នាថ្ងៃទី១៧ ខែកក្កដា ឆ្នាំ២០២០ លោក លី សំរិទ្ធ អភិបាលរងខេត្តសៀមរាប បានដឹកនាំប្រតិភូ អញ្ជើញចូលរួមកិច្ចប្រជុំទីក្រុងវៃឆ្លាតអាស៊ានលើកទី៣ នៅទីស្តីការក្រសួងមហាផ្ទៃ តាមប្រព័ន្ធអនឡាញ(Video conference) ដែលមានសាធារណរដ្ឋសង្គមនិយមវៀតណាម ជាម្ចាស់ផ្ទះ និងជាប្រធានកិច្ចប្រជុំ រួមនិងវត្តមានចូលរួមពី ខេត្ត-ក្រុងអន្តរជាតិចំនួន២៦ នៃបណ្តាប្រទេសអាស៊ាន។
ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ និង ជាប្រធានប្រតិភូនៃព្រះរាជាណាចក្រកម្ពុជា បានលើកឡើងនូវវឌ្ឍនភាព បញ្ហាប្រឈមមួយចំនួន នៃការអនុវត្តផែនការសកម្មភាពទីក្រុងវៃឆ្លាត ក្នុងតំបន់រដ្ឋបាលទាំងបីរបស់ព្រះរាជាណាចក្រកម្ពុជា និង បញ្ហាជំងឺកូវីដ១៩ នៅក្នុងកិច្ចប្រជុំនេះ។
នៅក្នុងកិច្ចប្រជុំទីក្រុងវៃឆ្លាតអាស៊ានលើកទី៣នេះដែរ អង្គប្រជុំបានអនុម័តគោលការណ៍ ២ចំណុចរួមមាន ៖
១- អនុម័តរៀបចំក្របខណ្ឌត្រួតពិនិត្យ និងវាយតម្លៃបណ្តាញទីក្រុងវៃឆ្លាតអាស៊ាន(ASCN) ដែលមានគោលការណ៍ណែនាំ ក្នុងលក្ខណៈសាមញ្ញ និងជាក់ស្តែង ហើយការទំនាក់ទំនងនានា អាចប្រព្រឹត្តទៅតាមរយៈរដ្ឋាភិបាល ឬ ផ្ទាល់ជាមួយខេត្ត-ក្រុង ដែលជាសមាជិកទីក្រុងវៃឆ្លាតអាស៊ាន។
២- អនុម័តសម្រាប់ការពង្រឹងភាពជាដៃគូបន្ថែមទៀត ដើម្បីទទួលបាននូវបទពិសោធន៍ និងគំនិតថ្មីៗ អំពីការរៀបចំទីក្រុងវៃឆ្លាត ដោយឯកភាពអនុញ្ញាត ឲ្យពង្រីកបន្ថែមសមាជិកភាព បណ្តាញទីក្រុងវៃឆ្លាតអាស៊ាន (ASCN) នៅឆ្នាំ២០២០។
បន្ទាប់ពីការអនុម័តចំណុចខាងលើ អង្គប្រជុំនឹងពិនិត្យអំពីវឌ្ឍនភាពការងាររៀបចំទីក្រុងវៃឆ្លាត នៃប្រទេសនីមួយៗ និងកិច្ចប្រឹងប្រែងរួម ពាក់ព័ន្ធទៅនឹងការប្រយុទ្ធប្រឆាំងការរាតត្បាតនៃជំងឺកូវីដ១៩ នៃរដ្ឋាភិបាលក្នុងតំបន់៕
អត្ថបទ ៖ មន្ទីរព័ត៌មានខេត្តសៀមរាប
រូបថត ៖ រដ្ឋបាលខេត្តសៀមរាប
