(វ៉ាស៊ីនតោន)៖បើសារព័ត៌មាន ABC News នៅព្រឹកថ្ងៃអង្គារ ទី០៤ ខែសីហា បានបញ្ជាក់ថា ប្រធានាធិបតីអាមេរិក លោក ដូណាល់ ត្រាំ បានផ្លាស់ប្ដូរចិត្តវិញភ្លាមៗ ជាមួយការបញ្ជាក់ជាថ្មីថា បើសិនជាក្រុមហ៊ុន Microsoft ឬក្រុមហ៊ុនអាមេរិកដទៃ មិនអាចទិញបណ្ដាញទំនាក់ទំនងសង្គម TikTok ពីក្រុមហ៊ុន ByteDance របស់ចិននៅត្រឹមថ្ងៃទី១៥ ខែកញ្ញាខាងមុខនេះទេ នោះបណ្ដាញទំនាក់ទំនង សង្គមដ៏មានប្រជាប្រិយភាពមួយនេះ នឹងត្រូវបិទមិនឱ្យធ្វើប្រតិបត្តិការតទៅទៀត នៅក្នុងសហរដ្ឋអាមេរិក ។
ត្រាំ ធ្វើការអះអាងថា ខ្ញុំបានកំណត់យកថ្ងៃទី១៥ ខែកញ្ញា ជាថ្ងៃដែល TikTok ត្រូវបិទមិនឱ្យធ្វើប្រតិបត្តិការតទៅទៀត នៅសហរដ្ឋអាមេរិក ក្នុងករណីដែលក្រុមហ៊ុន Microsoft ឬក្រុមហ៊ុនអាមេរិកដទៃ មិនអាចសម្រេចបានកិច្ចព្រមព្រៀង ឬទិញបណ្ដាញទំនាក់ ទំនងសង្គមមួយនេះបានទេនោះ» ។
គួរឲ្យដឹងដែរថា កាលពីថ្ងៃចន្ទម្សិលមិញ ប្រធានាធបតីអាមេរិក បានប្រកាសថា លោកនឹងចេញបទបញ្ជាប្រតិបត្តិមួយ ដើម្បីបិទ TikTok ដោយសារបារម្ភពីបញ្ហាសន្តិសុខជាតិ ហើយថែមទាំងសង្កត់ធ្ងន់ដែរថា លោកក៏មិនចង់ឱ្យក្រុមហ៊ុនអាមេរិកណាមួយ ទិញយក TikTok ដែរ ។ ប៉ុន្តែ ក្រោយជួបពិភាក្សាជាមួយ CEO ក្រុមហ៊ុន Microsoft លោក សត្យា ណាឌែលឡា (Satya Nadella) លោក ត្រាំ បានកែប្រែចិត្តដោយទុកពេល ៤៥ថ្ងៃ ឱ្យក្រុមហ៊ុន ByteDance ពិចារណាលក់ TikTok ឱ្យក្រុមហ៊ុន Microsoft ៕
