កាលពីម៉ោង៥ល្ងាច ថ្ងៃទី ២៥ ខែកក្កដា ឆ្នាំ២០២០ កម្លាំងនគរបាលជំនាញខេត្តសៀមរាប បានបញ្ជូនជនជាតិវៀតណាមចំនួន៣០នាក់ ក្នុងនោះស្រី០៨នាក់ ចេញពីខេត្តសៀមរាប ពីបទលួចឆ្លងដែន និងស្នាក់នៅខុសច្បាប់ តាមរថយន្តទៅអគ្គនាយកដ្ឋានអន្តោប្រវេសន៍ ដើម្បីចាត់ការបន្តតាមនីតិវិធីច្បាប់។
តាមការបញ្ជាក់របស់លោកវរសេនីយ៍ឯក តូច សុគន្ធ ប្រធានការិយាល័យស៊ើបអង្កេត និងអនុវត្តន៍នីតិវិធី នៃស្នងការនគរបាលខេត្តសៀមរាប បង្ហាញថា ជនជាតិវៀតណាមទាំងនេះ ដែលបាននាំគ្នាលួចឆ្លងដែន ចេញពីប្រទេសវៀតណាម តាមច្រករបៀង ខ្លះមានលិខិតឆ្លងដែន ខ្លះលួចរត់ចូលមកកាត់វាលស្រែ និងបានមកលួចស្នាក់នៅខុសច្បាប់ ក្នុងក្រុងសៀមរាប។ ការឃាត់ខ្លួនជនជាតិវៀតណាមទាំង៣០នាក់នេះ ធ្វើឡើងនៅវេលាម៉ោង២រសៀល ថ្ងៃទី២៣ ខែកក្កដា ឆ្នាំ២០២០ ស្ថិតនៅតាមផ្លូវបេតុង ត្រង់ចំនុចប៊ូទិក វិហារា ក្នុងភូមិវត្តបូព៌ សង្កាត់សាលាកំរើក ក្រុងសៀមរាប។
