឹប សារៀម តំណាសហគមន៍ប្រើប្រាស់ទឹកស្ពានស្រែង ត្រពាំងអំបិល ស្រុកក្រឡាញ់ ខេត្ដសៀមរាប បានមានប្រសាសន៍ថា ស្រូវដែលជួបគ្រោះរាំងស្ងួតនេះ មានរយៈពេលមួយសប្ដាហ៍មកហើយ ដោយសារមិនមានភ្លៀងធ្លាក់ ហើយប្រសិនបើមិនមានការជួយអន្ដរាគមន៍ពីក្រសួងនិងមន្ទីរធនធានទឹកនាំទឹកមកពីប្រភពខាងលើនោះទេ ស្រូវប្រជាកសិករអាចនឹងខូចខាត ព្រោះថារដូវវស្សាទៅហើយបែរជាមិនមានភ្លៀងធ្លាក់ស្រោចស្រពស្រូវស្រែគ្រប់គ្រាន់ទៅវិញ ដូច្នេះតាមរយៈនេះ ក្នុងនាមប្រជាពលរដ្ឋនៅក្នុងឃុំទាំងពីរនៃស្រុកក្រឡាញ់ សូមថ្លែងអំណរគុណដល់រាជរដ្ឋាភិបាល ជាពិសេសក្រសួងធនធានទឹក និងឧតុនិយម ដែលបានយកចិត្ដទុកដាក់ក្នុងបូបទឹកជួយសង្គ្រោះស្រូវប្រជាពលរដ្ឋនៅតំបន់បានទាន់ពេលវេលា ៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត