លោកជំទាវ ទាងអេង-ទៀសីហា អនុប្រធានគណ:កម្មាធិការសាខាកាកបាទក្រហមកម្ពុជាខេត្តសៀមរាប បានឲ្យដឹងថា៖ ដើម្បីរួមចំណែក ដោះស្រាយក្តីកង្វល់ និងឆ្លើយតបទៅនឹងបញ្ហាប្រឈមកង្វះខាតថវិកា ព្រមទាំងដោយមានកិច្ចសហការពីរដ្ឋបាលខេត្តសៀមរាប សាខាកាកបាទក្រហមកម្ពុជាខេត្ត មានគម្រោងរួចហើយ នៅថ្ងៃទី១៨ ខែសីហា ឆ្នាំ២០២០ខាងមុខ នឹងមានរៀបចំព្រឹត្តិការណ៍ជិះកង់រៃអង្គាសរកមូលនិធិសប្បុរសធម៌ ដើម្បីជួយដល់មន្ទីរពេទ្យកុមារក្នុងខេត្តសៀមរាប ដែលកំពុងជួបវិបត្តិហិរញ្ញវត្ថុ ក្នុងដំណាក់កាលមានវិបត្តិជំងឺកូវីដ-១៩។ ការលើកឡើងបែបនេះ ក្នុងឱកាសដែលលោកជំទាវ អញ្ជើញទៅប្រគល់គ្រែចំនួន ៦៩គ្រែ ដល់មន្ទីរពេទ្យបង្អែកខេត្តសៀមរាប កាលពីព្រឹកថ្ងៃអាទិត្យ ទី២៦ ខែកក្កដា ឆ្នាំ២០២០ ។
លោកជំទាវ ទាងអេង-ទៀសីហា មានប្រសាសន៍ទៀតថា ចាប់ពីថ្ងៃទី១៧ ដល់២១ ខែកក្កដា ជាថ្ងៃឈប់សម្រាកមានរយ:ពេលច្រើនថ្ងៃ គឺរហូតដល់ទៅ ៩ថ្ងៃ ក្នុងនោះ រាជរដ្ឋាភិបាលបានអនុញ្ញាតឱ្យឈប់សម្រាក ជំនួសថ្ងៃបុណ្យចូលឆ្នាំចំនួន ៥ថ្ងៃ និងការឈប់សម្រាកត្រូវនឹងថ្ងៃសៅរ៍ អាទិត្យចំនួន ៤ថ្ងៃទៀត។ ក្នុងរយ:ពេលនេះ អាជ្ញាធរខេត្តគ្រោងប្រជុំថ្នាក់ដឹកនាំខេត្ត ថ្នាក់ដឹកនាំមន្ទីរ អង្គភាព និងក្រុង ស្រុក ដើម្បីរៀបចំព្រឹត្តិការណ៍មួយចំនួននៅក្នុងឱកាសថ្ងៃឈប់សម្រាកនេះ ក្នុងនោះក៏មានរៀបចំព្រឹត្តិការណ៍ជិះកង់ ដើម្បីរៃអង្គាសរកមូលនិធិសប្បុរសធម៌ផងដែរ សម្រាប់ជួយដល់មន្ទីរពេទ្យកុមារ ដែលបានផ្តល់សេវាពិនិត្យព្យាបាលមិនគិតថ្លៃចំនួន២ គឺមន្ទីរពេទ្យជ័យវរ្ម័នទី៧ ឬមន្ទីរពេទ្យគន្ធបុប្ផា និងមន្ទីរពេទ្យកុមារអង្គរ ដែលកំពុងជួបវិបត្តិហិរញ្ញវត្ថុយ៉ាងខ្លាំង ។
ក្នុងនោះដែរ លោកជំទាវអនុប្រធានគណ:កម្មាធិការសាខា សង្ឃឹមថា នឹងមានសប្បុរសជនជាច្រើនចូលរួម ដើម្បីសុខភាពកុមារកម្ពុជា ដែលយើងទាំងអស់អាចធ្វើបាន ។ គិតមកដល់ពេលនេះ មានក្រុមហ៊ុនឯកជនធំៗមួយចំនួនហើយ ដែលបានផ្តល់ការឧបត្ថម្ភគាំទ្រ ហើយលោកជំទាវ ក៏បានអំពាវនាវបន្ថែមទៀតដែរ ដល់សប្បុរសជនមិនថានៅក្នុងខេត្ត ឬក្រៅខេត្តសៀមរាបនោះឡើយ សូមចូលរួមក្នុងព្រឹត្តិការណ៍ជិះកង់សប្បុរសធម៌នេះ ឲ្យបានច្រើនបំផុត ដើម្បីទ្រទ្រង់សុខភាពកុមារកម្ពុជា ។
គួររំលឹកថា មន្ទីរពេទ្យកុមារអង្គរ និងមន្ទីរពេទ្យជ័យវ័រ្មនទី៧ ជាមន្ទីរពេទ្យមនុស្សធម៌ ដោយផ្តល់សេវាពិនិត្យព្យាបាលជម្ងឺកុមារ ពិនិត្យស្រ្តីមានផ្ទៃពោះ និងផ្តល់សេវាសម្រាលកូន ដោយឥតគិតថ្លៃ ៕
អត្ថបទ និងរូបភាព: លោកងិន គីមឡេង
កែសម្រួលដោយ៖ លីវ សុខុន
