លោក ឃឹម ហ្វីណង់ អភិបាលស្រុកបន្ទាយស្រី មានប្រសាសន៍នៅព្រឹកថ្ងៃទី២៧ ខែកក្កដា ឆ្នាំ២០២០នេះថា ស្របពេលដែលប្រមុខរាជរដ្ឋាភិបាលកម្ពុជា កំពុងធ្វើសិក្សាពីលទ្ធភាពកាត់ឆ្វៀល និងផ្តល់កម្មសិទ្ធិជូនដល់ប្រជាពលរដ្ឋដែលបានកាន់កាប់ និងអាស្រ័យផលជាក់ស្តែងយូរឆ្នាំនៅលើដីសាធារណៈរបស់រដ្ឋនោះ រដ្ឋបាលស្រុកបន្ទាយស្រីចាំបាច់ត្រូវប្រមូល និងគ្រប់គ្រងរាល់ទិន្នន័យពាក់ព័ន្ធនឹងបញ្ហាដីធ្លីនេះពីថ្នាក់មូលដ្ឋានផ្ទាល់ឲ្យបានគ្រប់ជ្រុងជ្រោយជាមុនសិន ដើម្បីជៀសវាងការឆ្លៀតឱកាសពីសំណាក់ជនខិលខូច និងសកម្មជនដីធ្លីមួយចំនួន យកលេសនេះលេសនោះមកទាមទារចំណែកឲ្យអាជ្ញាធរដោះស្រាយជូនដែរ ។
លោក ឃឹម ហ្វីណង់ មានប្រសាសន៍បន្ថែមថា បញ្ហាកាប់រានទន្ទ្រានវាតទីដីសាធារណៈរបស់រដ្ឋ នៅក្នុងស្រុកបន្ទាយស្រីនេះកើតឡើងតាំងពីយូរមកហើយ ដូចជាការតាំងលំនៅដ្ឋាន , ការកាន់កាប់អាស្រ័យផល នៅចន្លោះពី២ទៅ៣ឆ្នាំចុងក្រោយនេះ មានការទន្ទ្រានថ្មីៗនៅក្បែរតំបន់ឧទ្យានជាតិភ្នំគូលែន ក្រោមរូបភាពតាំងលំនៅដ្ឋាន និង ការដាំដាំដំណាំផ្សេងៗ ដែលពួកគាត់មួយចំនួនជាសកម្មជនដីធ្លីមានផ្ទះ និង មានដីចំនួន២-៣កន្លែងហើយ ហើយមកចាប់ដីគ្រាន់តែទុកលក់បន្តឱ្យឈ្មួញតែប៉ុណ្ណោះ ហើយបើគិតជាតួលេខមូលអាចដល់ពាន់ហិកតា ដូច្នេះក្នុងករណីកើតមានការទន្ទ្រានថ្មីៗនោះ អាជ្ញាធរស្រុកបានទប់ស្កាត់ ផ្អាក និងមានវិធានការជាបន្តបន្ទាប់ ។
លោកអភិបាលស្រុកបន្ទាយស្រី មានប្រសាសន៍ទៀតថា កាលពីពេលថ្មីៗនេះ រដ្ឋបាលស្រុកបន្ទាយស្រី បានបើកកិច្ចប្រជុំដើម្បីពិភាក្សាលើបញ្ហាប្រឈម , ការកំណត់ និង ស្រង់ទិន្នន័យប្រជាពលរដ្ឋដែលអាចនឹងត្រូវបានកាត់ឆ្វៀល និងផ្តល់កម្មសិទ្ធិជូនបានពីសំណាក់រាជរដ្ឋាភិបាល ក្នុងនោះបានកំណត់មុខសញ្ញាជនឱកាសនិយម និងសកម្មជនដីធ្លី ដែលក្លែងបន្លំជាជនក្រីក្រ ឬគ្រាន់តែសំអាងមូលហេតុផ្សេងៗ ហើយបានកាប់រានទន្ទ្រានវាតទីដីរដ្ឋ រួចទាមទារឲ្យអាជ្ញាធរទទួលស្គាល់ , ការទប់ស្កាត់ការរុករានទន្ទ្រានយកដីរដ្ឋថ្មីៗបន្ថែម ការដាំដំណាំ រឺសាងសង់សំណង់ថ្មីៗ ដើម្បីបំភ័ន្តភ្នែកជាការកាន់កាប់អាស្រ័យផលយូរមកដែលសកម្មភាពទាំងនេះ នឹងត្រូវបានចាត់ទុកជាការទង្វើអនាធិបតេយ្យរំលោភច្បាប់ ហើយរដ្ឋបាលស្រុកនឹងបន្តប្រកាន់ជំហររឹងមាំនិងម៉ឺងមាត់បំផុត ព្រមទាំងនឹងមានចំណាត់ការខាងផ្លូវច្បាប់យ៉ាងតឹងរឹងសម្រាប់ជនល្មើសទាំងនោះផងដែរ ។
