នាព្រឹកថ្ងៃទី០៣ ខែសីហា ឆ្នាំ ២០២០ នៅវិទ្យាល័យ ២៨ មករា ស្រុកស្រីស្នំ ខេត្តសៀមរាប មានរៀបចំកម្មវិធីវេទិកាសាធារណៈ និងសំណេះសំណាលជាមួយលោកគ្រូអ្នកគ្រូ និងសិស្សានុសិស្ស ដើម្បីត្រួតពិនិត្យនិងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រដ្ឋាភិបាល ដឹកនាំដោយ ឯកឧត្តម ស៊ាន បូរ៉ាត ប្រធានក្រុមការងាររបស់រាជរដ្ឋាភិបាលចុះជួយស្រុកស្រីស្នំ និងជារដ្ឋលេខាធិការក្រសួងអប់រំ យុវជន និងកីឡា និងមានការចូលរួមពី សមាជិក សមាជិកា ក្រុមការងាររបស់រាជរដ្ឋាភិបាលចុះជួយស្រុកស្រីស្នំ លោកអភិបាលស្រុកស្ដីទី មន្ត្រី កងកម្លាំងទាំង៣ប្រភេទ ព្រមទាំងលោកគ្រូអ្នកគ្រូ និងសិស្សានុសិស្សជាច្រើនរូប។
ក្នុងវេទិកានោះ ឯកឧត្តម ប្រធានក្រុមការងារ បានផ្ដោតសំខាន់ទៅលើការទប់ស្កាត់ការឆ្លងរីករាលជំងឺកូវីដ១៩ ក្នុងស្រុកស្រីស្នំ ខណៈស្រុកមួយនេះ នៅតែបន្តមានប្រជាពលរដ្ឋចេញចូលទៅធ្វើការនៅបរទេស ជាពិសេសប្រទេសថៃ ទោះបីមានការហាមប្រាមពីរាជរដ្ឋាភិបាលក៏ដោយ។ ឯកឧត្តម បានណែនាំដល់រដ្ឋបាលស្រុក និងគណៈគ្រប់គ្រងវិទ្យាល័យ ២៨ មករា ដែលជាវិទ្យាល័យគម្រូ ត្រូវរៀបចំយុទ្ធនាការផ្សព្វផ្សាយមួយ ដោយរៀបចំសិស្សានុសិស្ស និងយុវជនក្នុងស្រុក ធ្វើការណែនាំដល់ប្រជាពលរដ្ឋនៅតាមភូមិ-ឃុំ ក្នុងស្រុក ដើម្បីឲ្យពួកគាត់ទទួលបានព័ត៌មានបន្ថែមអំពីជំងឺកូវីដ១៩ នាពេលបច្ចុប្បន្ន និងបញ្ឈប់ការទៅធ្វើការដោយខុសច្បាប់នៅបរទេស អំឡុងពេលនៃជំងឺកូវីដ១៩។
ជាមួយនោះ ឯកឧត្តម ប្រធានក្រុមការងារ ក៏បានទទួលសំណួរ និងសំណូមពរ ចំនួន១០ ពាក់ព័ន្ធនឹងបញ្ហាទំនាស់ដីធ្លី ការខ្វះខាតប្រព័ន្ធអគ្គិសនីក្នុងភូមិ-ឃុំមួយចំនួន ការធ្វើអត្តសញ្ញាណបណ្ណមានរយៈពេលយូរ ភាពមិនប្រក្រតីការផ្ដល់បណ្ណក្រីក្រដល់ប្រជាពលរដ្ឋ ។ សំណួរទាំងអស់នោះ ត្រូវបានដោះស្រាយដោយមន្ត្រីជំនាញ និងមានការទទួលយកពីម្ចាស់សំណួរ ចំពោះបញ្ហាដីធ្លី និងអគ្គិសនី ឯកឧត្តមបានជម្រាបជូនប្រជាពលរដ្ឋថា ការងារទាំងអស់នេះ ត្រូវការរយៈពេលដោះស្រាយ ដែលមានអង្គភាពជំនាញចូលរួម ក្នុងនោះឯកឧត្តម ក៏បានសំណូមពរដល់ មន្ទីរ និងអង្គភាពជំនាញ ជួយពន្លឿនការចុះសិក្សា ក៏ដូចជាដោះស្រាយជូនប្រជាពលរដ្ឋឲ្យបានឆាប់រហ័ស។ ដោយឡែក ចំពោះសំណើរសុំហេដ្ឋារចនាសម្ព័ន្ធក្នុងវិទ្យាល័យ ២៨ មករា ការសាងសង់ផ្ទះស្នាក់លោកគ្រូអ្នកគ្រូ និងបង្កើតភូមិ តាមរយៈភូមិឧបសម្ព័ន្ធដែលមានស្រាប់របស់ស្រុក ឯកឧត្តមប្រធានក្រុមការងារ បានជម្រាបថា សំណើរមួយចំនួនត្រូវបានបញ្ជូនទៅកាន់រាជរដ្ឋាភិបាលរួចរាល់ហើយ ប៉ុន្តែដោយសារបញ្ហាជំងឺកូវីដ១៩ សំណើទាំងនោះត្រូវការរយៈពេល ដើម្បីសម្រេច។ ទន្ទឹមនោះ ឯកឧត្តម ក៏បានឧបត្ថម្ភថវិកាផ្ទាល់ខ្លួនចំនួន១លានរៀល សម្រាប់សិស្សស្ម័គ្រចិត្ត ទិញសម្ភារៈបណ្ណាល័យស្ថិតក្នុងឃុំជ្រោយនាងងួន និងឃុំប្រិយ៍។
ព័ត៌មានជាតិ ថ្មីៗ
ក្នុងឱកាសនោះ ឯកឧត្តម ប្រធានក្រុមការងារ ក៏បានថ្លែងអំណរគុណដល់ប្រជាពលរដ្ឋក្នុងស្រុកស្រីស្នំ ដែលបានបន្តគាំទ្រគោលនយោបាយរាជរដ្ឋាលភិបាល ដឹកនាំដោយសម្តេច ហ៊ុន សែន នាយករដ្ឋមន្ត្រី គ្រប់កាលៈទេសៈ ជាមួយនោះ ឯកឧត្តមក៏បានរំលឹកដល់មន្ត្រីរាជការទាំងអស់ ត្រូវចងចាំនូវអនុសាសន៍សម្ដេចតេជោ ហ៊ុន សែន ក្នុងនាមជាមន្ត្រីរាជរដ្ឋាភិបាល ត្រូវចាត់ទុកប្រជាពលរដ្ឋជាចៅហ្វាយ និងបម្រើដោយភាពស្មោះត្រង់។
អត្ថបទ និង រូបថត ៖ លោក សេង ផល្លី និង លោក ខេង ឧត្តម
