បើតាមក្រសួងសុខាភិបាលលីបង់ នៅព្រឹកថ្ងៃពុធ ទី០៥ ខែសីហា បានឲ្យដឹងថា ចំណួនមនុស្សដែលបានស្លាប់ បានកើនឡើងដល់ជាង ៧០នាក់ហើយ និងជាង ៤,០០០នាក់ទៀតរងរបួស បន្ទាប់ពីករណីផ្ទុះដ៏កក្រើកមួយ បានកើតឡើងនៅជាប់តំបន់ឆ្នេរនៃរដ្ឋធានីបេរូត ។
ផ្សែងដ៏ខ្មៅ ហុយកញ្ជ្រោលឡើងពេញមេឃគួរឲ្យព្រឺព្រួច អមដោយសំឡេងផ្ទុះដ៏កក្រើកជាបន្តបន្ទាប់ នៅតំបន់កំពង់ផែ នៃរដ្ឋធានីរបស់ប្រទេសមជ្ឈិមបូព៌ាមួយនេះ ក្រោយពីមានការផ្ទុះឃ្លាំងស្តុកសារធាតុគីមីមួយកន្លែង ដេលមានសារធាតុគីមីនៅក្នុងនោះបានរក្សាទុកក្នុងឃ្លាំងអស់រយៈពេលជាង ០៦ឆ្នាំមកហើយ ។
ប្រធានាធិបតីលីបង់លោក មីឈែល អាអូន (Michel Aoun) បានបង្ហោះសារនៅលើគណនី Twitter របស់លោកថា ហេតុការណ៍នេះ វាជារឿងមិនអាចទទួលយកបាននោះទេ ដែលសារធាតុអាម៉ូញ៉ូមនីត្រាត (ammonium nitrate) ត្រូវបានទុកដាក់នៅទីនោះ ដោយគ្មានការរក្សាសុវត្ថិភាព ។ តែទោះជាបែបនេះក្តី ក្រុមស៊ើបអង្កេតលីបង់ នៅតែបន្តការតាមដាន និងប្តេជ្ញាយកជនបង្ករឿងនេះ មកផ្តន្ទាទោសឲ្យបានធ្ងន់ធ្ងរជាទីបំផុត ។ ហើយក្នុងនោះអាជ្ញាធរលីបង់ ក៏បានប្រកាសបញ្ចេញ កញ្ចប់ថវិកា ៦៦លានដុល្លារអាមេរិក ដើម្បីដោះស្រាយបញ្ហាក្នុងគ្រាមានអាសន្ននេះផងដែរ ជាពិសេស គឺការព្យាបាលអ្នករងរបួសរាប់ពាន់នាក់ ៕