លោក ឃឹម ហ្វីណង់ អភិបាលស្រុកបន្ទាយស្រី មានប្រសាសន៍បន្ថែមទៀតថា ពាក់ព័ន្ឋទៅនឹងការកាត់ឆ្វៀលជូនក្បាលដីដែលរស់នៅនិងអាស្រ័យផលយូរ គឺត្រូវប្រើពេលវេលា និងនិតិវិធីដោយត្រូវឆ្លងកាត់ការសម្រេចពីអន្តរក្រសួង មានក្រសួងបរិស្ថាន , ក្រសួងកសិកម្មរុក្ខាប្រមាញ់និងនេសាទ និងក្រសួងរៀបចំដែនដីនគរូបនីយកម្ម និង សំណង់ ដើម្បីកំណត់គោលការណ៍ និងផែនទីរដ្ឋបាល ខណៈដែលរដ្ឋបាលស្រុកគ្រាន់តែជាអ្នកធ្វើរបាយការណ៍សម្របសម្រួល និងប្រមូលទិន្នន័យដាក់ជូនទៅអន្តរក្រសួង និងរាជរដ្ឋាភិបាល ដើម្បីសម្រេចធ្វើការកាត់ឆ្វៀលជូននៅពេលណា ដូច្នេះក្នុងនាមអាជ្ញាធរស្រុក និង ក្រុមប្រឹក្សាស្រុក បានតាំងចិត្តយ៉ាងម៉ឺងម៉ាត់ និងមានចំណាត់ការព្រហ្មទណ្ឌចំពោះជនដែលលួចទន្ទ្រានថ្មី , លួចសាងសង់លំនៅដ្ឋានថ្មី និង ដាំដំណាំឬក្លែងបន្លំឯកសារ ដើម្បីចាប់យកដី ដាច់ខាតមិនបណ្តែតបណ្តោយវានឹងក្លាយទៅជាឧបសគ្គ និងប៉ះពាល់ដល់បងប្អូនដែលត្រូវទទួលបានការដោះស្រាយពិតប្រាកដ។
គួររំលឹកថា ដើម្បីជាការត្រៀមលក្ខណៈសម្បត្តិទុកជាមុន ក៏ដូចជាអនុវត្តតាមការណែនាំរបស់រដ្ឋបាលខេត្តសៀមរាប រដ្ឋបាលស្រុកបានតម្រូវឲ្យមេភូមិ មេឃុំទាំងអស់នៅក្នុងស្រុកបន្ទាយស្រី រួសរាន់សហការជាមួយតំណាងរដ្ឋបាលព្រៃឈើ និងតំណាងក្រសួងបរិស្ថាន ចុះស្រង់ទិន្នន័យនៃប្រជាពលរដ្ឋដែលអាចនឹងត្រូវបានកាត់ឆ្វៀល និងផ្តល់កម្មសិទ្ធិជូនបានពីសំណាក់រាជរដ្ឋាភិបាល ដោយផ្តល់អាទិភាពចម្បងទៅលើលក្ខណៈវិនិច្ឆ័យចំនួន៤មុនគេរួមមាន៖
១- ការកាន់កាប់អាស្រ័យផលជាក់ស្តែងយូរមកហើយ , ២- ដីដែលមិនមានទំនាស់ , ៣- ដីដែលមានឯកសារបញ្ជាក់ពីរយៈពេលកាន់កាប់ និងអត្តសញ្ញាណច្បាស់លាស់ និង ៤- ការកាន់កាប់អាស្រ័យផលលើដីទំហំតូចៗជាលក្ខណៈគ្រួសារ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
