កាលពីយប់ថ្ងៃទី០៤ ខែសីហា ឆ្នាំ២០២០ ក្រុមការងារចម្រុះខេត្តសៀមរាប រួមមានក្រុមការងារអធិការកិច្ចនៃមន្ទីរទេសចរណ៍ខេត្ត សហការជាមួយតំណាងរដ្ឋបាលក្រុងសៀមរាប និងអធិការដ្ឋានក្រុងសៀមរាប បានបន្តចុះផ្អាកសកម្មភាពទីតាំងបៀរហ្គាឌិន ចំនួន០៤កន្លែងទៀត ដែលលួចបើកអាជីវកម្មល្មើសនឹងបទបញ្ជារបស់រាជរដ្ឋាភិបាល និងសេចក្តីណែនាំរបស់រដ្ឋបាលខេត្តសៀមរាប ក្នុងដំណាក់កាលនៃការបង្ការ និងទប់ស្កាត់ការរីករាលដាលនៃជំងឺកូវី១៩ ក្នុងនោះមាន ៖ ១- សែនសប្បាយ ហ្កាឡាក់ស៊ី ដែលអាជ្ញាបណ្ណទេសចរណ៍ ហួសសុពលភាព , ២- សែនមនោរម្យ ក្លាស៊ីក៥ ដែលគ្មានអាជ្ញាបណ្ណទេសចរណ៍ , ៣-សែនមនោរម្យ ក្លាស៊ីក ដែលគ្មានអាជ្ញាបណ្ណទេសចរណ៍ និង ៤- ផ្លាទីនឹម សែនសប្បាយ ដែលគ្មានអាជ្ញាបណ្ណទេសចរណ៍ ដែលទីតាំងបៀរហ្គាឌិនទាំង០៤នេះ ស្ថិតនៅក្នុងភូមិជន្លង់ សង្កាត់សាលាកំរើក ក្រុងសៀមរាប ។
លោកវរៈសេនីត្រី ឃីម ផល្លា អធិការរង នៃអធិការដ្ឋាននគរបាលក្រុងសៀមរាប បានឲ្យដឹងថា គិតចាប់ពីថ្ងៃទី២៧ ខែកក្កដា រហូតដល់ថ្ងៃទី0៤ ខែសីហា ឆ្នាំ២០២០នេះ ក្រុមការងារចម្រុះខេត្តសៀមរាប បានចុះបិទហាងបៀរហ្គាឌិនបណ្ណោះអាសន្នចំនួនជាង១១កន្លែងហើយ ដែលមានទីតាំងស្ថិតនៅសង្កាត់សាលាកំរើក និងសង្កាត់ស្វាយដង្គំ ក្រុងសៀមរាប ដោយសារល្មើសនឹងបម្រាមរបស់ក្រសួងសុខាភិបាល ក្នុងការទប់ស្កាត់និងប្រយុទ្ធប្រឆាំងនឹងជំងឺកូវីដ១៩ ហើយក្រោយពីបិទបណ្ដោះអាសន្ន ក្រុមការងារបានណែនាំឲ្យម្ចាស់អាជីវកម្ម ដាក់ពាក្យស្នើសុំច្បាប់នៅច្រកចេញចូលតែមួយរដ្ឋបាលខេត្ត និងអនុវត្តតាមវិធានសុវត្ថិភាពរបស់ក្រសួងសុខាភិបាល និងក្រសួងទេសចរណ៍ ដើម្បីប្រែក្លាយទៅជាភោជនីយដ្ឋានឲ្យបានត្រឹមត្រូវ ទើបអាចបើកដំណើរការអាជីវកម្មបានវិញ ។
លោក ហេង សារ៉ាឌី មន្ដ្រីអធិការកិច្ចនៃមន្ទីរទេសចរណ៍ខេត្ដសៀមរាប មានប្រសាសន៍ថា មន្ត្រីជំនាញបានណែនាំ និងធ្វើកិច្ចសន្យាជាមួយម្ចាស់អាជីវកម្មទាំងពីរ ត្រូវគោរពឲ្យបាននូវវិធានសុវត្ថិភាពនានា របស់ក្រសួងសុខាភិបាល និងវិធានសុវត្ថិភាពទេសចរណ៍ចាំបាច់មួយចំនួន ដោយត្រូវរក្សាគម្លាតសុវត្ថិភាពបុគ្គលនិងសង្គម រៀបចំម៉ាស៊ីនវាស់កម្តៅ ទឹកអាកុល ឬជែលលាងដៃ បុគ្គលិកត្រូវពាក់ម៉ាស់ការពារ រក្សាអនាម័យសុវត្ថិភាពម្ហូបអាហារ និងមិនអនុញ្ញាតឲ្យមានសកម្មភាពប្រគុំតន្រ្តី និងច្រៀងខារ៉ាអូខេក្នុងបន្ទប់ជាដាច់ខាត ។
សូមបញ្ជាក់ថា ទីតាំងបៀរហ្គាឌិន និងខារ៉ាអូខេ ជាង១១កន្លែង ដែលក្រុមការងារចម្រុះខេត្ត បានចុះបិទជាបណ្ណោះ ដោយសារគ្មានច្បាប់ និង អាជ្ញាបណ្ណហួសសុលភាពនោះ រួមមាន ៖ សែនសប្បាយហ្កាឡាក់ស៊ី , សែនមនោរម្យ ក្លាស៊ីក៥ , សែនមនោរម្យ ក្លាស៊ីក , ផ្លាទីនឹម , សែនសប្បាយ ហ្គាឡាក់ស៊ី , សែនមនោរម្យក្លាស៊ីក៥ , សែនមនោរម្យក្លាស៊ីក៧ , សែនសប្បាយផ្លាទីនឹម , ម្លប់ជ្រៃត្រជាក់ចិត្តកំពុងបើកនិងបង្កប់ខារ៉ាអូខេ , ម្លប់ដូងពិភពព្រិលថ្មី កំពុងបើកនិងបង្កប់ខារ៉ាអូខេ និង ស្នាដៃម៉ែក្មេក៥ បង្កប់ខារ៉ាអូខេ ៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
