អ្នកជំនាញអង្គការកែច្នៃសំរាម និងការសិក្សានៅកម្ពុជា (COMPED) នឹងចំណាយរយៈពេល ៣ខែ ធ្វើការសាកល្បងសម្អាតសំរាម ចក ស្លែ សារាយ ជាដើម ពីក្នុងទឹកស្ទឺង ក្នុងក្រុងសៀមរាប ដោយប្រើទូក ស៊ីហាមស្តើ (Seehamster)ចំនួន ១គ្រឿង ជាមួយបុគ្គលិក ៤នាក់ នេះបើតាមការលើកឡើងរបស់ លោក សំ ផល្លា នាយកអង្គការ ក្នុង”យុទ្ធនាការសម្អាតស្ទឹងសៀមរាប” នៅក្នុងក្រុងសៀមរាប ព្រឹកថ្ងៃទី២៣ ខែកក្កដា ឆ្នាំ២០២០។
លោកនាយកអង្គការ លើកឡើថា គម្រោងសាកល្បងសម្អាតទឹកស្ទឹងសៀមរាបនេះ រៀបចំដោយអង្គការ COMPED គាំទ្រថវិកាដោយអង្គការផែនដីមួយ សាគរមួយ (O.E.O.O) និងមានកិច្ចសហការពីរដ្ឋបាលក្រុងសៀមរាប ។ គម្រោងនេះដែរ ជាគម្រោងទី២ បន្ទាប់ពីគម្រោង សម្អាតទឹកស្ទឹងសង្កែ ខេត្តបាត់ដំបង ដែលគិតមកដល់ពេលនេះ មានរយៈពេលជិត៣ឆ្នាំហើយ។
លោកបញ្ជាក់ថា គម្រោងសម្អាតទឹកស្ទឹងសៀមរាបនេះ មានការលំបាក ជាងគម្រោងនៅស្ទឹងសង្កែ ដោយសារតែទូកនេះ មានសមត្ថភាព ប្រមូលតែសំរាមលើទឹកប៉ុណ្ណោះ រីឯប្រភេទរុក្ខជាតិទឹក ក្នុងស្ទឹងសៀមរាប ដែលមានឬសចាក់ទៅក្នុងបាតស្ទឹង ទូកប្រភេទនេះ មានការលំបាកក្នុងការប្រមូល ដែលទាមទារឲ្យមានការសិក្សា និងបំពាក់ឧបករណ៍បន្ថែម តែទោះជាយ៉ាងណាក៏ដោយ លោកនៅតែ មានការតាំងចិត្តខ្ពស់ ដើម្បីធ្វើឲ្យទឹកស្ទឹងសៀមរាប មានភាពស្រស់បំព្រងឡើងវិញ។
ថ្លែងក្នុងឱកាសនោះ លោកស្រី លឹម ផល្លីកា អភិបាលរងក្រុងសៀមរាប លើកឡើងថា សកម្មភាពមួយចំនួនត្រូវបានផ្អាក
ដោយសារបញ្ហានៃជំងឺកូវីដ១៩ សកម្មភាពមួយចំនួនត្រូវបានផ្អាក ប៉ុន្តែរដ្ឋបាលក្រុងពុំបាន បោះបង់ចោល ឬព្រងើយកន្តើយ ចំពោះការរៀបចំបរិស្ថាន ជាពិសេសពាក់ព័ន្ធនឹងបញ្ហាសំរាម សំណល់រឹង ក្នុងក្រុងសៀមរាបនោះឡើយ។ ជាក់ស្ដែង ក្រុងសៀមរាប គឺជាបេក្ខភាពទីក្រុងស្អាត ទទួលបានជ័យលាភីទីក្រុងស្អាតអាស៊ាន និងជ័យលាភីថ្នាក់ជាតិ ផ្ការំដួលបីទង ដែលសមិទ្ធផលទាំងនេះ គឺជាស្នាដៃកើតចេញពីការខិតខំប្រឹងប្រែងរបស់អាជ្ញាធរគ្រប់លំដាប់ថ្នាក់ អង្គការដៃគូ ក្រុមហ៊ុនឯកជន ជាពិសេសការចូលរួមរបស់បងប្អូនប្រជាពលរដ្ឋទាំងអស់ ដែលបានរួមចំណែក យ៉ាងផុសផុលក្នុងការសម្អាតអនាម័យបរិស្ថានក្នុងក្រុងសៀមរាបរបស់យើងនាពេលកន្លងមក ។
លោកស្រីអភិបាលរងក្រុង ក៏បានអំពាវនាវដល់ ប្រជាពលរដ្ឋ ចូលរួមសម្អាតបរិស្ថានក្នុងក្រុងទាំងអស់គ្នា រួមទាំងញែកសំរាមឲ្យបានត្រឹមត្រូវ ជាពិសេសបញ្ឈប់សកម្មភាពបោះចោលសំរាមផ្តេសផ្តាសឲ្យបានគ្រប់ៗគ្នា។
អត្ថបទ និងរូបភាព៖ លោក យូ វង្ស និងលោក ងិន គឺមឡេង
កែសម្រួលអត្ថបទ៖ លោក សេង ផល្លី
