បើតាម ឯកឧត្ដម ហង់ ពៅ អគ្គនាយកអាជ្ញាធរជាតិអប្សរា បានឲ្យដឹងកាលពីពេលថ្មីៗនេះថា បច្ចុប្បន្នប្រាសាទនេះមានស្ថានភាពបាក់បែកទ្រុឌទ្រោម នៅសល់តែគ្រឹះ ហើយមានរចនាសម្ពន្ធប្រាសាទ សម្ភារ ស្លាកស្នាមនៅសល់ ជើងទម្រ ព្រះសីសៈព្រះពោធិសត្វប្រាជ្ញបារមីតារចនាបថបាយ័ន្ត និងសសរពេជ្រ ដែលតាមអ្នកជំនាញសន្និដ្ឋានថា ប្រាសាទនេះសាងសង់ឡើងនៅចុងស.វ.ទី១២ តាមរចនាបថបាយ័ន្ត ។
នៅជុំវិញប្រាសាទជាទីសក្ការៈនេះ សម្បូរទៅដោយទួលជាច្រើនដែលមនុស្សរស់នៅ ហើយប្រហែលជាអាចមានមនុស្សរស់នៅមុនមានប្រាសាទក៏ថាបាន ហើយដើម្បីឲ្យប្រសាទនេះកាន់តែមានភាពទាក់ទាញ់ អាជ្ញាធរជាតិអប្សរា បានសម្រេចជាមួយអ្នកជំនាញពាក់ព័ន្ធ រួមគ្នាលើកតម្លៃប្រាសាទបាយក្អែក ឱ្យក្លាយជាសារមន្ទីរលម្ហដើម្បីទាក់ទាញទេសចរ និងអភិរក្សសំណង់ប្រាសាទឱ្យផុតពីហានីភ័យ ។
លោកបន្ថថែមថា បច្ចុប្បន្ននេះអាជ្ញាធរជាតិអប្សរា បាននឹងកំពុងបន្តអភិវឌ្ឍន៍ នៅជុំវិញ ប្រាសាទបាយក្អែក ក៍ដូចជានៅខាងមុខអ្នកអង្គរវត្ដ នឹងមានការអភិវឌ្ឍអោយមានភាពពណ៌បៃតងគ្រប់រដូវកាល ខណៈដែលបច្ចុប្បន្ននេះ ក្រុមការងារនឹងដាំដើមឈើ ដាំស្មៅ ស្តារស្រះ តាំងបង្ហាញប្រវត្តិប្រាសាទ និងលទ្ធផលបានពីកំណាយ រៀបចំទីតាំងនេះសម្រាប់ទាក់ទាញភ្ញៀវទេសចរមកទស្សនា សម្រាកកាយ និងការរៀបចំពិធីផ្សេងៗផង ៕
អត្ថបទ និង រូបភាព៖ បូ សាវី
កែសម្រួល៖ អ៊ុន ណារាជ្យ
