លោក ឡេង លាត អនុប្រធានមន្ទីររ៉ែនិងថាមពលខេត្តសៀមរាប មានប្រសាសន៍ថា បច្ចុប្បន្នអាជីវកម្មហ្គាសខ្នាតតូចក្នុងក្រុងសៀមរាប មានចំនួន៣៣កន្លែង ប៉ុន្តែមានតែ១០ទីតាំងប៉ុណ្ណោះ ដែលទទួលបានការអនុញ្ញាតច្បាប់បើកអាជីវម្មពីមន្ទីររ៉ែនិងថាមពលខេត្ត ដូច្នេះចំពោះទីតាំងណាដែលមិនទាន់មានច្បាប់អនុញ្ញាតក្នុងការបើកអាជីវកម្មទេ នាពេលខាងមុខអាជ្ញាធរ នឹងចាត់វិធានការទៅតាមផ្លូវច្បាប់ដោយគ្មានការលើកលែងឡើយ ខណៈបច្ចុប្បន្ននេះ មិនទាន់មានចំណាត់ការផាកពិនិយ ឬ ផ្អាកអាជីវកម្ម ណាមួយចំពោះអាជីវករទាំងនោះនៅឡើយទេ ព្រោះជាជំហានដំបូងត្រឹម តែចុះអប់រំផ្សព្វផ្សាយតែប៉ុណ្ណោះ ។
លោក ឡេង លាត មានប្រសាសន៍យ៉ាងដូច្នេះ ក្នុងកម្មវិធីសន្ទនាមតិរបស់វិទ្យុជាតិខេត្តសៀមរាប កាលពីថ្ងៃទី០៧ ខែសីហា ឆ្នាំ២០២០កន្លងទៅថ្មីៗនេះ ។
លោក ឡេង លាត មានប្រសាសន៍ទៀតថា ប្រជាពលរដ្ឋដែលមានបំណងចង់បើកអាជីវកម្មលក់ និង បញ្ជូលហ្គាសខ្នាតតូច គឺអាចធ្វើការស្នើសុំពាក្យសំណុំឯកសារ នៅមន្ទីររ៉ែនិងថាមពលខេត្ត ហើយដាក់ជូនទៅអាជ្ញាធរមូលដ្ឋានឃុំ-សង្កាត់ ក្រុង -ស្រុក ដែលខ្លួនរស់នៅ ដើម្បីឲ្យអាជ្ញាធរធ្វើការត្រួតពិនិត្យ និង ចេញលិខិតអនុញ្ញាត រួចដាក់ជូនបន្ដមកកាន់មន្ទីររ៉ែនិងថាមពលខេត្ត ហើយក្រុមការងារមន្រ្តីជំនាញ នឹងធ្វើការចុះពិនិត្យដល់ទីតាំងដែលបានស្នើសុំផ្ទាល់ ដើម្បីធ្វើការវាយតម្លៃ អនុញ្ញាតឲ្យបើកអាជីវកម្មលក់ និងបញ្ជូលហ្គាសខ្នាតតូចនេះតែម្ដង ចំពោះកម្រៃសេវាលើកការស្នើសុំពាក្យបើកអាជីវកម្មនេះ គឺមិនមានការគិតថវិកាឡើយ ដោយឡែកសម្រាប់ការបើកអាជីវកម្មហ្គាសខ្នាតធំ គឺជាការគ្រប់គ្រងរបស់ក្រសួងរ៉ែនិងថាមពល ។
ក្នុងឱកាសនោះដែរ លោក ឡេង លាត បានសំណូមពរដល់អាជីវករកំពុងប្រកបអាជីវកម្មហ្គាសខ្នាតតូចទាំងអស់ ដែលមានទីតាំងស្ថិតនៅទីប្រជុំជនហើយមានកន្លែងចង្អៀត គួរតែលក់ត្រឹមសំបកកំប៉ុងហ្គាសបានហើយ ចំណែកកន្លែងបញ្ជូល ឬ ស្តុកហ្គាស គួរតែដាក់នៅឲ្យឆ្ងាយដែលមានទីតាំងធំទូលាយ ដើម្បីសុវត្ថិភាពទាំងម្ចាស់អាជិវកម្ម និងអ្នកប្រើប្រាស ៕
អត្ថបទ និង រូបថត ៖ លោកស្រី សូ ស៊ីមាន និង លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
