(បាម៉ាកូ)៖បើតាមការចេញផ្សាយ ដោយទីភ្នាក់ងារព័ត៌មានចិនស៊ីនហួរ នាព្រឹកថ្ងៃអង្គារ ទី០៤ បានឲ្យដឹងថា យន្តហោះខ្នាតមធ្យមមួយគ្រឿង ជារបស់បេសកកម្មអង្គការសហប្រជាជាតិ (UN) ប្រចាំនៅប្រទេសម៉ាលី បានជួបគ្រោះថ្នាក់នៅអំឡុងការចុះចត នៅទីក្រុងហ្គៅ (Gao) ភាគខាងជើងប្រទេសម៉ាលី និងបានបង្កឲ្យមនុស្ស ១១នាក់រងរបួស ។
យន្តហោះនៃបេសកកម្មម៉ៃណឹសម៉ា (MINUSMA) ខាងលើនេះ បានធ្វើដំណើរមកពីទីក្រុងបាម៉ាកូ (Bamako) ដោយដឹកមនុស្សសរុប ១១នាក់ ក្នុងនោះអ្នកដំណើរ ០៤នាក់ និង ០៧នាក់ទៀតជាបុគ្គលិក UN ព្រមទាំងអ្នកបញ្ជាការលើយន្តហោះ។ ក្រោយគ្រោះថ្នាក់កើតឡើង នៅអំឡុងការចុះចត តួយន្តហោះទាំងមូលបានរងការខូចខាតយ៉ាងដំណំ ខណៈមនុស្សទាំង ១១នាក់សុទ្ធតែបានរងរបួស ក្នុងនោះម្នាក់មានសភាពធ្ងន់ធ្ងរ ។
បើតាមអ្នកឃើញហេតុការណ៍ផ្ទាល់ បានឲ្យដឹងដែរថា យន្តហោះប្រភេទ Antonov An-72 ជាកម្មសិទ្ធិរបស់បេសកកម្ម MINUSMA របស់ UN ទំនងជាបានជ្រុលចង្កូតនៅអំឡុងការចុះចត នៅពេលអាកាសធាតុមិនអំណយផល និងផ្លូវចុះចតក៏ខុសបទដ្ឋានស្តង់ដារទៀត ទើបបានជាហេតុការណ៍ គ្រោះថ្នាក់ខាងលើនេះកើតឡើង។ យ៉ាងណាក៏ដោយ ការស៊ើបអង្កេតរកមូលហេតុជាក់លាក់ បាននិងកំពុងធ្វើឡើងហើយ ៕
