នៅព្រឹកថ្ងៃទី២៧ ខែកក្កដា ឆ្នាំ២០២០ ម៉ាស៊ីនពិសោធន៍ធ្វើតេស្តរកមេរោគកូវីដ១៩ ថ្នាក់ខេត្តដំបូងគេ បានចាប់ផ្ដើមរៀបចំតម្លើងហើយ នៅក្នុងមន្ទីរពិសោធន៍ នៃមន្ទីរពេទ្យបង្អែកខេត្តសៀមរាប និងរង់ចាំការត្រួតពិនិត្យពីអ្នកជំនាញរបស់អង្គការសុខភាពពិភពលោក ហៅកាត់ថា WHO នេះបើតាមប្រសាសន៍លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប។
លោកប្រធានមន្ទីរសុខាភិបាលខេត្ត បញ្ជាក់ថា នាពេលកន្លងមក មន្ទីរពិសោធន៍របស់មន្ទីរពេទ្យបង្អែកខេត្តសៀមរាប គឺមានសមត្ថភាពប្រមូលយកសំណាកអ្នកសង្ស័យ ឬអ្នកជំងឺកូវីដ១៩ បញ្ជូនទៅពិនិត្យស្វែងរកមេរោគកូវីដ១៩ នៅវិទ្យាស្ថានប៉ាស្ទ័រ រាជធានីភ្នំពេញប៉ុណ្ណោះ។ ប៉ុន្តែ បន្ទាប់ពីម៉ាស៊ីនពិសោធន៍ធ្វើតេស្តរកមេរោគកូវីដ១៩ តម្លើងបានសម្រេច និងមានការទទួលស្គាល់ពីWHO សំណាកអ្នកសង្ស័យ ឬអ្នកជំងឺកូវីដ១៩ ដោយពុំចាំបាច់ទៅរាជធានីភ្នំពេញទៀតឡើយ គឺលទ្ទផល ដែលទទួលបានពីម៉ាស៊ីនពិសោធន៍ធ្វើតេស្តរកមេរោគកូវីដ១៩នេះ មានភាពត្រឹមត្រូវដូចនឹង ម៉ាស៊ីន វិទ្យាស្ថានប៉ាស្ទ័រដែរ។
លោកប្រធានមន្ទីរសុខាភិបាលខេត្ត ក៏បានបញ្ជាក់ផងដែរថា ដោយមានបទបញ្ជា និងការយកចិត្តទុកដាក់ខ្ពស់ ពី ឯកឧត្តម ទៀ សីហា អភិបាលខេត្តសៀមរាប និងអាជ្ញាធរខេត្តគ្រប់ជាន់ថ្នាក់ ការគ្រប់គ្រងចំនួនប្រជាពរដ្ឋត្រឡប់ពីបរទេសចូលមកខេត្តសៀមរាប ទទួលបានប្រសិទ្ធភាព ដោយឯកឧត្តមអភិបាលខេត្ត បានចាត់ លោកអភិបាលរងខេត្ត ពីររូប ដើម្បីទៅទទួល និងដឹកជញ្ជូនដោយផ្ទាល់ពិច្រកព្រំដែនអន្តរជាតិនានា មកកាន់ខេត្តសៀមរាប។ ដោយឡែក បច្ចុប្បន្ន រដ្ឋលេខាធិការដ្ឋានអាកាសចរណ៍ស៊ីវិលកម្ពុជា រួមនិងព្រលានយន្តហោះអន្តរជាតិខេត្តសៀមរាប ពុំអនុញ្ញាតឲ្យទទួលជើងហោះហើរពីបរទេសឡើយ។
គួរជម្រាបថា ក្រៅពី សៀមរាប មន្ទីរពិសោធន៍ធ្វើតេស្តរកមេរោគកូវីដ១៩ គម្រោងនឹងរៀបចំបន្ថែមទៀត ខេត្តបាត់ដំបង និងខេត្តកំពង់ចាម។
អត្ថបទ និងរូបភាព: លោក ស៊ាន សុផាត និងលោក យូ វង្ស
កែសម្រួលដោយ៖ លោក សេង ផល្លី
