កាលពីថ្ងៃទី២២ ខែកក្កដា ឆ្នាំ២០២០ គ្រួសារក្រីក្រ ប្រភេទក្រ១ និងក្រ២ ចំនួន១០គ្រួសារ សម្រាប់ជំហានទី១ ក្នុងឃុំក្រឡាញ់ និងឃុំតាអាន ស្ថិតក្នុងស្រុកក្រឡាញ់ ខេត្តសៀមរាប ត្រូវបានជ្រើសរើស ចូលក្នុងយុទ្ធនាការផ្តល់ទុន លើកកម្ពស់ជីវភាព តាមរយៈការចិញ្ចឹមកង្កែប និងដាំដុះឫស្សីទំពាំងផ្អែម។
យុទ្ធនាការលើកកម្ពស់ជីវភាព តាមរយៈវិស័យកសិកម្មនេះ ជាគំនិតផ្ដួចផ្ដើម ឯកឧត្តម ជា ច័ន្ទបរិបូណ៌ រដ្ឋលេខាធិការក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះពង្រឹងមូលដ្ឋានស្រុកក្រឡាញ់ ខេត្តសៀមរាប ស្របតាមអនុសាសន៍ របស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីឆ្លើយតបទៅនឹងផលប៉ះពាល់នៃវិបត្តិកូវីដ១៩ និងចៀសវាងការធ្វើចំណាកស្រុកទៅធ្វើការដោយខុសច្បាប់ នៅបរទេស។
សម្រាប់ជំហានទី១នេះ គ្រួសារក្រីក្រ ប្រភេទក្រ១ និងក្រ២ ចំនួន១០គ្រួសារទទួលបានពូជកូនឫស្សីទំពាំងផ្អែមមួយចំនួន និង ថវិកាក្នុងមួយគ្រួសារ ចំនួន ៣៥៣,០០០រៀល ដើម្បីចំណាយថ្លៃទិញកូនកង្កែ ចំនួន ៥០០ក្បាល ការធ្វើទ្រុង និងថ្លៃចំណី ដែលជាថវិកាផ្ទាល់របស់ឯកឧត្តម ជា ច័ន្ទបរិបូណ៌ និងសប្បុរសជន។ ចំពោះបច្ចេកទេសដាំដុះ និងចិញ្ចឹមកង្កែប ឯកឧត្តមប្រធានក្រុមការងារ បានណែនាំដល់រដ្ឋបាលស្រុក អញ្ជើញយុវជនទទួលជ័យលាភី ចលនាប្រឡងប្រណាំងដាំដំណាំ និងចិញ្ចឹមសត្វកំដរឆ្នាំង ចំនួន២រូប ដើម្បីជួយដល់ប្រជាពលរដ្ឋទាំង១០គ្រួសារនោះ។ នៅពេលប្រមូលផល កង្កែប និងទំពាំងផ្អែម រដ្ឋបាលស្រុក នឹងសហការជាមួយមន្ទីរកសិកម្ម រុក្ខាប្រមាញ់ និងនេសាទ រកទីផ្សារជូនប្រជាពលរដ្ឋផងដែរ។
តាមការឲ្យដឹងពីតំណាងរបស់ ឯកឧត្តមប្រធានក្រុមការងាររាជរដ្ឋាភិបាលចុះពង្រឹងមូលដ្ឋានស្រុកក្រឡាញ់ ប្រសិនបើយុទ្ធនាការលើកកម្ពស់ជីវភាព តាមរយៈវិស័យកសិកម្មនេះ ទទួលបានជោគជ័យ ឯកឧត្តមប្រធានក្រុមការងារ នឹងបន្តយុទ្ធនាការនេះ ដោយប្រមូលថវិកាពីសប្បុរសជនបន្ថែមទៀត ជួយដល់គ្រួសារក្រីក្រក្នុងស្រុកក្រឡាញ់។
សូមជម្រាបថា តាមសេចក្ដីរាយការណ៍របស លោកស្រីអភិបាលស្រុកក្រឡាញ់ ការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រក្នុងអំឡុងពេលប្រយុទ្ធប្រឆាំងនឹងជំងឺកូវីដ-១៩ ស្រុកក្រឡាញ់មានគ្រួសារក្រីក្រ សរុប ១,៨១៨គ្រួសារ ក្នុងនោះ គ្រួសារក្រ១ ចំនួន ៤៦១គ្រួសារ និងគ្រួសារក្រ២ ១,៣៥៧គ្រួសារ។
អត្ថបទ និងរូបភាព៖ លោក យូ វង្ស
កែសម្រួលអត្ថបទ៖ លោក សេង ផល្លី
