លោក ព្រំ វិច ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់និងនេសាទខេត្តសៀមរាប បានឲ្យដឹងថា ក្រោមកិច្ចសហការជាមួយភ្នាក់ងារពេទ្យសត្វភូមិ ថ្ងៃនេះយើងបានចុះមកធ្វើការចាក់វ៉ាក់សាំងការពារជំងឺ អុតក្តាម សារទឹក និង បូសខ្យល់គោ ក្របី ក្នុងគោលបំណងទប់ស្កាត់ការឆ្លងរីករាលដាលជំងឺនានាដល់សត្វគោ ក្របីរបស់ប្រជាកសិករ ស្របពេលដែលរដូវវស្សាបានមកដល់ ជាពិសេសការពារហានិភ័យដល់សត្វពាហនៈ ក្រែងមានទឹកជំនន់ជាយថាហេតុកើតមាននៅក្នុងមូលដ្ឋានណាមួយ ខណៈដែលសត្វគោក្របីត្រូវបានជម្លៀសទៅកាន់ទីទួលសុវត្ថិភាព ដែលអាចនឹងបង្កឱ្យកើតជំងឺផ្សេងៗ ហេតុនេះត្រូវតែចាក់បង្ការ ដើម្បីសុខភាពសត្វកុំឱ្យឈឺស្លាប់ ។
លោក ព្រំ វិច មានប្រសាសន៍ទៀតថា ការចាក់ថ្នាំការពារជំងឺទៅលើសត្វគោក្របីនេះ ត្រូវបានធ្វើឡើងតាមរយៈមន្រ្តីចុះទៅដល់មូលដ្ឋានផ្ទាល់របស់ប្រជាពលរដ្ឋ ឬតាមរយៈភ្នាក់ងារពេទ្យសត្វតាមភូមិ ហើយការចាក់វាក់សាំងនេះពុំបាន តម្រូវឲ្យប្រជាពលរដ្ឋបង់ប្រាក់ឡើយ ដូច្នេះ ការចាក់ថ្នាំវ៉ាក់សាំងដល់សត្វពានៈ ជាវិធានការល្អប្រសើរ ដើម្បីការពារទុកជាមុនកុំឲ្យកើតមានជំងឺផ្សេងៗ ដែលវិធានការនេះ គឺបានជួយសម្រាលការលំបាក របស់ប្រជាកសិករកុំឲ្យគោក្របីទំាងនោះងាប់ ជាហេតុធ្វើឲ្យបាត់បង់ដល់ចំណូលសេដ្ឋកិច្ចគ្រួសារប្រជាពលរដ្ឋ ។
លោក ព្រំ វិច មានប្រសាសន៍យ៉ាងដូច្នេះ ក្នុងឱកាសពេលចុះចាក់វ៉ាក់សាំងការពារជំងឺសត្វគោក្របីរបស់ប្រជាពលរដ្ឋ នៅភូមិត្រកៀត ឃុំមុខប៉ែន ស្រុកពួក ខេត្តសៀមរាប កាលថ្ងៃទី៥ ខែសីហា ឆ្នាំ២០២០នេះ ។
លោក ហៃ វាសនា អនុប្រធានមន្ទីរកសិកម្ម រុក្ខាប្រមាញ់ និង នេសាទខេត្តសៀមរាប បានឲ្យដឹងថា យុទ្ឋនាការការចាក់វ៉ាក់សាំងការពារជំងឺសត្វគោ-ក្របីនេះ នឹងប្រព្រឹត្តទៅក្នុងរយៈពេលពេញមួយសប្តាហ៍ ដូច្នេះក្នុងឱកាសនេះ សូមសំណូមពរដល់បងប្អូនប្រជាពលរដ្ឋទាំងអស់ ដែលមានសត្វគោ-ក្របី សូមរួសរាន់យកសត្វគោ-ក្របីមកទទួលការចាក់វ៉ាក់សាំងការពារជំងឺនេះឲ្យបានគ្រប់ៗគ្នា ក្នុងអំឡុងពេលដែលក្រុមការងារបានចុះទៅដល់ភូមិដ្ឋានរបស់ខ្លួន ព្រោះថា ការចាក់ថ្នាំព្យាបាលជំងឺសត្វ ពុំសូវមានប្រសិទ្ធភាពដូចការចាក់វ៉ាក់សាំងការពារជំងឺសត្វឡើយ ។
សូមបញ្ជាក់ថា នៅក្នុងទូទាំងខេត្តសៀមរាប ការចិញ្ចឹមគោ-ក្របី មានចំនួន ២៤០.៣៨៣ក្បាល ក្នុងនោះ សត្វគោចំនួន១.៩៨៤ក្បាល និង សត្វក្របីចំនួន ៤៧៥ក្បាល បានទទួលការព្យាបាលពីមន្ត្រីជំនាញ នៃការិយាល័យផលិតកម្ម និងបសុព្យាបាល ក្នុងរយៈពេល ៦ខែដើមឆ្នាំ២០២០នេះ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
