រយៈពេល១០ថ្ងៃចុងក្រោយ គិតចាប់ពីថ្ងៃទី២៦ ខែកក្កដា រហូតមកដល់ថ្ងៃទី៤ ខែសីហានេះ ប្រជាពលរដ្ឋក្នុងខេត្តសៀមរាប ចំនួន១០២៤នាក់ បានកើតជំងឺគ្រុនឈីក ដែលបានបង្កឲ្យមានការព្រួយបារម្ភអាជ្ញាធរខេត្ត នេះបើតាមប្រសាសន៍ លោកវេជ្ជបណ្ឌិត ប៊ូ សារិន ប្រធានកម្មវិធីគ្រុនឈាមនៃមន្ទីរសុខាភិបាលខេត្តសៀមរាប នៅថ្ងៃទី៥ ខែសីហា ឆ្នាំ២០២០នេះ។
លោកវេជ្ជបណ្ឌិត ប៊ូ សារិន បានបន្តថា ក្នុងចំណោមជាង១ពាន់ករណីនោះ មន្ទីរពេទ្យគន្ធបុប្ផាខេត្តសៀមរាប និង មន្ទីរពេទ្យកុមារអង្គរ ទទួលអ្នកជំងឺជាកុមារជាង៣០០ករណី ដោយឡែកមន្ទីរពេទ្យបង្អែកខេត្ត និងមណ្ឌលសុខភាពទាំងអស់របស់រដ្ឋក្នុងខេត្តសៀមរាប ទទួលអ្នកជំងឺគ្រប់វ័យ ចំនួនជិត៧០០ករណី។ សម្រាប់ឆ្នាំ២០២០នេះ ជំងឺគ្រុនឈិក បានចាប់ផ្ដើមផ្ទុះឡើង នៅក្នុងខែកក្កដា ហើយចំនួនអ្នកជំងឺនេះ ពុំទាន់រាប់បញ្ចូលអ្នកសម្រាកព្យាបាលនៅមន្ទីរពេទ្យឯកជននៅឡើយទេ។ តួលេខនេះ ធ្វើឲ្យខេត្តសៀមរាប ឈរនៅកម្រិតមួយគួរឲ្យព្រួយបារម្ភ ជាងបណ្ដាខេត្តដទៃទៀតនៅទូទាំងប្រទេស។
លោកវេជ្ជបណ្ឌិត បញ្ជាក់ថា ជំងឺគ្រុនឈីកនេះឆ្លងតាមរយៈមូលខ្លា វាមានអាការៈ និងរោគសញ្ញាដូចទៅនឹង ជំងឺគ្រុនឈាមដែរ ប៉ុន្តែវាមិនបង្កឲ្យអ្នកជំងឺស្លាប់ដោយសារតែមេរោគនេះឡើយ។
យោងតាមសេចក្ដីណែនាំ ក្រសួងសុខាភិបាល ពីការទប់ស្កាត់ការចម្លងមេរោគតាមរយៈសត្វ ប្រជាពលរដ្ឋទាំងអស់ ត្រូវលុបបំបាត់ប្រភពដង្កូវទឹក ប្រមូលរាល់វត្តុដក់ទឹក ទៅកម្ទេច ឬកប់ចោល កាប់ឆ្ការគម្ពោតព្រៃនៅជុំវិញផ្ទះ កុំគេងនៅទីងងឹតនៅពេលថ្ងៃ ត្រូវគេងក្នុងមុង កុមារ ឬមនុស្សចាស់ត្រូវស្លៀកសម្លៀកបំពាក់វែងៗ ការពារមូលខាំ បើកទ្វារ បង្អួចផ្ទះឱ្យមានពន្លឺថ្ងៃចេញចូលគ្រប់គ្រាន់ ដើម្បីដេញមូស៕
អត្ថបទ និង រូបថត ៖ លោក សូ ស៊ីមាន
កែសម្រួលអត្ថបទ ៖ លោក សេង ផល្លី
