នៅព្រឹកថ្ងៃទី២៤ ខែកក្កដា ឆ្នាំ២០២០នេះ លោកស្រី យូ សុភា អភិបាលរងខេត្តសៀមរាប បានដឹកនាំប្រតិភូជាថ្នាក់ដឹកនាំមន្ទីរ អង្គភាពមួយចំនួនក្នុងខេត្ត និង អង្គការដៃគូ ចុះសាកសួរសុខទុក្ខបងប្អូនប្រជាពលរដ្ឋដែលកំពុងធ្វើចត្តាឡីស័ក នៅមណ្ឌលចត្តាឡីស័កសាលាបឋមសិក្សាបត់ ក្នុងឃុំដូនពេង ស្រុកអង្គរជុំ បន្ទាប់ពីពួកគាត់ទើបត្រឡប់មកពីក្រៅប្រទេស ។
មានប្រសាសន៍ក្នុងឱកាសនេះ លោកស្រី យូ សុភា បានបញ្ជាក់ថា បើទោះបីនៅកម្ពុជាយើង ពុំមានអ្នកឆ្លងជំងឺកូវីដ១៩ ច្រើនដូចប្រទេសនានាក្នុងពិភពលោក និង ពុំមានអ្នកស្លាប់ដោយជំងឺកូវីដ១៩ ក៏ដោយ ក៏យើងទាំងអស់គ្នា មិនត្រូវបន្ថូរបន្ថយ ឬធ្វេសប្រហែសឡើង ដោយត្រូវចូលរួមសហការគ្នាទប់ស្កាត់ និង ការការពារ ជាពិសេសការប្រយុទ្ធប្រឆាំងការឆ្លងរាលដាលនូវជំងឺកូវីដ១៩ តាមការណែនាំរបស់រាជរដ្ឋាភិបាល និង ក្រសួងសុខាភិបាល ព្រមទាំងឲ្យអាជ្ញាធរគ្រប់ជាន់ថ្នាក់ ខណៈបច្ចុប្បន្ននេះ ការឆ្លងរាលដាលនៃជំងឺកូវីដ១៩ នៅក្នុងទូទាំងពិភពលោក មិនទាន់មានសញ្ញាណាមួយដែលថមថយឡើយ ដូច្នេះក្នុងនាមឯកឧត្តមអភិបាលខេត្តសៀមរាប សូមថ្លែងអំណរគុណដល់បងប្អូនប្រជាពលរដ្ឋទាំងអស់ ដែលបានសហការល្អជាមួយអាជ្ញាធរគ្រប់លំដាប់ថ្នាក់ ហើយកំពុងធ្វើចត្តាឡីស័កនៅតាមមណ្ឌលចត្តាឡីស័កនានាក្នុងទូទាំងខេត្ត ដូច្នេះសូមបងប្អូនទាំងអស់មេត្តាយោគយល់ ហើយត្រូវយល់ថា នេះមិនមែនជាការឃុំខ្លួននោះទេ គោលបំណងតែមួយគត់របស់ប្រមុខរាជរដ្ឋាភិបាលកម្ពជាយើង ដែលមានសម្ដេចតេជោ ហ៊ុន សែន ជានាយករដ្ឋមន្ត្រី គឺដើម្បីខ្លួនយើង ក្រុមគ្រួសារយើង និង សហគមន៍របស់យើង គ្មានជំងឺកូវីដ១៩ ។
លោកស្រីអភិបាលរងខេត្តសៀមរាប មានប្រសាសន៍បន្ថែមថា បច្ចុប្បន្ននេះ ប្រមុខរាជរដ្ឋាភិបាលកម្ពជាបាននឹងកំពុងឧបត្ថម្ភជាថវិកា ដល់បងប្អូនប្រជាពលរដ្ឋក្រីក្រ ដែលប៉ះពាល់ដល់ជីវភាពរស់នៅប្រចាំថ្ងៃ ដោយសារជំងឺកូវីដ១៩ តាមរយៈប័ណ្ណសមធម៌ ហើយចំពោះបងប្អូនដែលនៅទីនេះយល់ថា ខ្លួនពិតជាខ្វះខាតប្រាកដមែននេះ សូមប្រាប់ទៅអាជ្ញាធរឃុំ ដើម្បីធ្វើការសម្ភាសន៍ ប៉ុន្តែបើបងប្អូនមិនបានប៉ះពាល់ជីវភាពខ្លាំងទេនោះ ពេលត្រឡប់ទៅមូលដ្ឋានវិញ គួរតែគិតគូឡើងវិញពីការប្រកបមុខរបរបន្ថែមដើម្បីដោះស្រាយជីវភាពប្រចាំថ្ងៃ ដូចជាការចិញ្ចឹមសត្វ និង ការដាំដំណាំបន្លែផ្សេងៗ ហើយកុំព្យាយាមចេញទៅរកការងារនៅក្រៅប្រទេសដោយប្រថុយប្រថានទៀត ព្រោះថា ដោយសារបញ្ហាជំងឺកូវីដ១៩នេះ គ្រប់ប្រទេសទាំងអស់ បានបិទការធ្វើចរាចរណ៍តាមព្រំដែនហើយ ហើយកុំចាញ់បោកមេខ្យល់ទៀត ។
ជាមួយគ្នានេះដែរ លោកស្រី យូ សុភា អភិបាលរងខេត្តសៀមរាប បានផ្តាំផ្ញើដល់បងប្អូនទាំងអស់ ស្ដាប់តាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល ក្នុងការទប់ស្កាត់ និង ការពារការឆ្លងរាលដាលនូវជំងឺកូវីដ១៩ ដោយត្រូវថែរក្សាសុខភាព និង រក្សាអនាម័យរបស់ខ្លួនឲ្យបានជាប្រចាំ ដូចជាការដៃនឹង សាប៊ូ , អាល់កុល ឬ ជែល និង ត្រូវពាក់ម៉ាស់ឲ្យបានត្រឹមត្រូវ និងគ្រប់គ្នា ទាំងក្នុងពេលជួបប្រាស្រ័យជាមួយមនុស្សគ្រប់គ្នា និង ធ្វើដំណើរតាមទីសាធារណៈ ពិសេសត្រូវរក្សាឲ្យបាននូវគម្លាតសុវត្ថិភាព ។
ក្នុងឱកាសនោះដែរ លោកស្រី យូ សុភា បានជូននូវអំណោយដល់បងប្អូនប្រជាពលរដ្ឋកំពុងធ្វើចត្តាឡីស័ក ជាគ្រឿងឧបភោគបរិភោគ ក្នុងម្នាក់មួយកញ្ចប់ មានចំនួន ១៣មុខ រួមមាន ៖ ច្រាសដុសធ្មេញ , ថ្នាំដុសធ្មេញ , សាប៊ូលុច្ស , សាប៊ូកក់សក់Clear , សាប៊ូម្សៅ (Lix Lemon) , កន្ទេល , មុង ភួយ , អាវយឺត , ខោខ្លី , កន្សែងពោះគោ , ស្បែកជើងផ្ទាត់ និង សំឡីអនាម័យផងដែរ ដែលជាអំណោយរបស់អង្គការ IOM ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
