មេបញ្ជការជាន់ខ្ពស់ នៃកងទ័ពជើងគោក បានណែនាំ និងជំរុញដល់នាយទាហាន ពលទាហាន និងមេបញ្ជាការនៅប្រចាំទិសមួយនៅតាមព្រំដែន ត្រូវពង្រឹងសមត្ថភាពរបស់ខ្លួនអោយបានជាប់ជាប្រចាំ ដើម្បីឃ្លាំមើលការឈ្លានពានពីកំម្លាំងទ័ពអមិត្តនៃប្រទេសជិតខាង ខណ:ដែលបច្ចុប្បន្ននេះ នៅតាមខ្សែព្រំដែនខ្លះត្រូវបានកម្លាងទ័ពនៅប្រទេសទាំងនោះមានមច្ឆិតាមិនល្អ។
ឯកឧត្ដម ឧត្ដមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ មានប្រសាន៍បែបនេះ នៅក្នុងពិធីបើកវគ្គហ្វឹកហ្វឺនបំប៉នជំនាញអាវុធគាំទ្រថ្មើរជើង របស់យោធភូមិភាគទី៤ នៅទីបញ្ជាការយុទ្ធសាស្ដ្រអូរកូនតឹង ស្ថិតនៅស្រុកវ៉ារិន នៅខេត្ដសៀមរាប កាលពីថ្ងៃទី០១ ខែសីហាឆ្នាំ២០២០នេះ ក្នុងគោលបំណងពង្រឹងសមត្ថភាពផ្នែកយុទ្ធសាស្ដ្រសង្គ្រាមថ្មើរជើងរបស់កងទ័ព។
ឧត្ដមសេនីយឯក ពៅ ហេង បានបន្ដថា ក្រុមយោធានៅជាប់ព្រំដែនប្រទេសកម្ពុជាមានល្បិចកល់ច្រើន ពួកគាត់ចង់ឈ្លានពានតាមខ្សែបន្ទាត់ព្រំដែនចូលមកទឹកដីកម្ពុជា តែកងកម្លាំងប្រដាប់អាវុធកម្ពុជា មានការប្រុងប្រយ័ត្នគ្រប់ពេលវេលាជាពិសេសបានចេញល្បាតជាប្រចាំ។ ប៉ុន្តែជាកងទ័ពត្រូវពង្រឹងសមត្ថភាពរបស់ខ្លួន ដោយមិនធ្វេសប្រហែសមួយនាទីណាឡើយ ហើយត្រូវការពារអោយបានជាដាច់ខាត និងតឹងតែងបំផុត ដោយមិនទុកអោយកងទ័ពប្រទេសជិតខាងដូចជាប្រទេស ថៃ ឡាវ មករំលោភពានបូរណភាពទឹកដីកម្ពុជាបានឡើយ។
ឯកឧត្ដម បានបន្ដថា កន្លងមកទាហានកម្ពុជាខ្វះសម្ភារ:ធ្វើសឹក ក៏ប៉ុន្ដែនៅពេលនេះកម្ពុជា មានសមត្ថភាពគ្រប់គ្រាន់ និងសម្ភារៈយោធាប្រើប្រាស់គ្រប់ធន់ដ៏ទំនើបៗ សម្រាប់តតាំងជាមួយសត្រូវឈ្លានពានទឹកដីកម្ពុជា។
ឯកឧត្ដមបានបន្ថែមថា នៅដើមខែតុលា ឆ្នាំ២០២០ខាងមុខនេះ ទាហាប្រទេសថៃ មានគម្រោងប្ដូរកម្លាំងថ្មីនៅតាមគោលដៅព្រំដែនជាប់ជាមួយកម្ពុជា ហើយកម្លាំងថ្មីនោះតែងបង្កបញ្ហាជាមួយកងទ័ពកម្ពុជា ក្រោមហេតុផលមិនស្គាល់ភូមិសាស្ដ្រ ដូច្នេះមេញ្ជាការយាមតាមគ្រប់គោលដៅព្រំដែនទាំងប្រទេសថៃ ប្រទេសឡាវ ត្រូវប្រុងប្រយ័ត្ន និងការពារកុំអោយខ្មាំងសត្រូវចូលឈ្លានពានលើបន្ទាត់ព្រំដែនបានជាដាច់ខាត បើទោះបីបច្ចុប្បន្ននេះ នៅមានសភាពស្ងប់ស្ងាត់ក្ដី។
ឯកឧត្ដម បានបញ្ជាក់ថា កាលពីពេលថ្មីៗកន្លងទៅនេះ ក្រុមទាហានឡាវចូលគូសគំនូសនៅជាប់ដើមឈើលើទឹកដីកម្ពុជា ប៉ុន្ដែឯកឧត្ដម បានរាយការណ៍ទៅថ្នាក់ដឹកនាំហើយកាត់ដើមឈើចូលឈ្លានពាននោះចោលវិញហើយ។
….សម្ភាសន៍ឯកឧត្ដម ឧត្ដមសេនីយឯក ពៅ ហេង ០១…….
ឯកឧត្ដមឧត្ដមសេនីយឯក ពៅ ហេង បានបន្ដថា ក្រៅពីការពារទឹកដីពីការឈ្លានពានរបស់ប្រទេសជិតខាងតាមព្រំដែន កងកម្លាំងទ័ពកម្ពុជា ពួកគាត់ត្រូវការពារដាច់ខាតមិនអោយមានការធ្វើបដិវត្ដពណ៌កើតឡើងផងដែរ។
ជាមួយគ្នានោះឯកឧត្ដម ពៅ ហេង ក៏បានអំពាវដល់កងកម្លាំងប្រដាប់អាវុធ ត្រូវនាំគ្នាប្រយុទ្ធប្រឆាំងនឹងជំងឺកូវីដ-១៩ កុំអោយរីករាលដាលនៅក្នុងសហគមន៍ក៏ដូចនៅក្នុងប្រទេសកម្ពុជា និងហាមដាច់ខាតមិនអោយកងកម្លាំងយោធាប្រើប្រាស់ប្រាស់គ្រឿងញៀន ដែលជាហេតុនាំអោយអន្ដរាយដល់អនាគតរបស់ពួកគាត់ និងវឹកវរដល់សង្គមជាតិ៕
អត្ថបទ និងរូបភាព ៖ លោក បូ សាវី
កែសម្រួលដោយ ៖ លោក លីវ សុខុន
