កាលពីសៀលថ្ងៃទី០៣ ខែសីហា ឆ្នាំ២០២០ នាទីស្តីការក្រសួងព័ត៌មាន មានរៀបចំពិធីចុះហត្ថលេខាលើកិច្ចព្រមព្រៀងតម្លើងប្រព័ន្ធគ្រប់គ្រងទិន្នន័យធនធានមនុស្ស តាមប្រព័ន្ធអេឡិចត្រូនិច រវាងក្រសួងព័ត៌មាន ជាមួយក្រុមហ៊ុន CAM INFO SERVICES ( CIS ) ក្រោមអធិបតីភាព ឯកឧត្តម អ៊ុក ប្រាថ្នា រដ្ឋលេខាធិការប្រចាំការ តំណាង ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន។
ឯកឧត្តម សូនី វង្សវិសិដ្ឋ រដ្ឋលេខាធិការ និងជាប្រធានក្រុមការងារបណ្តុះបណ្តាលធនធានមនុស្ស នៃក្រសួងព័ត៌មានលើកឡើងថា កិច្ចព្រមព្រៀងនេះ នឹងជួយពង្រឹងដល់ការគ្រប់គ្រងទិន្នន័យមន្ត្រីរាជការ របស់ក្រសួងព័ត៌មានទាំងថ្នាក់ជាតិ និង ថ្នាក់ក្រោមជាតិប្រកបដោយ ប្រសិទ្ធភាពខ្ពស់ ដើម្បីឆ្លើយតប ទៅនឹងតម្រូវការ ទិន្នន័យផ្សេងៗរបស់ក្រសួងមុខងារសាធារណៈ ស្របតាមកម្មវិធី កំណែទម្រង់ រដ្ឋបាលសាធារណៈរបស់រាជរដ្ឋាភិបាលកម្ពុជា នីតិកាលទី៦ នៃរដ្ឋសភា។
ថ្លែងក្នុងឱកាសនោះ ឯកឧត្តម អ៊ុក ប្រាថ្នា គូសបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំ ប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានដាក់ចេញនូវ យុទ្ធសាស្ត្រចតុកោណដំណាក់កាលទី៤ និងកម្មវិធីកំណែទម្រង់ស៊ីជម្រៅ ក្នុងគោលបំណងបង្កើនការអភិវឌ្ឍកម្ពុជា។ ដើម្បីសម្រេចនូវគោលបំណងនេះ រាជរដ្ឋាភិបាល បានបន្តខិតខំក្នុងការពង្រឹងការគ្រប់គ្រងរបស់ក្រសួងស្ថាប័ននានា ដើម្បីអាចបង្កើតបានជារាជរដ្ឋាភិបាល អេឡិចត្រូនិក( E-Government ) នាពេលអនាគត។
ឯកឧត្តម អ៊ុក ប្រាថ្នា ក៏បានជំរុញដល់មន្ត្រីជំនាញ យកចិត្តទុកដាក់ខ្ពស់ ក្នុងការរៀបចំ ប្រព័ន្ធនេះ ឲ្យមានភាពបត់បែន និងមានពិពិធកម្ម ដើម្បីឆ្លើយតប ទៅតាមតម្រូវការជាក់ស្តែង និងតាមស្ថានភាពរបស់ក្រសួង ព្រមទាំង ធ្វើការបណ្តុះបណ្តាល ដល់មន្ត្រីពាក់ព័ន្ធ ទាំងអស់ អំពីការប្រើប្រាស់ និងការថែទាំប្រព័ន្ធគ្រប់គ្រងទិន្នន័យនេះ ឲ្យបានស្ទាត់ជំនាញ។
ឯកឧត្តម រំពឹងថា ការនាំយកនូវបច្ចេកវិទ្យានេះមក នឹងជួយសម្រួលការងារនាយកដ្ឋាន បុគ្គលិកដូចជា អាចគ្រប់គ្រងទិន្នន័យទូទៅរបស់មន្ត្រីរាជការ របស់ក្រសួង និងអាចកត់ត្រាទិន្នន័យ អំពីបច្ចុប្បន្នភាព របស់មន្ត្រីរាជការ ការគោរព ពេលវេលាបំពេញការងារ បច្ចុប្បន្នភាពប្រាក់បៀវត្ស ទៅតាមមុខងារ អតីតភាពច្បាស់លាស់ ឬការផ្ទេរការងារក្នុងក្របខណ្ឌផ្ទៃក្នុងក្រសួង កាន់តែមានប្រសិទ្ធភាព៕
អត្ថបទ និងរូបភាព៖ ក្រសួងព័ត៌មាន
