ថ្ងៃទី០៤ ខែសីហា ឆ្នាំ២០២០ ក្នុងបរិវេណវត្តអង្គរខាងជើង នៃប្រាសាទអង្គរវត្ត មានរៀបចំការដាំកូនឈើចម្រុះ ចំនួន៥០០ដើម ក្នុងគោលបំណងលើកសោភណ្ឌភាពប្រាសាទអង្គរវត្ត ពិសេសកាត់បន្ថយកម្ដៅ ដើម្បីការពារប្រាង្គប្រាសាទពីបម្រែបម្រួលអាកាសធាតុ។
លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានលើកឡើងថា ក្រៅពីកិច្ចការអភិរក្ស ជួសជុលប្រាង្គប្រាសាទ អាជ្ញាធរជាតិអប្សរាបានយកចិត្តទុកដាក់ខ្ពស់ លើបរិស្ថានធម្មជាតិ ដែលផ្តល់ប្រយោជន៍ ចំពោះប្រាសាទបុរាណ និងមនុស្សផងដែរ។
លោកអគ្គនាយករង បានកោតសរសើរ និងអរព្រះគុណ ដល់ព្រះចៅអធិការវត្តអង្គរខាងជើង ដែលបានផ្ដួចផ្ដើម ពិធីដាំកូនឈើនេះ។ លោក ក៏បានលើកទឹកចិត្តដល់ ពុទ្ធបរិស័ទ ប្រជាពលរដ្ឋ ស្ថាប័នរដ្ឋ វិស័យឯកជន បន្តចូលរួមដាំដើមឈើឱ្យបានច្រើន និងសម្អាតបរិស្ថានឱ្យបានល្អក្រោយដាំរួច ដើម្បីរួមចំណែកធ្វើឲ្យរមណីដ្ឋានតំបន់អង្គរ កាន់តែមានពណ៌បៃតងស្រស់បំព្រង។
បើតាមប្រសាសន៍ របស់ឯកឧត្ដម ហង់ ពៅ អគ្គនាយកអាជ្ញាធរជាតិអប្សរា នៅថ្ងៃទី០៣ ខែសីហាម្សិលមិញនេះ បញ្ជាក់ថា អជ្ញាធរជាតិអប្សរា បានខិតខំរៀបចំទីធ្លាប្រាសាទបុរាណនានាជាច្រើន ជាពិសេសប្រាសាទអង្គរវត្ត ដើម្បីឲ្យអ្នកទេសចរជាតិ និងអន្តរជាតិ បានយល់ពីតម្លៃសម្បត្តិវប្បធម៌ជាតិ និងដើមឈើនៅក្នុងតំបន់រមណីដ្ឋានអង្គរ។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
