សៀមរាប៖ នៅព្រឹកថ្ងៃទី២៥ ខែកក្កដា ឆ្នាំ២០២០នេះ នៅ សាលប្រជុំមន្ទីរព័ត៌មានខេត្តសៀមរាប មានបើកកិច្ចប្រជុំបូកសរុបសកម្មភាពការងារប្រចាំឆមាសទី០១ និង លើកទិសដៅអនុវត្តបន្តប្រចាំឆមាសទី០២ ឆ្នាំ២០២០ របស់មន្ទីរព័ត៌មានខេត្ត ក្រោមការដឹកនាំរបស់លោក លីវ សុខុន ប្រធានមន្ទីរព័ត៌មានខេត្តសៀមរាប ដោយមានការចូលរួមពីសំណាក់លោក លោកស្រី ជាអនុប្រធានមន្ទីរ ថ្នាក់ដឹកនាំការិយាល័យចំណុះមន្ទីរ និង មន្ត្រីសំខាន់ៗមួយចំនួនទៀត ។
លោក លីវ សុខុន ប្រធានមន្ទីរព័ត៌មានខេត្តសៀមរាប មានប្រសាសន៍ថា តាមពិតទៅថ្ងៃនេះជាថ្ងៃឈប់សម្រាករបស់មន្ត្រីរាជការ ប៉ុន្តែដោយសារមន្ត្រីយើងទាំងអស់សុទ្ធតែមានកិច្ចការមមាញឹកខ្លាំងក្នុងការអនុវត្តបំពេញភារកិច្ចតាមតួនាទីរបស់ខ្លួនលើវិស័យព័ត៌មាន ទាំងផ្នែកវិទ្យុ និង ទូរទស្សន៍ ជាពិសេសក្នុងដំណាក់កាលនៃជំងឺកូវីដ១៩ ដូច្នេះមានតែថ្ងៃឈប់សម្រាកទេ ដែលមន្ត្រីយើងមានពេលវេលាអាចជួបជុំគ្នាបាន ដើម្បីប្រជុំពិភាក្សាគ្នា ឆ្លុះបញ្ចាំងលើចំណុចលទ្ធផលដែលសម្រេចបាន និង ចំណុចអសកម្មទាំងឡាយក្នុងឆមាសទី០១ សម្រាប់ដកស្រង់ជាបទពិសោធន៍យកទៅអនុវត្តបន្តនៅឆមាសទី០២ ឲ្យកាន់តែល្អប្រសើរ និង មានប្រសិទ្ធភាពថែមទៀត ។
លោក លីវ សុខុន មានប្រសាសន៍ទៀតថា ផ្អែកតាមរបាយការណ៍ប្រចាំឆមាសទី០១ ឆ្នាំ២០២០នេះ យើងសម្គាល់បានថា មន្ត្រីយើងទាំងអស់បានខិតខំប្រឹងប្រែងក្នុងការចុះយកព័ត៌មាន ការសរសេរនិងផលិតព័ត៌មាន និង ការផ្សព្វផ្សាយព័ត៌មាន ដោយទទួលបានលទ្ធផលល្អប្រសើរ បើទោះបីជាស្ថិតក្នុងដំណាក់កាលនៃជំងឺកូវីដ១៩ ដែលអាជ្ញាធរខេត្ត ក៏ដូចជាអង្គភាពនានាក្នុងខេត្ត បន្ថយសកម្មភាពរបស់ខ្លួនក៏ដោយ ក៏ធ្វើឲ្យតួលេខនៃការផ្សាយព័ត៌មានរបស់យើង នៅតែមានចំនួនច្រើនដដែល ជាពិសេសជុំវិញការផ្សព្វផ្សាយអំពីការបង្ការ ការការពារ និង ការទប់ស្កាត់ការឆ្លងរាលដាលជំងឺកូវីដ១៩ ទៅក្នុងសហគមន៍របស់យើង ។
ព័ត៌មានជាតិ ថ្មីៗ
លោកប្រធានមន្ទីរព័ត៌មានខេត្តសៀមរាប មានប្រសាសន៍បន្ថែមទៀតថា ទោះជាយ៉ាងនេះក្ដី ជាគោលការណ៍ និង ជាផែនការរបស់មន្ទីរលើវិស័យផ្សព្វផ្សាយព័ត៌មាននោះ បើផ្អែកតាមសកម្មភាពការងារកន្លងមកនេះ នៅមិនទាន់ឆ្លើយតបបានតាមតម្រូវការដែលមន្ទីរចង់បាននោះទេ ដូច្នេះដើម្បីសម្រេចបានតាមចក្ខុវិស័យរបស់មន្ទីរ សូមឲ្យមន្ត្រីទាំងអស់បង្កើនសកម្មភាពរបស់ខ្លួនបន្ថែមទៀត ដូចជាការស្វែងរកព័ត៌មាន និង ការផលិតព័ត៌មានដែលខ្លឹមសារល្អ មានតម្លៃ និង មានប្រយោជន៍សម្រាប់អ្នកមើលនិងអ្នកស្តាប់របស់យើង ស្របទៅនឹងគោលការណ៍ និង គោលនយោបាយរបស់រាជរដ្ឋាភិបាល ដែលបានបំផុសឲ្យប្រជាពលរដ្ឋងាកមកប្រកបមុខរបរក្នុងស្រុកវិញ ដូចជាបង្កើនការចិញ្ចឹមសត្វ ការងារបង្កបង្កើនផលស្រូវ និង ការដាំដំណាំរួមផ្សំគ្រប់ប្រភេទ ដើម្បីបង្កើនជីវភាពរស់នៅប្រចាំថ្ងៃរបស់ខ្លួន ក្នុងដំណាក់កាលនៃវិបត្តិជំងឺកូវីដ១៩ ដែលកំពុងរាតត្បាតក្នុងទូទាំងពិភពលោក ៕
#មន្ទីរព័ត៌មានខេត្តសៀមរាប
